ރައްޔިތުންނާ ގުޅޭ ކަންކަން ނިންމުން ފަހަތަށް ޖައްސާލަން އެބަ ޖެހޭ: އާޒިމް

ހިނގަމުންދާ 19 ވަނަ މަޖިލީހުން ރައްޔިތުންނާއި ގުޅޭ ކަންކަން ނިންމުން ފަހަތަށް ޖައްސާލަންޖެހޭ ކަމަށް މެދު ހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެއެވެ.

މިއަދު ކުރިއަށް ދިޔަ މަޖިލިސް ޖަލްސާގައި ވާހަކަފުޅު ދައްކަވަމުން އާޒިމް ވިދާޅުވީ، 19 ވަނަ މަޖިލީހުން ދެން ރައްޔިތުންނާ ގުޅޭ ކަންކަން ނިންމުމަކީ އެންމެ ބުއްދިވެރި ގޮތް ކަމުގައި ދެކިނުލައްވާ ކަމަށެވެ.

"ރައްޔިތުންނާ ގުޅޭ ކަންކަން ނިންމުން ފަހަތަށް ޖައްސާލަން އެބަ ޖެހޭ. މި މަޖިލީހުން ދެން ރައްޔިތުންނާ ގުޅޭ ކަންކަން ނިންމުމަކީ އެންމެ ބުއްދިވެރި ގޮތް ކަމުގައި އަޅުގަނޑު ނުދެކެން،"

އާޒިމް ވިދާޅުވިއެވެ.

އާޒިމް ވިދާޅުވީ، މަޖިލިސް އިންތިހާބުގައި ރައްޔިތުން ބަސް ބުނެފައިވާ ކަމަށާއި، އެ އަޑު އަހައިގެން  މެއި 13 ވަަނަ ދުވަހާ ހަމައަށް މެމްބަރުން ތިބުމަކީ އެބޭފުޅާ އެދިލައްވާ ކަމެއް ކަމަށެވެ.

އާޒިމްގެ މި ވާހަކަތަކަށް ޖަވާބު ދެއްވަމުން މަޖިލީހުގެ ރައީސް މުޙައްމަދު އަސްލަމް ވިދާޅުވީ، އިންތިހާބަށް ފަހު ދައުރު ނިމެންދެން މަޖިލިސް ކުރިއަށް ގެންދިއުމަށާއި މަޖިލިސް ތެރެއިން ކަންކަން ނިންމުމަށް އެއްވެސް ހުރަހެއް ނެތް ކަމަށެވެ.

މިއަދު ގެ ޖަލްސާގައި އައު މެމްބަރުން ހުވާ ކުރާނެ ދުވަސް ވެސް ވަނީ ކަނޑައަޅާފައެވެ. މިގޮތުން އަންނަ މަހުގެ 28 ވަނަ ދުވަހު 20 ވަނަ މަޖިލިހަށް ހޮވިވަޑައިގެން މެމްބަރުން ހުވާ ކުރެއްވުމުގެ ޖަލްސާ ބޭއްވުމަށް ހަމަޖެހިފައިވާއިރު، މި ހިނގާ ރައްޔިތުންގެ މަޖިލީހުގެ ދައުރު އަންނަ މަހުގެ 15ވަނަ ދުވަހަށް ނިމޭނެއެވެ. އެހެންކަމުން 19ވަނަ މަޖިލީހުގެ ފަހު ޖަލްސާ އޮންނާނީ އަންނަ މަހުގެ 13 ވަނަ ދުވަހުއެވެ.