އީވާގެ ދެވަނަ ބްލަޑް ރިޕޯޓެއް ހެއްދެވީވެސް ކިރިޔާވެސް ރަނގަޅުނަމަ މަޖިލީހަށް ވަޑައިގަތުމަށް: ޢާޒިމް

ރައްޔިތުންގެ މަޖިލީހުގެ ނާއިބު ރައީސް އީވާ އަބްދުالله، މިއަދުގެ މަޖިލީހުގެ ޖަލްސާއަށް ވަޑައިނުގެން ސަލާމް ފޮނުއްވުމުން ކުރެވެމުންދާ ތުހުމަތު ތަކާއި ފާޑުކިޔުންތަކަށް ދަ ޑިމޮކްރެޓްސް ގެ ޕީޖީ ލީޑަރު އަދި މެދު ހެންވޭރު ދާއިރާގެ މެންބަރު ޢަލީ ޢާޒިމް ރައްދު ދެއްވައިފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ  ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު މަޖިލީހަށް ހުށަހަޅައި އެމަނިކުފާނަށް 14 ދުވަހުގެ ނޯޓިސް ފޮނުވައި، ނޯޓިސްގެ މުއްދަތު ހަމަވުމާއިއެކު މިއަދު ވަނީއެ މައްސަލަ އެޖެންޑާ ކޮށްފައެވެ.

ނަމަވެސް މިއަދަށް އެ ޖަލްސާ އެޖެންޑާ ކުރި މައްސަލަ މަޖިލީހުގެ ނައިބު ރައީސާ އީވާ އާލާސްކަންފުޅާއި އުޅުއްވާތީ ކުރިއަށް ގެންދެވޭގޮތް ވަނީ ނުވެފައެވެ.

އެގޮތުން އެކަން ހާމަ ކުރައްވަމުން މަޖިލީހުގެ އަމީން އާއްމު ނިޔުޝާ ވިދާޅުވީ, މަޖިލީހުގެ ރައީސް މަޤާމުން ވަކިކުރުމަށް ބާއްވާ ބަހުސެއްގެ ރިޔާސަތު މަޖިލީހުގެ ރައީސް ބަލަހައްޓައިގެން ނުވާނެކަމަށާއި، އެފަދަ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތަކީ މަޖިލީހުގެ ނައިބު ރައީސާއި މަޖިލީހުގެ ގަވައިދުން ހަވާލުކޮށްފައިވާ މަސްއޫލިއްޔަތެއްކަމަށެވެ.

އަދި ރިޔާސަތު ބަލަހައްޓަވާދެއްވުމަށް މަޖިލީހުގެ ނައިބު ރައީސްއަށް އަންގާފައިވާނެކަމަށާ އެހެން ނަމަވެސް މަޖިލީހުގެ ނައިބު ރައީސް އާލާސްކަންފުޅާއި އުޅުއްވާކަން ބަޔާންކޮށް މިއަދު ބޭއްވުމަށް ހަމަޖެހިފައިވާ ޖަލްސާއަށް ސަލާން ފޮނުވާފައިވާތީ މިއަދު އެ ގަރާރަށް ބަހުސްކުރުން ކުރިއަށް ގެންދެވެން ނެތްކަމަށް މަޖިލީހުގެ އިދާރާއިން ވަނީ ހާމަކޮށްފަ އެވެ.

އެކަމާއި ގުޅިގެން އެމްޑީޕީ މެންބަރުން ވަނީ މަޖިލީހުގައި އިހްތިޖާޖު ކޮށް އަޑު އުފުލާފައެވެ. އަދި އިވާ ޑެންގޫ އަށް ޕޮޒިޓިވް ވީ ކަމަށް މިމަހުގެ 23 ވަނަ ދުވަހު ކަމަށް މަޖިލީހަށް އޭނާ ފޮނުއްވި ރިޕޯޓްގައި ލިޔެފައިވީ ނަމަވެސް، 24 ވަނަ ދުވަހުވެސް އޭނާ މަޖިލީހުގެ ރިޔާސަތު ބެލެހެއްޓެވި ކަމަަށް އެމްޑީޕީ މެންބަރުން ވަނީ ވިދާޅުވެފަ އެވެ.

އެވާހަކަތަކަށް ރައްދު ދެއްވައި ޢާޒިމް ކުރެއްވި ޓުވީޓެއްގައި ވިދާޅުވީ، މަޖުލީހުގެ ނައިބު ރައީސް ‎އީވާއަކީ އެންމެ މަދުން މަޖިލީހަށް ސަލާން ވިދާޅުވެފައިވާ އެއްބޭފުޅާ ކަމަށެވެ.

"ދެވަނަ ބްލަޑް ރިޕޯޓެއް ހެއްދެވީވެސް ކިރިޔާވެސް ރަނގަޅުނަމަ
މަޖިލީހަށް ވަޑައިގަތުމުގެ މަގްސަދުގައި." ޢާޒިމް ވިދާޅުވިއެވެ.

އީވާގެ ދެ މެޑިކަލް ރިޕޯޓްވެސް މަޖިލީހުގެ މެޖޯރިޓީ ލީޑަރ ‎މުހައްމަދު އަސްލަމް އަށް ފޮނުއްވާފައިވާ ކަމަށް އާޒިމް ފާހަގަކުރެއްވި އެވެ.