އެފްއޭއެމް އިން މާލީ ލިޔުން ބަލަހައްޓާފައި ހުރީ އެކަން ކުރަން ޖެހޭ ގޮތަކަށް ނޫން: ޕީޖީ

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ރައީސް ބައްސާމް އަދީލް ޖަލީލާއި އެއިދާރާގެ އެހެން ވެރިންނަށްވެސް ދައުވާ ކުރެވޭ ވަރަށް ހެކި ލިބޭނެ ކަމަށް ޕްރޮސެކިއުޓާ ޖެނެރަލް (ޕީޖީ) ހުސައިން ޝަމީމް ވިދާޅުވެއްޖެއެވެ.

ޕީޖީ ޝަމީމް މިފަދައިން ވިދާޅުވީ މިއަދު ޕްރޮސެކިއުޓާ ޖެނެރަލްގެ އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

އެފްއޭއެމްގެ މައްސަލައިގައި މިހާތަނަށް ވަރަށް ގިނަ މައުލޫމާތު ލިބިފައިވާ ކަމަށާާއި އޭގެ ތެރޭގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ފަރާތުން ލިބޭ މައުލޫމާތު ހިމެނޭކަމަށް ޕީޖީ އޮފީހުން ބުންޏެވެ. އަދި މައްސަލައިގެ ތަހުގީގު ފުލުހުން ކުރަމުން އަންނައިރު، ތަހުގީގަށްވެސް ބޮޑެތި ކުރިއެރުންތަކެއް ލިބިފައިވާކަން ވެސް އެ އިދާރާއިން ފާހަގަ ކުރިއެވެ.

"އަޅުގަނޑުމެން މި އުންމީދު ކުރަނީ ކުރިއަށް އޮތް ހަފްތާއެއް ދެ ހަފްތާއެއް ތެރޭގައި އެ މައްސަަލައިގައި ވެސް ކޯޓަށް މައްސަލައެއް ވެއްދޭ ވަރަށް އަޅުގަނޑުމެންނަށް ހެކި ހޯދިދާނެ ކަމަށް، އެއީ އަޅުގަނޑުމެންގެ އުންމީދަކީ، މި މައްސަލަ ބާރަށް ކުރިއަށް އެބަދޭ،"

ޝަމީމް ވިދާޅުވި އެވެ.

އެ އިދާރާގެ ރައީސް ބައްސާމް އަދީލް ޖަލީލަކީ އެންމެ އިސްކޮށް ތުހުމަތުކުރެވޭ ފަރާތް ކަމަށާއި މައްސަލަ ދައުވާ ކުރަން ފޮނުވާނެ ކަމަށްވެސް ޕީޖީ ޝަމީމް ވަނީ ވިދާޅުވެފައެވެ.

އިތުރަށް ޕީޖީ އޮފީހުން ބުނީ އެފްއޭއެމް އިން މާލީ ކަންކަމުގައި ލިޔުން ބަލަހައްޓާފައި ހުރީ އާންމު ގޮތެއްގައި އެކަން ކުރަން ޖެހޭނެ ގޮތަކަށް ނޫން ކަމަށްވާތީ ފައިނޭންޝިއަލް ކްރައިމާ ގުޅޭ މި ކަހަލަ މައްސަލަތަކުގައި ކަންކަން ހޯދަން، ވަގުތު ނަގާނެ ކަމަށެވެ.

ފުލުހުން ވަނީ މިދިޔަ މަހުގެ 22 ވަނަ ދުވަހު އެފްއޭއެމަށްވަނީ ވަދެ އެ އިދާރާގެ ގިނަ އަދަދެއްގެ ލިޔެކިޔުމާއި، ސާވާ ބެކަޕް އަދި ހާޑް ޑިސްކުތަކެއް ގެންގޮސްފަ އެވެ.

ދުނިޔޭގެ ފުޓުބޯޅަ ފެޑެރޭޝަން (ފީފާ) އިން ފޮނުވާ ފައިސާ ނަހަމަ ގޮތުގައި ބޭންކުރާ ކަމަށް ކުރެވޭ ތުހުމަތުތަކާ ގުޅިގެން މީގެ ކުރިން އެފްއޭއެމް އިން ނެރުނު ބާޔާނެއްގައި ބުނެފައިވަނީ އެފްއޭއެމަށް ލިބިފައިވާ އެއްވެސް ފައިސާއަކަށް އެއިދާރާއަށް ނިސްބަތްވާ އެއްވެސް ފަރާތަކުން ހިޔާނާތްތެރިވެފައި ނުވާނެ ކަމަށާއި، މިއީ ޒާތީ ބޭނުމަށް ހާލަތުގެ ފައިދާ ނެގުމުގެ ގޮތުން ބަޔަކު ކޮށްގެން އުޅޭކަމެއް ކަމަށެވެ.