މަޖިލީހުގެ ހިނގަމުންދާ ދައުރު ދިގުކުރަން ހުށައަޅައިފި

ރައްޔިތުންގެ މަޖިލީޙުގެ ހިނގަމުންމިދާ ތިން ވަނަ ދައުރު، ޑިސެމްބަރ 7 އާއި ހަމައަށް ދިގުކުރުމަށް، މަޖިުލީހުގެ ރައީސް، މުހައްމަދު އަސްލަމް ހުށަހަޅުއްވައިފި އެވެ.

މަޖިލީހުގެ މިއަދުގެ ޖަލްސާ ފަށްޓަވަމުން އަސްލަމް ވިދާޅުވީ، މި ހިނގަމުންދާ ދައުރު ނިމެން ކައިރިވެފައިވާއިރު، ދައުލަތުގެ ބަޖެޓް ފާސްކުރުން ހިމެނޭހެން މި ދައުރުގައި ނިންމަންޖެހޭ މުހިންމު ގިނަ ކަންކަން ނުނިމިވާ ކަމަށެވެ.

އެހެންކަމުން ކަމުން އަސްލަމް ވަނީ ހިނގަމުން މިދާ ދައުރު މިފެށޭ ޑިސެމްބަރ މަހުގެ 7 ވަނަ ދުވަހާއި ހަމައަށް ދިގުކުރުމަށް މިއަދު ވޯޓަށް އެހުމަށް ނިންމަވާފައިވާ ކަމަށް ވިދާޅުވެފައެވެ.

ރައްޔިތުންގެ މަޖިލީހުގެ ރައީސްގެ މަގާމުގައި ކުރިން ހުންނެވި މައްޗަންގޮޅީ މެދު ދާއިރާގެ މެންބަރު މުހައްމަދު ނަޝީދު އެ މަގާމުން ވަކި ކުރުމަށް މަޖިލީހުގެ މެޖޯރިޓީ ޕާޓީ، އެމްޑީޕީން ހުށަހެޅުމުން، މައްސަލަ ކުރިއަށް ނުގެންދެވި، މަޖިލީހުގެ އެހެން ކަންކަން ވެސް ކުރިއަށް ނުގެންދެވުގެ ސަބަބުން، ނަޝީދު އިސްތިޢުފާ ދެއްވަންދެން މަޖިލީސް އޮތީ ހުއްޓުމަކަށް އައިސްފައެވެ.

އޭގެ ނަތީޖާއެއްގެ ގޮތުން ބަޖެޓްގެ މަސައްކަތްވެސް ފެށުނީ ފަށަންޖެހޭ ތާރީޚަށްވުރެ ލަހުންނެވެ. އަދި އިއްޔެ ބަޖެޓުގެ ބަހުސް މަރުހަލާ ނިމިފައިވީ ނަމަވެސް ސަޕްލިމެންޓްރީ ބަޖެޓުގެ މަސައްކަތް ކުރަންޖެހުމާއިއެކު އެހެން މަސައްކަތްތައް އަނެއްކާވެސް ވަނީ ލަސްވެފަ އެވެ.

ބަޖެޓްގެ މައްސަލައިގެ އިތުރުން, އައު ސަރުކާރުގެ ކެބިނެޓްގައި ހިމެނޭ ވަޒީރުންނަށް ރުހުން ދިނުމުގެ މަސައްކަތާ، މަޖިލީހުގެ ރުހުން ބޭނުންވާ އެހެން މަގާމު ތަކުގެ މައްސަލަވެސް މިހާރު ވަނީ މަޖިލީހަށް ހުށަހެޅިފައެވެ. އެކަންކަން ކޮމިޓީ މަރުހަލާގައި އޮތްއިރު، އެ ނިންމައި ވޯޓަށް އެހުންވެސް މިދައުރުގައި ނިންމަން ޖެހެއެވެ.