އިންޑިއާގެ ތިން ސަރަހައްދަކަށް ހަމަލާދޭ ކަމަށް ބުނެ އިންޑިއާ މީޑިއާއިން ފަތުރަނީ ދޮގު: ޕާކިސްތާން

ޕާކިސްތާނުން އިންޑިއާގެ ތިން ސަރަހައްދަކަށް ހަމަލާތައް ދެމުންދާ ކަމަށް ބުނެ އިންޑިއާގެ މީޑިއާތަކުން ފަތުރަމުން ދަނީ އެއްވެސް އަސާސެއް ނެތް ދޮގު ވާހަކަތަކެއް ކަމަށާ އިންޑިއާގެ މީޑިއާތަކުން ފަތުރާ އެފަދަ ދޮގު ޕްރޮގެންޑާތައް ވަރަށް ބޮޑަށް ކުށްވެރި ކުރާ ކަމަށް ޕާކިސްތާނުން ބުނެފި އެވެ.

ޕާކިސްތާނުގެ ފޮރިން މިނިސްޓްރީން ބުނީ އިންޑިއާގެ ކޮންޓްރޯލްގެ ދަށުގައި އޮތް ކަޝްމީރުގެ ތިން ސަރަހައްދަކަށް ޕާކިސްތާނުގެ އަސްކަރިއްޔާ އިން ހަމަލާ ދެމުން ގެންދާ ކަމަށް ބުނެ އިންޑިއާގެ މީޑިއާތަކުން ދޮގު ހަބަރުތަކެއް ފަތުރަމުންދާ ކަމަށާ އެއީ ޕާކިސްތާނު ބަދުނާމު ކުރުމަށް ރޭވިގެން ހިންގާ ޒިންމާދާރުކަން ކުޑަ އަމަލެއް ކަމަށެވެ.

އެކަން ވަރަށް ބޮޑަށް ކުށްވެރިކޮށް ޕާކިސްތާނުގެ ފޮރިން މިނިސްޓްރީން ބުނީ އިތުބާރު ހުރި އެއްވެސް މައުލޫމާތެއް ނުހިމަނާ އަދި އެކަށީގެންވާ އެއްވެސް އަސާސެއް ނެތި ޕާކިސްތާނާ ދެކޮޅަށް މިފަދަ ވާހަކަތައް ފެތުރުމުން ދައްކައިދެނީ އިންޑިއާއިން އިސްވެ ދޭން ފެށި ހަމަލާތައް އިތުރުކޮށް ހަމަނުޖެހުން ބޮޑުކުރުން އެ ގައުމުން ގެންގުޅޭ ސްޓްރެޓެޖީ ކަމަށެވެ. މިފަދަ އަމަލުތަކުގެ ސަބަބުން ސަރަހައްދީ ސުލްހައަށް ހުރަސް އެޅި ނުރައްކާ ބޮޑުވެގެންދާ ކަމަށް ވިދާޅުވި އެވެ.

އިންޑިއާގެ އެ އަމަލުތައް ހުއްޓުވަން ނަސޭހަތްތެރިތެރިވުމަށް ބައިނަލްއަގްވާމީ ދުނިޔެއަށް ޕާކިސްތާނުން ބުނެ އެވެ. ޕާކިސްތާނުން ބުނީ އެ ގައުމުން އަބަދުވެސް އިސްކަން ދޭނީ ސުލްހައަށް ކަމަށާ ނަމަވެސް އެ ގައުމަށް ބިރު ދައްކާ އެ ގައުމާއި ގުޅޭ ދޮގު ވާހަކަތަކުން ޕާކިސްތާން ފަހަތަށް ނުޖެއްސޭނެ ކަމަށެވެ. އަދި އިންޑިއާގެ ހަމަލާތަކަށް ރައްދު ދިނުމުގެ ހައްގާއި ގާބިލްކަން ލިބިފައިވާ ކަމަށް ވެސް ޕާކިސްތާނުން ބުންޏެވެ.

މައްސަލައިގެ ފެށުން

އިންޑިއާ-ޕާކިސްތާނުގެ ގުޅުން މި ފަހަރު ހީނަރުވެ ހަނގުރާމައެއް ފެށުމުގެ ހާލަތަށް ދިޔައީ މިދިޔަ މަހުގެ ފަހު ހަފްތާގައި ކަޝްމީރުގެ އިންޑިއާ ފަޅީގެ ޕަހަލްގަމްގައި ދިން ޓެރަރިސްޓް ހަމަލާތަކަކާއި ގުޅިގެންނެވެ. އިންޑިއާ ބަޔަކު ހިމެނޭހެން 27 މީހަކު މަރުވި މި ހަމަލާތަކުގެ ޒިންމާ އިންޑިއާ އިން ވަނީ ޕާކިސްތާނުގެ ބޮލުގައި އަޅުވާފަ އެވެ.

މި ހަމަލާއާ ގުޅިގެން އިސްވެ އިންޑިއާ އިން ވަނީ ޕާކިސްތާނަށް ހަމަލާ ދީފަ އެވެ. އެ ހަަމަލާތަކުގައި ޕާކިސްތާނުގެ އާންމުންތަކެއް މަރުވި އެވެ. އެހެން ކަމުން ބަދަލު ހިފުމުގެ ހަމަލާތަކެއް ޕާކިސްތާނުން ވެސް ވަނީ ދީފަ އެވެ. އެ ހަމަލާތަކުގައި އިންޑިއާގެ ބަޔަކު މަރުވި އެވެ. އަދި އިންޑިއާގެ އަސްކަރީ ބައެއް އުޅަނދުތަކަށް ހަމަލާދީ ވައްޓާލި އެވެ.

ހަމަލާތަކުގައި ޕާކިސްތާނުން 31 އަދި އިންޑިއާއިން 13 މަރު

ޕާކިސްތާނުން ބުނީ އިންޑިއާގެ ހަމަލާތަކުގައި ޕާކިސްތާނުގެ އާންމުންގެ 31 މީހަކު މަރުވެފައިވާ ކަމަށެވެ.

އަދި އިންޑިއާއިން ބުނާ ގޮތުން ޕާކިސްތާނުގެ ހަމަލާތަކުގައި އިންޑިއާގެ 13 މީހުން މަރުވެފައިވެ އެވެ. އޭގެ ތެރޭގައި ސިފައިންގެ މީހަކު ވެސް ހިމެނެ އެވެ.

ހަމަނުޖެހުންތައް އަވަހަށް ހުއްޓާލާ ދެ ގައުމު ސުލްހަވުމަށް ދުނިޔޭގެ ބޮޑެތި ގައުމުތަކުން ދަނީ ގޮވާލަމުންނެވެ. ހަތިޔާރުގެ މުއްސަދިކަން އޮތް ދުނިޔޭގެ މި ބާރު ހަނގުރާމައަކަށް ދިއުމަކީ ހުރިހާ ގައުމަކަށް އަސަރު ކުރާނެ ކަމެކެވެ.