އަންހެނުންނަށް ކުރާ އަނިޔާ ތަކާއި ދެކޮޅަށް ޢާޒިމާގެ ޚާއްސަ ފޯރަމެއް!

"ބައިނަލްއަގުވާމީ އަންހެނުންނަށް ކުރާ އަނިޔާ އާއި ދެކޮޅަށް މަސައްކަތް ކުރާ ދުވަސް" ފާހަގަކުރެއްވުމުގެ ގޮތުން، މާލެ ސިޓީ މޭޔަރ ކަމަށް ޕީޕީއެމް/ޕީއެންސީގެ ފަރާތުން ވާދަކުރައްވާ، ކުރީގެ ބަންޑާރަނައިބް އައިޝަތު ޢާޒިމާ ޝަކޫރުގެ ޚާއްސަ ފޯރަމެއް ބާއްވައިފިއެވެ.

ގިނަ އަދަދެއްގެ ކަނބަލުން ބައިވެރިވެވަޑައިގެންނެވި މި ފޯރަމްގައި، ނާއިބު ރައީސް ހުސައިން މުހައްމަދު ލަތީފް ގެ އަނބިކަނބަލުންނާއި، ސަރުކާރުގެ އިސް ބައެއް މަގާމުތައް ފުރުއްވަމުންދާ ކަންބަލުންނާއި، އަންހެނުންގެ ހައްގުގައި މަސައްކަތް ކުރާ ޖަމިއްޔާ ތަކުގެ ބޭފުޅުންވެސް ވަނީ ބައިވެރިވެވަޑައިގެންފައެވެ.

މިފޯރަމްގެ ތެރެއިން ފޯރަމްގެ ބައެއް ބައިވެރިން ވަނީ، އެ ފަރާތްތަކަށް، ހަޔާތުގެ މިހާތަނަށް، ގާތްތިމާގެ މީހުންނާއި، އެނޫންވެސް މީހުންގެ ފަރާތުން ލިބިފައިވާ އަނިޔާ ތަކާއި، އޭގެ ސަބަބުން ދިރިއުޅުމާއިގެނާ ކުރިއަށް ދިޔުމަށް ކުރިމަތިވި ގޮންޖެހުންތަކާއި، އެކަންކަމާއި ދެކޮޅަށް ތެދުވެ، އެކަން ކަމުން އަރައިގަތުމަށް ކުރި މަސައްކަތާއި ލިބުނު ކާމިޔާބީ ހިއްސާކޮށްފައެވެ.

މީގެ އިތުރުން، ޢާޒިމާ ވަނީ، އަންހެނުންނަށް ކުރާ އަނިޔާ ތަކާއި، އެކަންކަމާއި ދެކޮޅަށް ތެދުވެ، ދިރިއުޅުމާއިގެން ކުރިއަށް ދިޔުމަށް ކަނބަލުންނަށް ކުރެވޭނެ ކަންކަމަށް އަލިއަޅުވާ ލައްވައި، އެފަދަ އަނިޔާ އާއި ދެކޮޅަށް ތެދުވެ ސާބިތު ކަމާއިއެކު ހުރުމަށް ކަނބަލުންނަށް ހިތްވަރު ދެއްވާފައެވެ.

ޢާޒިމާ އަކީ އަންހެނުން ބާރުވެރި ކުރުވުމާއި، އަންހެނުންގެ ހައްގުތައް ކަށަވަރު ކޮށްދީ، ކަނބަލުންނަށް ލިބޭ އަނިޔާ އިން ސަލާމަތްކޮށްދިނުމަށް ހިލޭ ސާބަހަށްވެސް ވަކާލާތު ކޮށްދެއްވާ ބޭފުޅެއް ކަން ފާހަގަކޮށްލަންޖެހެއެވެ.

މާލެ ސިޓީގެ މޭޔަރ ކަމުގެ މަގާމަށް މިހާތަނަށް ވާދަކުރައްވާނެ ކަން އިއުލާން ކުރައްވާފައިވާ ބޭފުޅުންގެ ތެރެއިންވެސް، ހުރި ހަމައެކަނި އަންހެން ކަނބަލަކީ އާޒިމާކަމަށް ވާއިރު، މޭޔަރ ކަމަށް އިންތިޚާބުވެވަޑައިގެންފި ނަމަ، މާލެސިޓީގެ ކަނބަލުންނަށް އުފާވެރި، އަދި ތަނަވަސް ދިރިއުޅުމެއް މަގުފަހި ކޮށްދެވުމަށް މަސައްކަތް ކުރައްވާނެ ކަމަށް އޭނާ ވިދާޅުވެއެވެ.