އާގިލްގެ މަރުގެ މައްސަލައިގެ ޚުލާސާ ބަޔާން އިއްވައިފި

ތޫނު އެއްޗަކުން ހަމަލާދީ ގދ. ފަރެސްމާތޮޑާ، ކޮކާ، އިބްރާހިމް އާގިލް މަރާލި މައްސަލައިގެ ޚުލާސާ ބަޔާން ކްރިމިނަލް ކޯޓުން މިއަދު އިއްވައިފިއެވެ.

އާގިލްގެ މަރުގެ މައްސަލައިގައި ދައުލަތުން ދައުވާ އުފުލާފައިވަނީ ލ. ފޮނަދޫ، ހިޔާ، ޙަމްދޫން ހަމްޒަތާއި، ސ. ހިތަދޫ، ސްވޭހުހީނާގެ، އަލީ މިޖުވާދު މާލިކްގެ އިތުރުން، ހއ. ދިއްދޫ ސްނޯބާޑް، އިބްރާހިމް ވިޝާމްގެ މައްޗަށެވެ.

ޙަމްދޫން ހަމްޒަތާއި އަލީ މިޖުވާދު މާލިކްގެ މައްޗަށް ތޫނު އެއްޗެއް ބޭނުންކޮށްގެން ގަސްތުގައި މީހާކު މެރުމުގެ ދައުވާ އުފުލާފައިވާއިރު އިބްރާހިމް ވިޝާމްގެ ގެ މައްޗަށް ކޮށްފައިވަނީ ތޫނު އެއްޗެއް ނުވަތަ ނުރައްކާތެރި ހަތިޔާރެއް ބޭނުންކޮށްގެން ގަސްތުގައި މީހަކު މެރުމުގައި އެހީތެރިވުމުގެ ދައުވާއެވެ.

ދައުލަތުން ޚުލާސާ ބަޔާން އިއްވުމަށްފަހު، ދެން ކުރިއަށް ދިޔައީ ދިފާއުން ޚުލާސާ ބަޔާން އިއްވުމެވެ. ދެން އޮންނާނީ މި މައްސަލަ ދައުވާ އުފުލުނު މީހުންގެ މައްޗަށް ކުށްކުރިކަން ސާބިތުވޭތޯ ނުވަތަ ނޫންތޯ ކަނޑައެޅުމާއި ޙުކުމް ކުރެއްވުމެވެ.

އާގިލް މަރާލާފައި ވަނީ 2018 ވަނަ އަހަރުގެ އޮގަސްޓް މަހުގެ 31 ވަނަ ދުވަހުގެ ރޭ އެމްއެމްއޭ ސަރަހައްދުގައި އޭނާގެ ކަރަށް ވަޅިން ހަމަލާދީގެންނެވެ.