ރަފީނިއާގެ ލަނޑުތަކާއެކު ބާސެލޯނާއިން ސެވިއްޔާ ބަލިކޮށްފި

ސްޕެނިޝް ލަލީގާގައި ރޭ ބާސެލޯނާ އާއި ސެވިއްޔާ ބައްދަލުކުރިމެޗް ބާސެލޯނާ ކާމިޔާބުކޮށް މި ސީޒަނުގައި އެޓީމް މޮޅުވަމުން އައުމުގެ  ރެކޯޑް ދަމަހައްޓައިފިއެވެ.

ރޭގެ މެޗްގައިވެސް ތަރިއަކަށްވީ ބްރެޒިލްގެ ރަފީނިއާއެވެ. ސެވިއްޔާ އާ ދެކޮޅަށް ކުޅުނު މިމެޗް ބާސެލޯނާ ކާމިޔާބުކުރީ 3-1 ގެ ނަތީޖާއިންނެވެ. ކުރިންމެޗްގައި ރަފީނިއާގެ ހެޓްރިކެއް ފެނިގެންދިޔައިރު، ރޭގެ މެޗްގައިވެސް އޭނާ ވަނީ ހެޓްރިކް ހަދާފައެވެ.

ސެވިލާގެ ދަނޑުގައި ކުޅުނު މި މެޗުގެ 19 ވަނަ މިނެޓުގައި ޔޫސުފް ފޮފާނާ ޖަހައިދިން ލަނޑާއެކު ސެވިލާއިން ފުރަތަމަ ލީޑު ނެގި ނަމަވެސް، ބާސެލޯނާއިން ވަނީ ކުޑަވަގުތުކޮޅެއްގެ ތެރޭގައި މެޗުގެ ކޮންޓްރޯލް އަތުލާފައެވެ. ސެވިލާއިން ލަނޑު ޖެހިތާ ތިން މިނެޓު ފަހުން، އެންޑްރިއަސް ކްރިސްޓެންސަން ތަނަވަސްކޮށްދިން ފުރުސަތަކުން ރަފީނިއާ ވަނީ ބާސެލޯނާއަށް ނަތީޖާ ހަމަހަމަކޮށްދީފައެވެ.

މެޗްގައި ދެން ފެނިގެންދިޔަ ލަނޑުތައް ރަފީނިއާ ޖަހާފައިވަނީ ފަހު ހާފްގެ ތެރޭގައެވެ. ބާސެލޯނާގެ ފޯވާޑް ލައިނަށް އައި ބަދަލާއެކު، ރަފީނިއާ މިހާރު ކުޅެމުންދަނީ ސެންޓްރަލް ފޯވާޑަކަށެވެ. ރަފީނިއާ އާދަޔާ ހިލާފް ފޯމެއްގައި ހުރިއިރު މި ސީޒަނުގައި މިހާތަނަށް ކުޅުނު 8 މެޗުން އޭނާ ވަނީ 14 ލަނޑު ޖަހައި، ތިން އެސިސްޓް ހަދާފައެވެ.

ބާސެލޯނާ މޮޅުވި މިމެޗްގައި ރަފީނިއާ އާ ބެހޭގޮތުން އެންމެބޮޑަށް ތައުރީފްކޮށް ވާހަކަދައްކާފައިވަނީ ސެވިއްޔާގެ ކޯޗް ލުއިސް ގާސިއާއެވެ. މެޗަށްފަހު ނޫސްވެރިންނާ ވާހަކަދައްކަމުން ގާސިއާ ބުނީ، ބެލޮންޑިއޯ އެވޯޑަށް ނޮމިނޭޓްވި ކުޅުންތެރިންގެ ތެރޭގައި ރަފީނިއާ ނުހިމެނުމަކީ ޖޯކެއް ކަމަށެވެ.

"އޭނާއަކީ މެޗު ކާމިޔާބުކޮށްދޭ ކުޅުންތެރިއެއް، އެހެންވެ އަހަރެން މިފަދަ އެވޯޑްތަކަށް އިތުބާރެއް ނުކުރަން. އޭނާ ހުރިހާ ކަމެއް ވެސް އެބަ ކުރޭ" ލުއިސް ގާސިއާ ބުންޏެވެ.

ސެވިއްޔާ މެޗުން ލިބުނު ތިން ޕޮއިންޓާއެކު ބާސެލޯނާ މިހާރު އޮތީ 21 ޕޮއިންޓާއެކު ތާވަލްގެ އެންމެ ކުރީގައެވެ.