ރައީސް ނަޝީދު ވަތްކެއް ނުކުރެވޭނެ، އެމްޑީޕީ އެދަނީ އަނެއްކާ ވެސް ބަލިވާން: އާޒިމް
ރައްޔިތުންގެ މަޖިލީހުގެ ރިޔާސަތުން ރައީސް މުހައްމަދު ނަޝީދު ވަކިކުރުމަށް އެމްޑީޕީން ކުރަމުންދާ މަސައްކަތް ކާމިޔާބު ނުވާނެކަމަށް ދަ ޑިމޮކްރެޓްސްގެ ޕާލަމެންޓްރީ ގުރޫޕުގެ ލީޑަރު އަދި މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވެއްޖެ އެވެ.
ބުރާސްފަތި ދުވަހުގެރޭ ދަ ޑިމޮކްރެޓްސްއިން ބޭއްވި ހަރުގެ ޖަލްސާއެއްގައި ވާހަކަދައްކަވަމުން އަލީ އާޒިމް ވިދާޅުވީ ރިޔާސީ އިންތިޚާބުން ސަރުކާރު ހިންގާ މައި ޕާޓީ ބަލިވުމަކީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅަން ޖެހޭ ސަބަބެއް ނޫން ކަމަށެވެ.
ރިޔާސީ އިންތިޚާބުން ބަލިވުމުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އެމްޑީޕީން ހުށައަޅައިގެން އުޅޭ ހަމައެކަނި ސަބަބަކީ އިންތިޚާބުން ނާކާމިޔާބުވެވަޑައިގެން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ހިތްޕުޅަށް ތަސައްލީއެއް ހޯއްދަވާދެއްވުމަށް ކަމަށް އަލީ އާޒިމް ވިދާޅުވި އެވެ.
އޭނާ ވިދާޅުވީ މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އެމްޑީޕީން ހުށައަޅާފައި ވަނީ އެމީހުންގެ އަތުގައި މަޖިލީހުގެ މެޖޯރިޓީ އޮތީތީ ކަމަށެވެ. އެ މައްސަލަ އަކީ ގާނޫނީ ގޮތުން ބަލާއިރު ހުށައެޅޭނެ މައްސަލައެއް ނޫން ކަމަށާއި، އެ މައްސަލަ ކުރިއަށް ގެންދެވޭނެ ގާނޫނީ ހަމައެއްވެސް ނެތްކަމަށް އާޒިމް ވިދާޅުވި އެވެ.
އޭނާ ވިދާޅުވީ މަޖިލީހުގެ ރައީސްގެ އިތުބާރު ނެތްކަމުގެ މައްސަލައަކީ ކުޅޭ ކުޅޭ ކަމަކަށް ހަދައި، އިރު އިރުކޮޅާ ހުށައަޅާފަ އަނބުރާ ގެންގޮސްފަ، އެހެން ހެދޭނެ ކަމަކަށްވުރެ ހައްސާސް ކަމެއް ކަމަށެވެ.
އެހެންކަމުން، އެމްޑީޕީން މިހާރު އެކަން ކުރަން އުޅޭގޮތަށް މަޖިލީހުގެ ރިޔާސަތުން ނަޝީދު ވަކި ނުކުރެވޭނެ ކަމަށާއި، އެ މަސައްކަތް ކުރަން އުޅެގެން އަނެއްކާވެސް އެމްޑީޕީއަށް ކުރިމަތިލާން ޖެހޭނީ ނާކާމިޔާބީއާއި ކަމަށް އާޒިމް ވިދާޅުވި އެވެ.
"އެމްޑީޕީ އަނެއްކާވެސް ތިދަތީ ބަލިވަން. ބޮޑުތަނުން ބަލިވާން ތިދަނީ. އަޅުގަނޑުމެން އިރާދަކުރެއްވިއްޔާ މަޖިލީހުގއި ތިބެގެން ރައްޔިތުންގެ މަޖިލީހުގެ ރައީސް ވަކިކުރަން ތި ހުށައަޅާފައި އޮތް ހުށައެޅުން ބަލައިގަނެގެންނެއް ވަކިކުރެވޭނެ އެއްވެސް ގޮތެއް ނެތް. އެ ފުރުސަތެއް އަޅުގަނޑުމެނެއް ނުދޭނަން"
މެދުހެންވޭރު ދާއިރާގެ މެމްބަރު އަލީ އާޒިމް
އާޒިމް ވަނީ ޤާނޫނާއި ގަވައިދުތަކަށް ރުޖޫއަވުމަށް އެމްޑީޕީއަށް ގޮވާލައްވާފަ އެވެ. އަދި ރިޔާސީ އިންތިޚާބުން ބަލިވުމުން، އެ ބަލި ގަބޫލުކޮށް ކުރިއަށް ދިއުމަށް ވެސް އެމްޑީޕީއަށް ގޮވާލައްވާފަ އެވެ.
އޭނާ ވިދާޅުވީ ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައަޅައިގެން ކުރިއަށް ގެންދިއުމަށް އެމްޑީޕީން އަމަލުކުރަމުންދާ ގޮތް ގާތުން ބައްލަވަމުން ގެންދަވާކަމަށެވެ. އަދި އެމްޑީޕީއަށް އެމީހުންގެ މަގްސަދު ހާސިލްވިޔަ ނުދެއްވާނެ ކަމަށާއި، މަޖިލީހުގެ ރިޔާސަތުން ނަޝީދު ވަކިނުކުރެވޭނެ ކަމަށް ތަކުރާރުކޮށް އާޒިމް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
