އަންނަ މަހުގެ 17 ވަނަ ދުވަހު މޯލްޑިވިއަނުން އޮސްޓްރޭލިއާއަށް ދަތުތުރައް ފަށަނީ

ރާއްޖޭގެ ގައުމީ އެއަރލައިން، މޯލްޑިވިއަނުން އޮސްޓްރޭލިއާގެ މެލްބާންއަށް މި އަންނަ މަހުގެ 17 ވަނަ ދުވަހު ދަތުރުތައް ފަށަން ނިންމާއިފިއެވެ.

އައިލެންޑް އޭވިއޭޝަނުން ބުނާ ގޮތުގައި، މޭ 17 އިން ފެށިގެން ރާއްޖެއިން އޮސްޓްރޭލިއާއަށް ޑައިރެކްޓް ފްލައިޓްތައް ދަތުރުކުރާނެއެވެ. އަދި އޮސްޓްރޭލިއާއަށްދާ ފުރަތަމަ ފްލައިޓް ރާއްޖެ އަނބުރާ އަންނާނީ މޭ 19 ގައެވެ. އަދި މި ދަތުރުތައް ކޮންމެ ހަފުތާއަކު އެއް ފަހަރު ބޭއްވުމަށް މޯލްޑިވިއަނުން ވަނީ ނިންމާފައެވެ.

މިދިޔަ މާރިޗު މަހުގެ 19 ވަނަ ދުވަހު އޮސްޓްރޭލިއާއާއި ރާއްޖެއާއި މެދު ދަތުރުތައް ފެށުމަށް ދެ ގައުމުން އެއްބަސްވުމުގައި ސޮއިކޮށްފާވާއިރު، މިއީ މޯލްޑިވިއަނުން އޮސްޓްރޭލިއާއަށް ދަތުރުތައް ފަށާ ފުރަތަމަ ފަހަރެވެ.

އޮސްޓްރޭލިއާއަކީ ރާއްޖޭގެ ފަތުރުވެރިކަމުގެ ސިނާއަތުގައި ވަރަށް ގިނަދުވަސްވީ މާކެޓެކެވެ. ޓޫރިޒަމް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ ފުރަތަމަ ދެމަހުގެ ތެރޭގައި އޮސްޓްރޭލިއާއިން ރާއްޖެއަށް 6,526 ފަތުރުވެރިން ވަނީ ޒިޔާރަތްކޮށްފައެވެ.

ރާއްޖޭގެ އޭވިއޭޝަން ދާއިރާގައި ހަރަކާތްތެރިވާ ފަރާތްތަކުން ވޮއިސްއާ މައުލޫމާތު ހިއްސާކުރަމުން ބުނީ، އޮސްޓްރޭލިއާ މާކެޓުން މި ސަރަހައްދަށް ވަރަށް ރަނގަޅު ޑިމާންޑެއް އޮންނަކަމަށެވެ. އެގޮތުން ސްރީލަންކަން އެއާލައިނުން އެކަނިވެސް އޮސްޓްރޭލިއާއަށް ހަފްތާއަކުން 10 ފްލައިޓް ބާއްވައެވެ.

މޯލްޑިވިއަނުން އޮސްޓްރޭލިއާއަށް ދަތުރުތައް ފެށުމަކީ އެކަމުގެ ސަބަބުން އޮސްޓްރޭލިއާ އަދި އެނޫންވެސް މަންޒިލްތަކުން ދަތުރުކުރާ ފަތުރުވެރިންގެ އަދަދު އިތުރުވެގެންދާނޭ ކަމެއްކަމަށް އެފަރާތްތަކުން ބުނެއެވެ.

މޯލްޑިވިއަނުން ދަނީ އެ އެއަރލައިނުން ދަތުރުކުރާ ބައިނަލްއަގުވާމީ މަންޒިލްތައް އިތުރު ކުރުމަށްޓަކައި ހުޅަނގުގެ ގައުމުތަކަށް ދަތުރުތައް ފެށުމަށްޓަކައި ތައްޔާރުވަމުންނެވެ. މޯލްޑިވިއަނުން މިހާރު ދަތުރުކުރާ މަންޒިލްތަކުގައި، ޗައިނާ، ބަންގްލަދޭޝް އަދި އިންޑިއާ ހިމެނެއެވެ.