ދުރު މަންޒިލްތަކަށް ދަތުރު ފެށުމަށް މޯލްޑިވިއަންއަށް އެއާ ބަސް އެއް ގެންނަން ސޮއިކޮށްފި

ޤައުމީ އެއަރލައިންއަށް ވައިޑް-ބޮޑީ އޮޕަރޭޝަންސް ތަޢާރަފުކުރުމަށް ރައީސުލްޖުމްހޫރިއްޔާ ވެފައިވާ ވަޢުދާ އެއްގޮތަށް، މޯލްޑިވިއަން އިން އެއަރބަސް އޭ330-200 މަތިންދާބޯޓެއް ހޯދުމަށް ޓްރޫނޯޑްއާއެކު އެއްބަސްވުމެއްގައި ސޮއިކޮށްފިއެވެ.

މިއަދު ބޭއްވި ރަސްމިއްޔާތުގައި އެ އެއްބަސްވުމުގައި މޯލްޑިވިއަންގެ ފަރާތުން ސޮއިކުރެއްވީ އެއާލައިން ހިންގަމުންދާ އައިލެންޑް އޭވިއޭޝަންގެ މެނޭޖިން ޑިރެކްޓަރު އިބްރާހިމް އިލްޔާސެވެ. އަދި ޓްރޫނޯޑްގެ ފަރާތުން ސޮއިކރެއްވީ އެ ކުންފުނީގެ ސީސީއޯ ކާރްސްޓް ލިންޑާބޫމްއެވެ.

މި ރަސްމިއްޔާތުގައި މޯލްޑިވިއަންގެ މެނޭޖިންގ ޑިރެކްޓަރ އިބްރާހިމް އިލްޔާސް، މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އޮނަރަބަލް މިނިސްޓަރ މުޙައްމަދު އަމީން އަދި ދެ ކުންފުނީގެ މުހިންމު ބޭފުޅުން ބައިވެރިވެ ވަޑައިގެންނެވިއެވެ.

މޯލްޑިވިއަނުން ބުނީ، އެ ކުންފުނީގެ އުދުހުންތަކަށް އޭ330-200 ތަޢާރަފުކުރުމުން އެއަރލައިންގެ އޮޕަރޭޝަނަލް ޤާބިލުކަން ވަރަށް ބޮޑަށް އިތުރުވެ، އައު މަންޒިލުތަކަށް އުދުހުމުގެ ފުރުޞަތު ލިބި، ފަސިންޖަރުންނަށް އިތުރަށް ފެންވަރު ރަނގަޅު ދަތުރުފަތުރުގެ ތަޖުރިބާއެއް ލިބިގެންދާނެއެވެ.

އަދި މި ބޯޓުގެ ސަބަބުން މޯލްޑިވިއަންއަށް އިތުރުވަމުންދާ ވައިގެ ދަތުރުފަތުރުގެ ޑިމާންޑަށް ޚިދުމަތް ދެވޭނެ ކަމަށާ ދަތުރުވެރިން ބޭނުންވާ ގޮތަށް، ދަތުރުތަކުގެ އޮޕްޝަންތައް ހުށަހެޅޭނެ ކަމަށްވެސް ބުނެފައިވެއެވެ.

އެއްބަސްވުމުގައި ސޮއި ކުރެވުނު ރަސްމިއްޔާތުގައި ވާހަކަ ދައްކަވަމުން، އިލްޔާސް ވިދާޅުވީ އެ އެއާ ބަސްގައި ތިން ކްލާހެއް ހިމެނޭ ކަމަށެވެ. އެއީ ބިޒްނަސް އަށް 18 ގޮނޑި އާއި ފްރިމިއަކް އެކޮނަމީއަށް 36 ގޮޑިއާއި އިކޮނޮމީ ކުލާހުގައި 210 ގޮޑިއާއެކު ޖުމްލަ 264 ގޮނޑި އެވެ.

"ޓްރޫނޯޑްއާއެކު ވެވުނު މި އެއްބަސްވުމަކީ މޯލްޑިވިއަންގެ ކުރިއެރުމާއި އައު ގޮތްތައް ހޯދުމަށް ކުރާ ދެމެހެއްޓެނިވި މަސައްކަތުގެ ހެއްކެއް،… އަދި އޭ330 މަތިންދާބޯޓަކީ އަޅުގަނޑުމެންގެ ބައިނަލްއަޤްވާމީ ވިއުގަ ފުޅާކުރުމަށާއި، މި ސަރަޙައްދުގައި ފަތުރުވެރިކަމާއި ވިޔަފާރީގެ އައު ފުރުޞަތުތައް އުފެއްދުމަށް ވަރަށް މުހިންމު ދައުރެއް އަދާކުރާނެ އެއްޗެއް." މޯލްޑިވިއަންގެ މެނޭޖިންގ ޑިރެކްޓަރ އިބްރާހިމް އިލްޔާސް ވިދާޅުވިއެވެ.

އިލްޔަާސް ވިދާޅުވިގޮތުގައި، މި މަތިންދާބޯޓުން އެންމެ ފުރަތަމަ ދަތުރުތައް ފަށާނީ ޗައިނާއަށެވެ.

ޓްރޫނޯޑަކީ ދުނިޔޭގެ ފެންވަރުގައި މަތިންދާބޯޓު ކުއްޔަށްދިނުމުގެ ޚިދުމަތްދޭ ކުންފުނިތަކުގެ ތެރެއިން އިސް ކުންފުންޏެކެވެ. މި ކުންފުނިން ދުނިޔޭގެ އެކި ކަންކޮޅުތަކުގައި ހުރި އެއަރލައިންތަކަށް އެ ކުންފުނިތަކުގެ ބޭނުންތަކަށް ޚާއްޞަކޮށްގެން ބޯޓް ކުއްޔަށްދިނުމުގެ ޚިދުމަތް ފޯރުކޮށްދެއެވެ. ކަސްޓަމަރުން ހިތްހަމަޖެހުމާއި ހިންގުމުގެ ފެންވަރު މަތިކުރުމަށް އަހައްމިއްޔަތުކަން ދީގެން، ޓްރޫނޯޑުން އެ ކުންފުނީގެ އެއަރލައިން ޕާޓްނަރުންގެ ކުރިއެރުމާއި ކާމިޔާބީއަށް އެހީތެރިވެދެއެވެ.