ގައުމަށް ރަންވަނަ ތަކެއް ހޯދައިދީފައިވާ ތަރިއެއް، މިއަދު އެދެނީ ދިވެހިންގެ ދީލަތި އެހީއެއް

މިސްޓަ މޯލްޑިވްސްގެ މަގާމުގައި މިވަގުތު ހުރި އަދި އެމަގާމު ހަތަރު ފަހަރަށް ހޯދާފައިވާ މުހައްމަދު ޔާމީން (ޔާންބެ)ގެ ދެ ކިޑްނީ ފެއިލްވެ އޭނާ އެކަމުގެ ފަރުވާއަށް އާއްމުންގެ އެހީއަށް އެދިއްޖެ އެވެ.

ރާއްޖޭގެ އިތުރުން ބައިނަލްއަގުވާމީ ކުޅިވަރުގެ މައިދާނުގައި ދިވެހިރާއްޖެއަށް ފަޚުރުވެރި ގިނަ ކާމިޔާބީތަކެއް ހޯދައިދީފައިވާ ޔާންބެގެ ކިޑްނީ މައްސަލަ އުޅޭކަން އެގުނީ އުނދަގޫތަކެއްވާތީ، މީގެ މަހެއްހާ ދުވަސް ކުރިން ޑޮކްޓަރަށް ދެއްކުމަށްފަހު ހެދި ލޭގެ ޓެސްޓަކުންނެވެ.

ޔާންބެގެ ދެ ކިޑްނީ ފެއިލް ވެފައިވާއިރު، އޭނާ މިވަގުތު މަސައްކަތްކުރަމުން އަންނަނީ ޑޮކްޓަރުންގެ ލަފާގެ މަތިން ކިޑްނީ ޓްރާންސްޕްލާންޓް ހަދަންށެވެ. އަދި މިކަމަކީ ގިނަ އަދަދެއްގެ ފައިސާ ބޭނުންވާ ކަމަކަށްވާތީވެ އެނާ ވަނީ މިކަމުގައި އާންމުންގެ އެހީތެރިކަމަށް އެދިފައެވެ. އަދި ޔާންބެގެ އުފަން ރަށް ށ. ފުނަދޫގެ ބަޔަކު އިސްވެ މިއަދު ވަނީ ފަންޑްރައިޒިން ޕްރޮގްރަމެއް ފަށައިފައެވެ.

2017 ވަނަ އަހަރު ފުރަތަމަ ފަހަރަށް މިސްޓަރ މޯލްޑިވްސްގެ މަގާމު ހޯދި ޔާންބެ ވަނީ 2021، 2022 އަދި 2023 ވަނަ އަހަރާއެކު ހަތަރު ފަހަރަށް މިސްޓަރ މޯލްޑިވްސްގެ މަގާމު ހޯދާފައެވެ. އަދި މީގެ އިތުރުން 2023 ވަނަ އަހަރުގެ އޭޝިއަން ބޮޑީބިލްޑިން އަދި ފިޒީކް ސްޕޯޓްސް ޗެމްޕިއަންޝިޕުގެ 85 ކިލޯގެ ކެޓަގަރީން ރަން މެޑަލް ހޯދުމުގެ އިތުރުން 2022 ވަނަ އަހަރު ބޮޑީ ބިލްޑިން ވޯލްޑް ޗެމްޕިއަންޝިޕްގެ ސުޕަ 90 ކިލޯގެ ކެޓަގަރީގެ ފައިނަލުގައި ވާދަކޮށް ލޯ މެޑަލް ހޯދައިފަ އެވެ.