ކިޔަވައިދިނުމުގެ ދާއިރާގެ ކޯސްތައް އޮންލައިންކޮށް ހިންގޭ ގޮތައް ނިންމީ ރަނގަޅަށް: ސްޕްރީމް ކޯޓް

ކިޔަވައިދިނުމުގެ ދާއިރާގެ ކޯސްތައް އޮންލައިންކޮށް ހިންގޭގޮތައް ހައިކޯޓުން ނިންމައިފައިވަނީ ރަނގަޅަށް ކަމަށް ސްޕްރީމް ކޯޓުން ބުނެފިއެވެ.

ކިޔަވައިދިނުމުގެ ދާއިރާގެ ކޯސްތައް އޮންލައިން ކޮށް ކިޔަވައި ނުދެވޭ ގޮތަށް މޯލްޑިވްސް ކޮލިފިކޭޝަން އޮތޯރިޓީ (އެމްކިޔުއޭ) އިން މިދިޔަ އަހަރު ގައިޑްލައިނެއް ހެދިއެވެ.

އެ ގައިޑްލައިންގެ އެ ބައި ބާތިލްކުރަން މާލޭގައި ހިންގާ މަންދު ކޮލެޖް ހިންގާ މާލެ ހައި ކުންފުނިން ހައި ކޯޓަށް ހުށަހެޅި އެވެ. އަދި މައްސަލަ ނިމެންދެން ޓީޗިން ދާއިރާގެ ކޯސްތައް އޮންލައިންކޮށް ނުކިޔެވޭނެ ކަމަށް އެ ގައިޑްލައިންގައި އޮތް ބަޔަށް އަމަލުކުރުން ފަސް ކުރަން ހައި ކޯޓުން އަމުރުކުރި އެވެ.

ހައިކޯޓުގެ އެޙުކުމާއި އެކު ދައުލަތުން ވަނީ އެމައްސަލަ އިސްތިއުނާފް ކުުރުމަށް ވަނީ ސްޕްރީމް ކޯޓަށް ހުށައަޅައިފައެވެ. އެމައްސަލައިގެ އަޑުއެހުމެއް އިއްޔެ ބާއްވައިފައިވާއިރު އެ އަޑުއެހުމުގައި ސްޕްރީމް ކޯޓުން ކުރި ޙުކުމްގައި ބުނެފައިވަނީ ވަގުތީ އަމުރު ނުނެރެފިނަމަ ޓީޗިން ދާއިރާއިން އޮންލައިންކޮށް ކިޔަވަން އެދޭ ދަރިވަރުންނަށް ފުރުސަތު ގެއްލި، މަންދު ކޮލެޖަށް އިއާދަ ނުކުރެވޭނެ ގެއްލުންތަކެއް ލިބިދާނެ ކަމަށެވެ.

އަދި އެކަމަކީ ގިނަ އަދަދެއްގެ ދަރިވަރުންގެ މަސްލަހަތު ހިމެނޭ ކަމެއް ކަމަށްވާތީ ވަގުތީ އަމުރެއް ނެރުމަކީ އެ ދަރިވަރުންގެ މަސްލަހަތުގައި ވެސް ކުރަންޖެހޭ ކަމެއް ކަމަށް ސްޕްރީމް ކޯޓުގެ ޙުކުމްގައި ބުނެފައިވެ އެވެ.

ވަގުތީ އަމުރު ނުނެރެފިނަމަ މަންދު ކޮލެޖަށް ލިބޭނެ ގެއްލުން އަންދާޒާ ނުކުރެވޭއިރު، އެ އަމުރު ނެރުނަސް ދައުލަތަށް ލިބޭނެ ގެއްލުމަކީ ކޮބައިކަން ބުނެދެވިފައިނުވާ ކަމަށް ޙުކުމުގައިވެ އެވެ. އެހެންވެ، ހައި ކޯޓުން ގޮތެއް ނިމެންދެން އެ ވަގުތީ އަމުރު ދަމަހައްޓަން ޖެހޭ ކަމަށް ޙުކުމުގައިވެ އެވެ.

ސުޕްރީމް ކޯޓުން އެ މައްސަލަ ބެއްލެވީ ފަނޑިޔާރު އަލީ ރަޝީދު ހުސައިނާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު ހުސްނުއްސުއޫދެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު އަލީ ރަޝީދެވެ.

މިދިޔަ އަހަރު އެމެކިޔުއޭ އިން ހެދި ގައިޑްލައިންގެ ދަށުން ޓީޗިންގެ އިތުރުން ޑޮކްޓަރު ކަމުގެ ކޯހާއި ޑެންޓިސްޓްރީ ކޯހާއި މަސައްކަތްކުރުމަށް ހާއްސަ ލައިސެންސެއް ބޭނުންވާ ހެލްތު ސައިންސަސް ކޯހާއި ނާސިން ކޯހާއި ޤުރުއާން އަދި އެއާ ގުޅޭ ދާއިރާތަކާއި ޓެކްނިކަލް އަދި ވޮކޭޝަނަލް ތަޢުލީމާއި އަދި މިނޫންވެސް ދާއިރާތަކުގެ ކޯސްތައް އޮންލައިން ކޮށް ކިޔަވައިނުދެވޭނެ ގޮތަަައް ވަނީ ބަދަލުކޮށްފައެެވެ.