ގައުމީ ބީޗް ހޭންޑްބޯޅަ ޓީމުގެ ސެލެކްޝަން މާލެ އަދި ކުޅުދުއްފުށީގައި

މިއަހަރުގެ ސެޕްޓެންބަރު މަހުގެ 18 އިން 22 އަށް ކުޅުދުއްފުށީ ސިޓީގައި ބާއްވާ ކޮމަންވެލްތު ބީޗްހޭންޑްބޯޅަ މުބާރާތުގައި ވާދަކުރާ ޤައުމީ ޓީމު އެކުލަވާލުމަށް މާލޭ ސިޓީގެ އިތުރުން ކުޅުދުއްފުށީގައި ޓްރައިއައުޓްސްތަކެއް ބޭއްވުމަށް ހޭންޑްބޯޅަ މޯލްޑިވްސް އިން ނިންމައިފިއެވެ.

އެގޮތުން ހުޅުމާލޭ ބީޗު ހޭންޑްބޯޅަ ކޯޓުގައި މިމަހު 16، 17 އަދި 18 ވަނަ ދުވަހުގެ ހަވީރު 16:00 އިން 18:00 އަށް ޓްރައިއައުޓްސް ކުރިއަށްގެންދިއުމަށްފަހު މިމަހުގެ 20، 21 އަދި 2އ ވަނަ ދުވަހު ކުޅުދުއްފުށީ ސިޓީގައި ވެސް ޤައުމީ ޓީމުގެ ޓްރައިއައުޓްސް ކުރިއަށް ގެންދިއުމަށް ވަނީ ހަމަޖެހިފައެވެ.

6 މެއި 2025 އިން 15 މެއި 2025 ގެ ނިޔަލަށް އޮމާންގެ މަސްކަޓްގައި ކުރިއަށްދިޔަ 10 ވަނަ ބީޗް ހޭންޑްބޯލް އޭޝިއަން ޗެންޕިއަންޝިޕްގައި ވާދަކުރި ޤައުމީ ބީޗް ހޭންޑްބޯޅަ ޓީމުގެ ސެލެކްޝަން ކުޅުދުއްފުށީގައި ބޭއްވުމުގެ ސަބަބުން ގިނަ އަދަދެއްގެ ހޭންޑްބޯޅަ ކުޅުންތެރިންނަށް ސެލެކްޝަންގައި ބައިވެރިވެވޭގޮތް ނުވުމުން އެފަހަރު ގިނަބައެއްގެ ފާޑުކިޔުން ހޭންޑްބޯޅަ މޯލްޑިވްސްއަށް އޮތީ އަމާޒުވެފައެވެ.

ނަމަވެސް އޭރު ހޭންޑްބޯޅަ މޯލްޑިވްސް އިން ބުނީ ކުޅުދުއްފުށީ ސިޓީގައި ޤައުމީ ޓީމެގެ ސެލެކްޝަން ބޭއްވީ މާލޭ ސިޓީ ސަރަހައްދުގައި ބީޗު ހޭންޑްބޯޅަ ކުޅޭނެ އެކަށީގެންވާ ބީޗު ހޭންޑްބޯޅަ ކޯޓެއް ނެތުމުންކަމަށެވެ. ނަމަވެސް އޭރުވެސް މާލޭ ސަރަހައްދުގައި އަމިއްލަ ކުލަބު ޖަމްއިއްޔާތަކުން އައީ ކޮންމެ ވެސް ވަރަކަށް ބީޗް ހޭންޑްބޯޅަ މުބާރާތް ބާއްވަމުންނެވެ.

މީގެ އިތުރުން ދާދިފަހުން ހުޅުމާލޭ ސެންޓްރަލް ޕާކުގައި އިންޓަ އޮފީސް ބީޗް ހޭންޑްބޯޅަ މުބާރާތެއް ބާއްވާފައިވާއިރު، ހޭންޑްބޯޅަ މޯލްޑިވްސްގެ މިނިންމުމަކީ މާލޭ ސަރަހައްދުގައި ދިރިއުޅޭ ބީޗް ހޭންޑްބޯޅަ ކުޅޭ އެތަކެއް ކުޅުންތެރިންނަށް ޤައުމީ ސްކޮޑުން ފުރުސަތު ހޯދުމަށް ހުޅުވިގެންދިޔަ ދޮރެކެވެ.

މީގެ އިތުރުން ކޮމަންވެލްތު ބީޗްހޭންޑްބޯޅަ މުބާރާތަށް އެކުލަވާލެވޭ ޤައުމީ ޓީމު އެމުބާރާތައްފަހު, އަންނަ އަހަރު ޖެނުއަރީ މަހު ޕާކިސްތާނުގައި އޮންނަ އޭޝިއަން ގޭމްސްއަށް ތައްޔާރުވުމުގެ ގޮތުން ޕްރެކްޓިސް ފެށުމަށް ވަނީ ހަމަޖެހިފައެވެ.