ދަރިންނާ، ދަރިންގެ ދަރިން އުޅޭން އޮތްތަނަކީ މިއީ، މިތަނަށް ބަދަލެއް ގެނެވޭނީ ޢަލީ ޢާޒިމަށް: ނަޝީދު

އަންނަން އޮތް ޖީލުތައްވެސް ދިރިއުޅެން އޮތް ތަނަނީ މާލެ ކަމަށާ، އެ މާލެ މިހާރު އޮތް ޙާލަތު ބަދަލު ކޮށްލެވޭނެ މީހަކީ ޢަލީ ޢާޒިމް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ޢަލީ ޢާޒިމްގެ ކެންޕެއިން ޖަލްސާއެއް ރޭ ބާއްވާފައިވާއިރު، ރައީސް ނަޝީދުވެސް ވަނީ އެ ޖަލްސާގައި ބައިވެރިވެވަޑައިގަންނަވާފައެވެ. އަދި މިއީ ޢަލީ އާޒިމްގެ ކެންޕެއިން ޖަލްސާގައި ނަޝީދު ބައިވެރިވެވަޑައުގެންނެވި ފުރަތަމަ ފަހަރެވެ. އެ ޖަލްސާގައި ނަޝީދު ވަނީ ވާހަކަވެސް ދައްކަވާފައެވެ.

އެގޮތުން ވިދާޅުވީ، އާޒިމަށް ތާއީދުކުރައްވަނީ އޭނާ މޭޔަރު ކަމަށް ހޮވިއްޖެ ނަމަ މާލެ ބަދަލުވާނެކަން ޔަގީންވާތީ ކަމަށެވެ.

"އަޅުގަނޑު އާޒިމަށް ތާއީދުކުރަނީ އޭނާ އަހައިފި، ރައީސޭ ކީއްވެހެއްޔޭ މިތާ ވަށައިގެން، މި މާލޭ ވަށައިގެން އެންމެ ރީތި ފަރު ނޯންނާންވީ. އެންމެ ޗާލު ތަނަށް، އެންމެ ރީތި މޫދަށް، އެންމެ ރީތި ފަރަށް މި މާލޭ ފަރު ނުވާންވީ ކީއްވެހޭ. އަޅުގަނޑު ދަންނަވައިފިން ސަބަބެއް ނެތޭ. ތިޔައީ ހައްތަހާ ވާންހުރި ކަންތަކޭ،" ނަޝީދު ވިދާޅުވިއެވެ.

އެ މަނިކުފާނު ވިދާޅުވީ އަލީ އާޒިމްގެ މޭޔަރުކަމުގައި މާލެ ބަދަލުވާނެކަމުގެ ޔަގީންކަން އެބައޮތް ކަމަށެވެ. އެހެންކަމުން އޭނާ ޕްރައިމަރީގައި ހޮވަންޖެހޭ ކަމަށް ވިދާޅުވިއެވެ.

"އަޅުގަނޑަށް ޔަގީން އަލީ އާޒިމްގެ މޭޔަރުކަމުގައި މާލެ ބަދަލުވާނެ. މިގޮތަށް މާލެ ދޫކޮށްފައި ބޭއްވޭކަށެއް ނެތް. މިއީ ވެވެން ނެތް ކަމެއްކަމުގައި ދެކެގެން ފަހަށް ޖެހެވޭކަށްވެސް ނެތް. އަޅުގަނޑުމެންގެ ދަރިންގެ ދަރިންގެ ދަރިންވެސް އުޅޭން އޮތް ތަނަކީ މި ފަސްގަނޑު. އަޅުގަނޑު ހުރިހާ ރައްޔިތުންގެ ކިބައިން ވަރަށް އިޚްލާސްތެރިކަމާއެކު އެދެނީ އަލީ އާޒިމަށް ވޯޓު ދެއްވަން،"

ނަޝީދު ވިދާޅުވިއެވެ.

ރޭގެ އާޒިމްގެ ކެމްޕެއިން ޖަލްސާގައި، ނަޝީދުގެ އިތުރުން، އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލާއި، އެ ޕާޓީގެ ކުރީގެ ނައިބު ރައީސް މުޙައްމަދު ޝިފާޒް ބައިވެރިވެވަޑައިގަތެވެ.