ސަލާދުފަތު ސެލެޑު، ހަދާލަންވެސް ފަސޭހަ ރަހަވެސް މީރު؛ މިއޮތީ ރެސިޕީ

ސަލާދުފަތް ނުވަތަ އާއްމު ނަމުން ނަމަ ލެޓިޔުސް ފަތަކީ، އެ ހުންނަ ގޮތަށް ކާލަންވެސް ވަރަށް މީރު، ސިއްހަތަށް ވަރަށް ފައިދާހުރި ފަތެކެވެ. އަދި އެ ފަތުން ސެލެޑް ފަދަ އެއްޗެއް ތައްޔާރު ކޮށްލުމުން، ރަހަ ދެތިން ގުނައަށް މީރުވެ، ސުފުރާމަތި އިތުރަށް ފަޅު ފިލުވާލަދެއެވެ. އެހެންކަމުން މި ހުކުރު މި ގެނެސްދެނީ ސަލާދުފަތުން މީރު ސެލެޑެއް ތައްޔާރު ކުރާނެ ގޮތުގެ ރެސިޕީއެވެ.

ބޭނުންވާ ތަކެތި

މެދު ސައިޒު ބޯ ތައްޓެއްގެ ސަލާދުފަތް (ތުނިކޮށް ކޮށާފައި)

1 ކުޑަ ފިޔާ ( ތުނިކޮށް ކޮށާފައި)

1/2 ލުނބޮލުގެ ހުތް

1/2 ކިޔުކަންބާ (ހަތަރު ފަޅިއަށް ފެޅުމަށްފަހު ތުނިކޮށް ކޮށާފައި)

ކުޑަ ލޮނު ކޮޅެއް

ގިތެޔޮ މިރުސް (ތުނިކޮށް ކޮށާފައި)

ކުޑަ އަސޭމިރުސް ކޮޅެއް (ސައި ސަމުސަލެއްގެ 1/4)

1 1/2 މޭޒުމަތީ ސަމުސާ މަޔޮނަޒް

ތައްޔާރު ކުރާނެގޮތް

1) ތައްޓެއްގެ ތެރޭގައި ފިޔާ، ލޮނު، ގިތެޔޮ މިރުސް، އަސޭމިރުސް އަދި ލުނބޯ ހުތް ރަނގަޅަށް މޮޑެލާށެވެ.

2) އޭގެ ތެރެއަށް ކޮށާފައި ހުރި ފަތްކޮޅާއި ކިޔުކަންބާ އަޅާލައި މަޑުމަޑުން އެކުލަވާލުމަށްފަހު މަޔޮނައިޒް އަޅާލައި އެކުލަވާލާށެވެ. ދެން ލޮނު ރަހަ ހެޔޮވަރު ކޮށްލާށެވެ.

ސަލާދުފަތު ސެލެޑު އެހުރީ ތައްޔާރުވެފައެވެ. ރިހަ ނުވަތަ ޗިލީ ޗިކަން ނޫނީ ސެޕެގެޓީ ފަދަ ކެއުންތަކާއެކުވެސް މި ސެލެޑު މީރު ވާނެއެވެ.