ގެއްލުން ނުވާ ގޮތަށް ކާޑެއްދޫ އެއާޕޯޓް ދޫކޮށްލަން ތައްޔާރު: ގާސިމް
ކާޑެއްދޫ އެއާޕޯޓް ތަރައްގީ ކުރުމުގެ ވިސްނުން ގެންގުޅޭ ކަމަށާ ނަމަވެސް ސަރުކާރުން ބޭނުންނަމަ އެއާޕޯޓްގެ ހިންގުމުން ވަކިވެ ދޫކޮށްލަން ތައްޔާރަށް ހުންނެވި ކަމަށް ވިލާގެ ޗެއާމަން އަދި މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެ އެވެ.
ގާސިމް މިހެން ވިދާޅުވީ މަޖިލީހުގެ އިގްތިސާދީ ކޮމެޓީގައި ވާހަކަ ދައްކަވަމުންނެވެ. ވިލާގެ އިސްވެރިންނާއެެކު އެ ކޮމެޓީއަށް ގާސިމް ވަޑައިގެން މެންބަރުންގެ ސުވާލުތަކަށް ޖަވާބު ދެއްވާ އެއާޕޯޓާމެދު އޮތް ކަންބޮޑުވުންތަކާ ގުޅޭގޮތުން ޤާސިމްވަނީ ވާހަކަދައްކަވާފައެވެ.
ކާޑެއްދޫ އެއާޕޯޓަކީ ރާއްޖޭގައި މިހާރު ތަރައްޤީކޮށްފައިވާ އެއާޕޯތްތަކުގެ ތެރެއިން އެންމެ ނިކަމެތިކޮށް އޮތް އެއާޕޯޓެވެ. އެ އެއާޕޯޓްގެ ހިދުމަތްތައް ތަރައްގީ ނުކުރާތީއާ ހިދުމަތުގެ ފެންވަރު ދަށްކަމުން ވަރަށް ބޮޑު ފާޑުކިޔުމެއް އަމާޒުވެފައިވެ އެވެ. ވިލާގެ ވެރީން މިއަދު ކޮމެޓީއަށް ހާޒިރު ކުރީ ވެސް ކާޑެއްދޫ އެއާޕޯޓްގެ ފެންވަރު ދަށްވުމުން މެންބަރު ސައުދުﷲ ހުށައެޅެއްވި މައްސަލައަކާއި ގުޅިގެންނެވެ.
ކޮމެޓީ ބައްދަލުވުމުގައި ގާސިމް ވިދާޅުވީ ކާޑެއްދޫ އެއާޕޯޓް ތަރައްގީ ކުރުމުގެ ވިސްނުން ގެންގުޅުއްވާ ކަމަށެވެ. އެގޮތުން ޤާސިމްގެ ވިސްނުމަކީ އެ އެއާޕޯޓް އިންޓަނޭޝަނަލް ފެންވަރަށް ތަރައްގީ ކުރުމަށް ކަމަށް ވެސް އެނާ ވިދާޅުވި އެވެ. ނަމަވެސް އެކަން ނުވެ އޮތީ އިރުއިރުކޮޅާ ވިލާ ކުންފުނީގެ އަތުން އެއާޕޯޓް އަތުލާ ގޯނާ ކުރާތީ ކަމަށް ޤަސިމް ވިދާޅުވި އެވެ.
އިރުއިރުކޮޅުން ގޯނާ ކުރަންޏާ ކިހިނެއްތޯ އެކަން ކުރާނީ. ކުރީގަ ވެސް ނުކުރެވުނީ އެހެންވެގެން
ޔާމީން ސަރުކާރުގައި އެއާޕޯޓް އަތުލުން ފާހަގަ ކުރައްވާ ގާސިމް ވިދާޅުވި އެވެ.
ގާސިމް ވިދާޅުވީ އެ ފަހަރު އެއާޕޯޓް އަތުލީ އިންވެސްޓަރުން ހޯދާ ތަރައްގީގެ މަސައްކަތް ފަށަން ތައްޔާރުވެފައި އޮއްވާ ކަމަށެވެ. އަދި ވިދާޅުވީ އެ ކުންފުނިން ވެސް އެއާޕޯޓްގެ ތަރައްގީއަށް އެތައް ކަމެއް ކޮށްފައިވާ ކަމަށެވެ. ގާސިމްގެ ވާހަކަ ތަކުރާރު ކުރައްވާ ވިދާޅުވީ އެއާޕޯޓް ހިންގަނީ ގެއްލުމުގައި ކަމަށާ މިހާރު ވެސް މަހަކު މިލިއަނަކަށް ވުރެ ގިނަ ރުފިޔާ އެ ކުންފުނިން ހަރަދު ކުރަން ޖެހޭ ކަމަށެވެ.
ސަރުކާރުން ބޭނުން ވަނީ އެއާޕޯޓް އަތުލަން ކަމަށްވާނަމަ އެކަމަށް ޖަދަލު ނުކުރައްވާނެ ކަމަށް ވެސް ވިދާޅުވި އެވެ. އަދި އެމަނިކުފާނު ހުންނެވީ ވިލާއަށް ގެއްލުން ނުވާ ގޮތަށް އެއާޕޯޓް ދޫކޮށްލަން ތައްޔާރަށް ކަމަށް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
