މެންޗެސްޓަރ ޔުނައިޓެޑުން 70 މިލިއަން ޕައުންޑަށް ބަލޭބާ ގެންނަނީ

އިނގިރޭސިވިލާތުގެ މެންޗެސްޓަރ ޔުނައިޓެޑުން ބްރައިޓަންގެ މެދުތެރެއަށް ކުޅެމުން އަންނަ ކާލޮސް ބަލެބާ، 70 މިލިއަން ޕައުންޑުގެ އަގަކަށް ގެނައުމަށް އެއްބަސްވެއްޖެއެވެ.

މީޑިއާގެ ރިޕޯޓްތައް ބުނާގޮތުގައި ބްރައިޓެން އާއި މެންޗެސްޓަރ ޔުނައިޓެޑުން ވަނީ ބަލެބާ ގެނައުމުގެ އެންމެހާ ކަންކަމަށް އެއްބަސްވެ ނިމިފައެވެ.

މި އެއްބަސްވުމުގެ ދަށުން ޔުނައިޓެޑުން ފުރަތަމަ މަރުހަލާގައި 65 މިލިއަން ޕައުންޑް ދައްކާ އިރު އިތުރު ފަސް މިލިއަން ޕައުންޑް ވަކި ޝަރުތުތަކެއް ހަމަވުމުން ދައްކަންޖެހެއެވެ. ހަމައެހެންމެ ކުރިއަށް އޮތް ތަނުގައި ބަލެބާ ވިއްކާލައިފި ނަމަ އެ ފީން ބައެއް ބްރައިޓަނަށް ލިބޭ ގޮތަށް ވެސް ދެ ކްލަބުން ވަނީ ހަމަޖައްސައިފައެވެ. ޢުމުރުން 22 އަހަރުގެ މި ކުޅުންތެރިޔާ މި ހަފުތާ ބަންދުގައި އޯލްޑް ޓްރެފޯޑަށް ގޮސް މެޑިކަލް ޓެސްޓްތައް ހަދާނެއެވެ.

ޔުނައިޓެޑުން މެދުތެރެ ވަރުގަދަކުރުމަށް ނިންމީ ތަޖުރިބާކާރު ބްރެޒިލް ކުޅުންތެރިޔާ ކަސެމީރޯގެ ކޮންޓެކްޓް ހަމަވެ ކްލަބާ ވަކިވުމާ ގުޅިގެންނެވެ. އެ ކްލަބުން މީގެ ކުރިން ޗެލްސީގެ އެންޑްރޭ ސެންޓޮސް އާއި އެސްޓަން ވިލާގެ ޔޫރީ ޓީލެމެންސް ވެސް ވަނީ ގެނެސްފައެވެ. މި ޑީލް ފުރިހަމަ ވެއްޖެ ނަމަ ޔުނައިޓެޑުގެ މި ހޫނު މޫސުމުގެ ޖުމުލަ ޚަރަދު 153 މިލިއަން ޕައުންޑަށް އަރާނެއެވެ.

ފްރާންސްގެ ލިލް ދޫކޮށް ބަލޭބާ ބްރައިޓަން އާ ގުޅުނީ 2023 ވަނަ އަހަރެވެ. އޮސްޓްރިއާގައި ކުރިޔަށް ގެންދިޔަ ޕްރީ ސީޒަން ތަމްރީނުތެރޭ ކުރިމަތިވި ކަކުލު ހުޅުގެ އަނިޔާއެއްގެ ސަބަބުން ބަލޭބާ މިވަގުތު ހުރީ ކުޅުމާ ދުރުގައެވެ.

މެންޗެސްޓަރ ޔުނައިޓެޑުގެ ޕްރިމިއާ ލީގު ސީޒަން ހުޅުވާ މެޗުގައި މިއަދު ނިކުންނާނީ އަލަށް ޕްރޮމޯޓްވި ހަލް ސިޓީއާ ދެކޮޅަށެވެ.