ޑެންމާކު އަތުން ހަނިގޮތަކަށް މޮޅުވެ ގުރޫޕްގެ ޑީގެ އެއްވަނައަށް އިންގްލެންޑް!

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ގުރޫޕް ޑީގައި މިއަދު މެންދުރު ކުޅެވުނު މެޗުގައި ހަނިގޮތަކަށް ޑެންމާކް އަތުން މޮޅުވެ ގްރޫޕްގެ އެއްވަނަ މަގާމަށް އިންގްލެންޑުން ކުރިއަށް ޖެހިލައިފިއެވެ.

މި މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން އިންގްލެންޑުން މެޗު ޑޮމިނޭޓުކުރި އިރު، މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މި ލަނޑު މެޗު ފެށިގެން ހަވަނަ މިނެޓުގައި ކާމިޔާބުކޮށްދިނީ އެޓީމުގެ ޗެލްސީ ފޯވާޑް ލޮރެން ޖޭމްސް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ވެސް ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރީ އިންގްލެންޑް އިންނެވެ. ނަމަވެސް މިހާފުގައި ޑެންމާކްގެ ގޯލާއި އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއް ނުވެއެވެ. ނަމަވެސް މިހާފުގައި ޑެންމާކް އިން ވަނީ އެޓީމުގެ ކުޅުން ރަނގަޅުކޮށް ކައުންޓަ އެޓޭކުތަކުގައި ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

އެގޮތުން މިހާފުގައި އެޓީމުން އިންގްލެންޑްގެ ގޯލާއި އަމާޒުކޮށް ދެ ހަމަލާއެއް ފޮނުވާލި ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ދެ މެޗުން ހަ ޕޮއިންޓް ހަމަކޮށް ގުރޫޕް ޑީގެ އެއްވަނައިގައި މިވަގުތު އޮތީ އިންގްލެންޑް އެވެ. ދެވަނަގައި އޮތް ޑެންމާކް އަށް ތިން ޕޮއިންޓް ލިބިފައިވާއިރު މި ގުރޫޕްގައި ހިމެނޭ ހައިޓީ އަދި ޗައިނާ އަކަށް ޕޮއިންޓެއް ނުލިބެއެވެ.