ތަޖިކިސްތާނު އަތުން ބަލިވެ، ގްރޫޕްގެ އެންމެ ފުލުގައި ރާއްޖެ

އޭޝިއަން ކަޕް ކޮލިފައިންގައި މިއަދު ހަވީރު ތަޖިކިސްތާނާ ދިވެހިރާއްޖެ ބައްދަލުކުރިމެޗް ތަޖިކިސްތާނުން ކާމިޔާބުކޮށްފިއެވެ.

ގަލޮޅު ދަނޑު ދިވެހި ސަޕޯޓަރުންގެ ކުރިމަތީގައި ކުޅުނު މިމެޗުން ދިވެހިން ބަލިވީ 0-3 ގެ ނަތީޖާއަކުންނެވެ. ތަޖިކިސްތާނުން މޮޅަށް ކުޅުނު މިމެޗްގައި އެޓީމުން ވަނީ މެޗް ފަށައިގެން ހަތަރުވަނަ މިނެޓް ތެރޭގައި ތަޖިކިސްތާނުން ވަނީ ލީޑް ނަގާފައެވެ. މި ލަނޑު ކާމިޔާބުކޮށްދިނީ ސަފަރޯވް އެވެ.

މެޗްގައި ތަޖިކިސްތާނުން ޖެހި ދެވަނަ ލަނޑު ކާމިޔާބުކޮށްދިނީ 34 ވަނަ މިނެޓް ތެރޭގައި ޝެރްވޮނީ އެވެ. އަދި ތިންވަނަ ލަނޑު ކާމިޔާބުކޮށްދިނީވެސް ޝެރްވޮނީއެވެ. މިމެޗްގައި ރާއްޖޭގެ ކުޅުންތެރިންނަށްވެސް ވަނީ ލަނޑުޖަހާނެ ފުރުސަތުތައް ލިބިފައެވެ. މިގޮތުން އެންމެ ނުރައްކާތެރި އެއް ހަމަލާއަކީ އައިހަމް ހުރަސްދަނޑިމަތިން ފޮނުވާލި ބޯޅައެވެ.

އޭއެފްސީ އޭޝިއަން ކަޕް ކޮލިފައިންގައި ރާއްޖެ ތަޖިކިސްތާނުގައި ކުޅުނުމެޗް އެޓީމުން ކާމިޔާބުކުރީ ދޭއް ސުމެއްގެ ނަތީޖާއަކުންނެވެ.

މެޗަށްފަހު މި ގްރޫޕްގެ އެއްވަނާގައި 10 ޕޮއިންޓާއެކު އުޅެނީ ތަޖިކިސްތާނެވެ. ދެވަނާގައި 6 ޕޮއިންޓާއެކު ފިލިޕީންސް އޮތްއިރު ތިންވަނާގައި އޮތީ 3 ޕޮއިންޓާއެކު ޓިމޯލެސްޓޭ އެވެ. އެންމެ ފުލުގައި ރާއްޖެ އޮތީ އެއްވެސް ޕޮއިންޓެއް ނުލިބިއެވެ.

މިއަދުގެ މެޗަކީ ވޭތުވެދިޔަ ދެ އަހަރުދުވަހުގެ ތެރޭގައި ގަލޮޅު ދަނޑުގައި ރާއްޖޭގެ ޤައުމީޓީމް ކުޅުނު ފުރަތަމަ މެޗެވެ.