ނޮވެމްބަރު 3 ގެ ހަމަލާގައި އިސްކޮށް އުޅުނު ބާޣީ ލުތުފީ މިނިވަންވެއްޖެ

1988 ވަނަ އަހަރު ގެ ނޮވެމްބަރު މަހުގެ ތިންވަނަ ދުވަހު ދިވެހި ރާއްޖެއަށް ދިން އުދުވާނީ ހަމަލާ ރާވައި ހިންގުމުގައި އެންމެ އިސްކޮށް އުޅުނު ހ. ހާޖަރާގޭ އަބްދުالله ލުތުފީ މިއަދު މިނިވަންވެއްޖެއެވެ.

ލުތުފީ މިނިވަންވެފައި މިވަނީ އޭނާގެ މައްޗަށް ދައުލަތުން އިއްވާފައިވާ ހުކުމްތައް ތަންފީޒުކޮށް ނިމުމުން ކަމަށް ކަރެކްޝަނަލް ސާވިސް އިން ބުންޏެވެ.

1988 ވަނަ އަހަރުގެ ނޮވެމްބަރު 3 ގެ ހަމަލާއާއި ގުޅިގެން ލުތުފީގެ މައްޗަށް ކޯޓުން މަރުގެ ހުކުމް ކުރިނަމަވެސް އޭރު ހުންނެވި ރައީސް މައުމޫން އަބްދުލް ގައްޔޫމް ވަނީ އަދަބު ލުއިކޮށްދެއްވައި 25 އަހަރުގެ ޖަލު ހުކުމަކަށް އެ ނިންމުން ބަދަލު ކޮށްފައެވެ.

25 އަހަރުގެ ޖަލު ހުކުމް މިއަހަރުގެ ޖޫން މަހު ތަންފީޒު ކޮށް ނިމިފައިވާއިރު، ފަހުން އޭނާ ތަންފީޒު ކުރަމުން ދިޔައީ ބަންދުގައި ހުއްޓާ ކުރީގެ ރައީސް މުޙައްމަދު ނަޝީދުގެ ވެރިކަމުގައި 16 ޖެނުއަރީ 2010 ގައި އެއް އަހަރު ދުވަހަށް އަމިއްލަ ޚަރަދުގައި ބޭސްފަރުވާއަށް އިންޑިއާއަށް ފޮނުވުމުން ފިލި މައްސަލައެވެ.

އެހެންނަމަވެސް އޭނާ ވަނީ 2019 ވަނަ އަހަރު ލަންކާގައި ދިން އީސްޓާ ބޮމުގެ ހަލަމާތަކާ ގުޅިގެން އެ ގައުމުގެ ސިފައިން ފެށި އޮޕަރޭޝަނާ އެކު، އޭނާ އަމިއްލައަށް ލަންކާގައި ހުންނަ ދިވެހި އެމްބަސީއާ 2019 ވަނަ އަހަރު ހަވާލުވެ، ރާއްޖެއަށް އަނބުރާ އައިސްފައެވެ. މި  މައްސަލާގައި 10 މާޗު 2021 ގައި ލުތުފީގެ މައްޗަށް 07 މަހާއި 18 ދުވަހުގެ ޖަލު ހުކުމެއް އިއްވިއެވެ.

ލުތުފީ މޭސްތިރިކަމުގެ ދަށުން ލަންކާގެ “ޕްލޮޓް“ ޖަމާއަތާއި ގުޅިގެން ނޮވެމްބަރު 3 ގައި ދިން ހަމަލާގައި 19 ދިވެހިން ޝަހީދުކޮށްލިއިރު އޭގެތެރޭގައި ސިފައިންގެ 08 ބޭކަލަކު ހިމެނެއެވެ. މި ހަމަލާ ދިނުމުގައި ދިވެހިންގެ ތެރެއިން ބައިވެރިވި ބާޣީންގެ ތެރޭގައި މ.ދީފުރަމްއާގޭ ސިއްކަ އަޙްމަދު އިސްމާޢީލް މަނިކު ވެސް ހިމެނެއެވެ.