އެމްޖޭއެސް ރާބަދި ޗެލެންޖް؛ މީދުއްޕަރާއި ފާރުފުށި މެޗް އެއްވަރުވިއިރު، ޖޯލި ފެށުން ރަނގަޅުކޮށްފި

އެމްޖޭއެސް ރާބަދި ޗެލެންޖު ފެށުމުގެ ގޮތުން ރޭ ކުޅުނު މެޗް މީދުއްޕަރާއި އެމަރަލްޑް ފާރުފުށި އެއްވަރުވިއިރު، ޖޯލި ކުޅުނު މެޗް އެޓީމުން ކާމިޔާބުކޮށް މުބާރާތުގެ ފެށުން ރަނަގޅުކޮށްފިއެވެ.

މުބާރާތް ހުޅުވުމުގެ ގޮތުން ރޭ ދެމެޗް ކުޅުނުއިރު ފުރަތަމަ މެޗްގައި ބައްދަލުކުރީ، މީދުއްޕަރާއި އެމަރަލްޑް ފާރުފުށި ރިސޯޓެވެ. މިމެޗް ނިމުނީ 1-1 ގެ ނަތީޖާއިން ދެޓީމް އެއްވަރުވެގެންނެވެ. ވާދަވެރި ކުޅުމެއް ފެނިގެންދިޔަ މިމެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ މީދުއްޕަރެވެ. އެއީ މެޗްގެ 23 ވަނަ މިނެޓް ތެރޭގައި ނާޖިހް ތަނަވަސްކޮށްދިން ފުރުސަތެއްގައި ސާހީން ޖަހައިދިން ލަނޑުންނެވެ.

މީދުއްޕަރުން ލީޑް ނަގާފައިވަނިކޮށް ފާރުފުށިން ވަނީ އޭގެ ހަތަރުމިނެޓް ފަހުން ލަނޑެއް ޖަހައި މެޗްގެ ނަތީޖާ އެއްވަރުކޮށްފައެވެ. މި ލަނޑު ކާމިޔާބުކޮށްދިނީ، މުހައްމަދު އަލީފްއެވެ.

މިމެޗްގެ މޮޅު ކުޅުންތެރިޔާގެ މަގާމް ހޯދީ މީދުއްޕަރުގެ ސާހީންނެވެ.

މުބާރާތުގެ ދެވަނަ މެޗްގައި ޖޯލި ކުޅުނުމެޗް އެޓީމުން ކާމިޔާބުކުރީ އެމަރަލްޑް މޯލްޑިވްސް ރިސޯޓް އެންޑް ސްޕާއާ ދެކޮޅަށް ކުޅުނުމެޗް ކާމިޔާބުކޮށްގެންނެވެ. މިމެޗް ޖޯލި ކާމިޔާބުކުރީ 5-1 ގެ ނަތީޖާއަކުންނެވެ. މެޗްގައި އެންމެފުރަތަމަ ލަނޑެއް ޖަހައި ކުރި ހޯދީ އެމަރަލްޑުންނެވެ. އެއީ މެޗް ފަށައިގެން 13 ވަނަ މިނެޓް ތެރޭގައި މުހައްމަދު އިމްތިޔާޒް ކާމިޔާބުކޮށްދިން ލަނޑުންނެވެ.

މެޗްގައި ޖޯލިން އެއްވަރުކުރި ލަނޑު ޖަހައިދިނީ 32 ވަނަ މިނެޓް ތެރޭގައި އަލީ އިސާމެވެ. ޖޯއްޔަށް ލީޑް ނަގައިދިނީވެސް އިސާމެވެ. މެޗްގައި ދެން ޖޯއްޔަށް ލަނޑުތައް ޖަހައިދިނީ މޫސާ މުޒާހް އަދި މޫސާ ލަތީފެވެ. މެޗްގައި އިސާމް ވަނީ ތިން ލަނޑުޖަހައި މުބާރާތުގެ ފުރަތަމަ ހެޓްރިކް ހެދި ކުޅުންތެރިޔާގެ ޝަރަފް ހޯދާފައެވެ.

މިމެޗްގެ މޮޅު ކުޅުންތެރިޔާގެ މަގާމުވެސް ހޯދީ އިސާމެވެ. މޮޅުކުޅުންތެރިޔާގެ އެވޯޑް ހަވާލުކޮށްދެއްވީ ކުޅިވަރާބެހޭ ވަޒީރު ރާފިއުއެވެ.

މުބާރާތުގައި މިރޭވެސް މެޗްތައް ކުޅުމަށް ވަނީ ތާވަލްކޮށްފައެވެ. ފުރަތަމަ 21:00 ގައި ކުޅޭ މެޗްގައި ޖޯލި ނިކުންނާނީ ކޮތައިފަރާ ދެކޮޅަށެވެ. ދެވަނަ މެވްގައި ބައްދަލުކުރާނީ ދި ސްޓޭންޑަޑާއި ރާޔާ ބައި އެޓަމޯސްފިއާއެވެ. މިމެޗް ފަށާނީ 22:00 ގައެވެ. މި ހުރިހާ މެޗެއްވެސް ރާބަދި ފޭސްބުކް ޕޭޖުން ވަގުތުން ގެނެސްދޭނެއެވެ.