ރަމަޟާން މަހަށް ހުކުރުމިސްކިތު މުންނާރާއި މިސްކިތް ހިމެނޭ ސަރަހައްދު ޒީނަތްތެރި ކުރަނީ

ކުރިއަށް އޮތް ރަމަޟާން މަހަށް ހުކުރުމިސްކިތު މުންނާރާއި މިސްކިތް ހިމެނޭ ސަރަހައްދު ޒީނަތްތެރި ކުރުމުގެ މަސައްކަތް ކުރަމުން އަންނަކަމަށް ދިވެހިބަހާއި ސަޤާފަތާއި ތަރިކައާއި ބެހޭ ވުޒާރާއިން ހާމަކޮށްފިއެވެ.

އެވުޒާރާއިން ހާމަކުރެއްވި ގޮތުގައި މި މަސައްކަތަކީ ސްޓެލްކޯ ގެ އިޖްތިމާޢީ ޒިންމާގެ ދަށުން އެކުންފުނިން ކުރަމުން އަންނަ މަސައްކަތަކަށް ވާއިރު، މިއަހަރު ފަށާ މި ޚާއްޞަ މަސައްކަތުގެ ތެރޭގައި މުންނާރުގެ އިތުރުން ހުކުރު މިސްކިތުގެ ގޯތިތެރެ ސާފުކުރުމާއި އެތަނުގައި ހުރި ބައެއް އެހެނިހެން އާސާރުތަކުގެ އާބާތުރަ ފިލުވުމުގެ މަސައްކަތް ކުރުމަށް ވަނީ ހަމަޖެހިފައެވެ.

ދިވެހިބަހާއި ސަގާފަތާއި ތަރިކައާއި ބެހޭ ވުޒާރާއިން އިތުރަށް ހާމަ ކުރެއްވި ގޮތުގައި އެތަނުގައި ކުރަން ހުރި ބޮޑެތި މަސައްކަތްތަކުގެ ތެރޭގައި މުންނާރުގެ އެތެރެއާއި ބޭރަށް ލިބިފައިވާ ގެއްލުންތައް މަރާމާތުކޮށް އާބާތުރަ ފިލުވުމާއި، ހުކުރު މިސްކިތުގެ މަރާމާތުގެ މަސައްކަތް ކުރިން ކުރަމުން ދިޔަ ފަރާތުން އެތަނުގައި ބަހައްޓާފައި ހުރި ކޮންޓެއިނަރ ނެގުމާއި ކޮނެފައި ހުރި އުވަ ވަޅު ސާފުކޮށް ފަސްއެޅުން ފަދަ ކަންކަން ހިމެނެއެވެ. މި މަސައްކަތްތައް ކުރާނީ ސްޓެލްކޯގެ ޚާއްޞަ ފަންނީ ޓީމަކުންކަމަށްވެސް އެވުޒާރާއިން މަޢުލޫމަތު ދެއްވައެވެ.

ވިއްސާރަ އަލިވެ މޫސުން ރަނގަޅުވިހާ އަވަހަކަށް އެމަސައްކަތް ފެށުމަށް ތައްޔާރުވެފައިވާއިރު އެ ވުޒާރާގެ އުންމީދަކީ މިއަހަރުގެ ރަމަޟާން މަސްފެށެންވާއިރަށް މަސައްކަތް އެއްކޮށް ނިންމާލާ އާއްމުންނަށް ހުޅުވާލުމެވެ.

ދިވެހިބަހާއި ސަގާފަތާއި ތަރިކައާއި ބެހޭ ވުޒާރާއިން ހާމަކުރައްވާ ގޮތުގައި ރަމަޟާން މަހުގެ އިތުރުން ކުރިއަށްއޮތް ތަނުގައި ޢީދުފަދަ އިސްލާމީ އެކިއެކި މުނާސަބަތުތައް ފާހަގަކުރުމަށް އެރަޙައްދު ސާފުކޮށް ޒީނަތްތެރިކުރުމުގެ ކަންކަން މެދުނުކެނޑި ކުރިއަށް ގެންދިއުމަށް ހަމަޖައްސާފައިވެއެވެ.

މި މަސައްކަތް ވިލަރެސްކުރުމުގައި އެންމެ އިސްކޮށް ޙަރަކާތްތެރިވެލައްވަނީ ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމާއި ސްޓެލްކޯ ގެ މެނޭޖިންގ ޑިރެކްޓަރ ޙުސައިން ފަހުމީ ގެ އިތުރުން ދެ މުއައްސަސާގެ ކަމާބެހޭ އިސްވެރިންނެވެ. މީގެ އިތުރުން ސިޓީ ކައުންސިލާއި އެމް.އެން.ޑީއެފް ފަދަ މުއައްސަސާތަކުގެ ފަންނީ ބޭފުޅުން މި މަސައްކަތް ވިލަރެސް ކުރުމަށް އެކުލަވާލާ ކޮމެޓީގައި ހިމެނިފައިވާކަމަށް ދިވެހިބަހާއި ސަގާފަތާއި ތަރިކައާއި ބެހޭ ވުޒާރާއިން ހާމަކުރައްވައެވެ.