އިދިކޮޅު މަސައްކަތުގެ ބިންގާ އަޅައިދިނީ އަޅުގަނޑު: ނާާޒިމް

އިދިކޮޅު އިއްތިހާދުގެ ސިޔާސީ މަސައްކަތްތަކުގެ ބިންގާ އަޅުއްވައިދެއްވީ އެބޭފުޅާކަމަށް ދިއްގަރު ދާއިރާގެ ކުރީގެ މެންބަރު އަހުމަދު ނާޒިމް ވިދާޅުވެއްޖެއެވެ.

ގިނަ ދުވަސްތަކެއް ވަންދެން އިނގިރޭސި ވިލާތުގެ ސިޔާސީ ހިމާޔަތުގައި ހުންނެވުމަށްފަހު، ރާއްޖެއަށް މިއަދު ވަޑައިގެން އެއަރޕޯޓްގެ ވީއައިޕީ ލޯންޖްގައި ނޫސްވެރިންނާއި ވާހަކަފުޅު ދައްކަވަމުން ނާޒިމް ވިދާޅުވީ، އިދިކޮޅު ހަރަކާތްތަކުގެ ފެށުމަކީ  އަހުމަދު ފާރިސް މައުމޫން އާއި އިބްރާހިމް މުހައްމަދު ސޯލިހު ސިންގަޕޫރުގައި ބޭއްވި ބައްދަލުވުމެއް ކަމަށާއި، އެ ބައްދަލުވުން އިންތިޒާމްކުރެއްވީ އެބޭފުޅާ ކަމަށެވެ.

ނާޒިމް ވިދާޅުވީ ރައީސް ޔާމީން ވެރިކަމަށް ގެނައުމުގައި އެންމެ ބޮޑު ދައުރެއް އަދާކުރެއްވީ އެބޭފުޅާ ކަމަށާއި ހަމަ އެބީދައިން ވެރިކަން ވައްޓާލުމުގައި އެންމެ ބޮޑު ދައުރެއްވެސް އަދާކުރެއްވީ ހަމަ އެބޭފުޅާ ކަމަށެވެ.

25 އަހަރުގެ ޖަލުހުކުމެއް އިއްވާފައިވާ ނާޒިމް އަނބުރާ ރާއްޖެއަށް ވަޑައިގެންނެވީ، އެމަނިކުފާނަށް އިއްވާފައިވާ ޖަލުހުކުމް މުރާޖައާކޮށް ނިމެންދެން ވަގުތީ ގޮތުން ހުކުމް ތަންފީޒުކުރުން ފަސްކުރުމާއި ގުޅިގެންނެވެ. ނާޒިމްއަށް އެއަރޕޯޓުން މަރުހަބާ ދެންނެވީ އަދާލަތު ޕާޓީގެ ރައީސް އައްޝައިޚް އިމްރާން އަބްދުﷲ އެވެ.