އޭޝިއަން ކެރަމް ޗެމްޕިއަންޝިޕް އަންނަ މަހު މާލޭގައި

އޭޝިއާގެ އެންމެ ވަރުގަދަ ކެރަމް މުބާރާތް 6 ވަނަ އޭޝިއަން ކެރަމް ޗެމްޕިއަންޝިޕް 2024, އެޕްރިލް މަހުގެ 27 ވަނަ ދުވަހު ރާއްޖޭގައި ބޭއްވުމުގެ އެންމެ ފަހުގެ ތައްޔާރީތައް ކުރިއަށްދާ ކަމަށް ކެރަމް އެސޯސިއޭޝަން އޮފް މޯލްޑިވްސް (ކޭމް) އިން ހާމަކޮށްފި އެވެ.

މިއީ މިމުބާރާތް 2013 ގެ ފަހުން ދެކުނު އޭޝިއާ ސަރަހައްދުގައި ބާއްވާ ފުރަތަަމަ ފަހަރެވެ. އެންމެ ފަހުން މިސަރަހައްދުގެ ގައުމެއްގައި މިމުބާރާތް ބާއްވާފައިވަނީ މީގެ 10 ވަރަށް އަހަރު ކުރިން އިންޑިއާގެ ކަލްކަތާގައެވެ.

މިމުބާރާތާއި ބެހެގޮތުން މައުލޫމާތު ދެއްވަމުން ސޯޝަލް ސެންޓަރުގައި މިއަދު ބޭއްވި ނޫސްވެރިންގެ ބައްދަލުވުމުގައި ކެރަމް އެސޯސިއޭޝަންގެ އިސް ވެރިންނާއި ކުޅިވަރާ ބެހޭ ވަޒީރު އަބްދުﷲ ރާފިއު ބައިވެރިވެވަޑައިގެންނެވި އެވެ. އަދި ބައްދަލުވުމުގައި ވާހަކަ ދައްކަވަމުން، މިނިސްޓަރު، ރާފިއު ވިދާޅުވީ ކުރު މުއްދަތެއްގައި ވެސް މުބާރާތުގެ ކަންކަން ރޭވުމުގައި ކެރަމް އެސޯސިއޭޝަނުން ގިނަ ކަންތައްތަކެއް ކުރައްވާފައިވާ ކަމަށެވެ.

އަންނަ މަހުގެ 27 އިން ފެށިގެން ފަސް ދުވަހުގެ މުއްދަތަކަށް ކުރިއަށްގެންދާ މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ސޯޝަލް ސެންޓަރު އިންޑޯގަ އެވެ. އަދި މިމުބާރާތުގައި 12 ވަރަކަށް ގައުމުން 120 އަށް ވުރެ ގިނަ ކުޅުންތެރިންނާއި ޑެލިގޭޓްސް ބައިވެރިވާއިރު، ދުނިޔޭގެ އެންމެ މޮޅެތި ކުޅުންތެރިންގެ ހުނަރު  މިމުބާރާތުގައި ފެނިގެންދާނެ އެވެ.

ރާއްޖޭގެ އިތުރުން އޭޝިއާގައި ކެރަމް ކުޅޭ ގައުމުތަކުގެ ތެރެއިން، އިންޑިއާ، ސްރީ ލަންކާ، ބަންގްލަދޭޝް، ސިންގަޕޫރު، ދެކުނު ކޮރެއާ، މެލޭޝިއާ، ޔޫއޭއީ، ގަތަރު، ނޭޕާލް، ޖަޕާންގެ އިތުރުން ޕާކިސްތާންގެ ކުޅުންތެރިން މިމުބާރާތުން ފެނުމުގެ ފުރުސަތު ބޮޑެވެ.