ދިރާގު ޓެކާސް ރިސޯޓު ކަޕް 2024 ކްރޮސްރޯޑްސް މޯލްޑިވްސްގައި ފަށައިފި

ދިރާގު ޓެކާސް ރިސޯޓު ކަޕް 2024 ކްރޮސްރޯޑްސް މޯލްޑިވްސްގައި ފަށައިފިއެވެ.

މިއީ މި މުބާރާތް ކުޅޭ ތިންވަނަ އަހަރުކަމަށް ވާއިރު، މި މުބާރާތާއި ގުޅޭގޮތުން ދިރާގުން ބުނީ، މިއީ ދިވެހިރާއްޖޭގެ ކުޅިވަރުގެ ކަލަންޑަރުގައި ވަރަށް މުހިންމު މުބާރާތަކަށް ވެފައިވާ ކަމަށާއި، މި މުބާރާތުން ރިސޯޓުތަކުގެ މުވައްޒަފުންގެ ހުނަރާއި ވާދަވެރިކަން ދައްކުވައިދޭކަމަށެވެ.

މާލެ އަތޮޅުގެ ދެކުނުގައިވާ އެކި ރިސޯޓުތަކުގެ ޓީމުތަކުން ބައިވެރިވާ މި މުބާރާތުގެ ފުރަތަމަ މެޗު އިއްޔެ ކްރޮސްރޯޑްގައި ފަށާފައިވާއިރު، ޚާއްސަ މެހެމާނެއްގެ ގޮތުގައި މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން، އަލްފާޟިލް ޢަބްދުﷲ ރަފީޢު ވަނީ ބައިވެރިވެވަޑައިގެންފައެވެ. އަދި މިނިސްޓަރ ރަފީޢުގެ އިތުރުން ކްރައުން ކޮމްޕެނީގެ ފައުންޑަރ އަދި ޑިރެކްޓަރ އަދި މާޓީގެ ސެކްރެޓަރީ ޖެނެރަލް، އަލްފާޟިލް އަޙްމަދު ނަޒީރާއި، ޓައިޓަލް ޕާޓްނަރ، ދިރާގުގެ ފަރާތުން ޑިރެކްޓަރ ބްރޭންޑް އެންޑް މާކެޓިންގ ކޮމިއުނިކޭޝަންސް، އަލްފާޟިލް މުޙައްމަދު މިރްޝާން ޙަސަން ވެސް މެހެމާނުންގެ ގޮތުގައި ބައިވެރިވިކަމަށް ދިރާގުން ބުނެއެވެ.

މި މުބާރާތް ފެށުމުގެ ރަސްމިއްޔާތުގެ ތެރޭގައި މިނިސްޓަރ އަބްދުﷲ ރަފީއުއާއިއެކު ފިޓްނަސް އެންޑް ރެކްރިއޭޝަނާއި، ކުރީގެ ޤައުމީ ޓީމުގެ ކުޅުންތެރިޔާ، އެފްއޭއެމްގެ ނައިބު ރައީސް އަދި މަޝްހޫރު ފޯވަޑް އަލީ އުމަރު ހިމެނޭ ތަރިންގެ ޓީމާ ދެމެދު ޚާއްޞަ ޗެރިޓީ މެޗެއް ކުޅެވުނުކަމަށް ދިރާގުން ބުނެއެވެ.

މި ރަސްމިއްޔާތުގައި ޓެކާސްގެ މެނޭޖިންގ ޑިރެކްޓަރ މުޙައްމަދު ނަޝްމީ ރަޝީދު އާއި ދިރާގުގެ ބްރޭންޑް އެންޑް މާކެޓިންގ ކޮމިއުނިކޭޝަންސްގެ ޑިރެކްޓަރ މުޙައްމަދު މިރްޝާން ޙަސަން ދެއްކެވި ވާހަކަފުޅުގައި އެބޭފުޅުން ވަނީ މުޖުތަމަޢުއެއްގެ އިޙްސާސް އުފެއްދުމުގައި ކުޅިވަރުގެ މުހިންމުކަން ފާހަގަކުރައްވާފައެވެ.

ދިރާގުން ބުނީ، ފޯރިގަދަ ގިނަ މަޗުތަކެއް ކުޅެވޭ މި މުބާރާތް ނިމިގެންދާނީ ކްރޮސްރޯޑްސް މޯލްޑިވްސްގައި ކުޅޭ ފައިނަލް މެޗަކުން ކަމަށެވެ. ދިރާގު ޓެކާސް ރިސޯޓް ކަޕް ސައުތު ކާފު ޓްރޮފީއަށް ޓީމުތަކުން ވާދަކުރާއިރު، މުބާރާތުގެ ތެރެއިން ފާހަގަކޮށްލެވޭ ޕަރފޯމަންސްތަކާއި، ރޭވުންތެރި ކުޅުންތެރިކަމާއި، ގިނަ ގޯލުތަކެއް ކުޅިވަރަށް ލޯބި ކުރާ ފަރާތްތަކަށް ފެނިގެންދާނެ ކަމަށް ދިރާގުން ބުނެއެވެ.