އެއްވެސް މެޗަކުން ބަލިނުވެ ބިގްމޭން ސުޕަ ކަޕް 2025 ޖަމިއްޔަތުއްސަލަފުގެ ޓީމުން ކާމިޔާބު ކޮށްފި

ފަތިސް ލީގުން އިންތިޒާމް ކުރި “ބިގްމޭން ސުޕަ ކަޕް 2025” ފުޓްސަލް މުބާރާތުގެ ޗެމްޕިއަންކަން ޖަމިއްޔަތުއްސަލަފްގެ ޓީމް ހޯދައިފި އެވެ.

އެއްދުވަހުގެ މި މުބާރާތަކީ ފަތިސްލީގުން އިންތިޒާމް ކުރަމުން އަންނަ މުބާރާތްތަކުގެ ތެރެއިން މުބާރާތެކެވެ.

މިއަދު ހެނދުނު، ހުޅުމާލެ، ފޭސް2ގެ ފުޓްސަލް ދަނޑުގައި ކުރިޔަށް ދިޔަ މި މުބާރާތުގައި ޖުމްލަ 10 ޓީމުން ބައިވެރިވެފައިވެއެވެ. މިއީ ދީނީ ކަންކަމަށް ލޯބިކުރާ އަހުންގެ މެދުގައި އެކުވެރިކަން އާލާކޮށް، ކުޅިވަރުގެ ރޫހު އާލާކޮށް، އިސްލާމީ ގިއުގަނޑުގެ ތެރެއިން އުފާފައުޅު ކުރުމުގެ ގޮތުން ފަތިސް ލީގުގެ ފަރާތުން އިންތިޒާމް ކުރަމުން އަންނަ މުބާރާތްތަކެކެވެ.

ދެ ގުރޫޕަށް ބަހާލައިގެން ކުޅެނު މިމުބާރާތުގެ ފައިނަލާ ހަމައަށް ޓީމް ސަލަފުން ވާސީލުވީ، އެއްވެސް ޓީމެއްގެ އަތުން ބަލިނުވެ، ގުރޫޕު ބީގެ އެއްވަނަ ޓީމުގެ ގޮތުގައި 10 ޕޮއިންޓު ހޯދައިގެންނެވެ.

ޓީމް ސަލަފުން ފައިނަލްގައި ކުޅެފައިވަނީ ގުރޫޕް ބީ އިން 2 ވަނަ ޓީމުގެ ގޮތުގައި ސެމީގައި ކުޅެ މެޗު ކާމިޔާބުކޮށްގެން ފައިނަލަށް ދިޔަ، ޓީމް ރަފަހަ އާއެވެ.

ފޯރިގަދަ ކުޅުންތަކެއް ފެނިގެންދިޔަ މި މުބާރާތުގެ ޗެމްޕިއަންކަން ޓީމް ސަލަފުން ހޯދާފައިވަނީ، ފައިނަލްމެޗުގައި ޓީމް ރަފަހަ އާކުޅެ  ވަގޔތު ހަމަވިއިރު އެއްވެސް ކޮޅަކަށް ލަނޑެއް ޖެހިފައި ނުވާތީ، ޕެނަލްޓީ ޖަހައިގެން، 2–0 ގެ ނަތީޖާއަކުންނެވެ. ގުރޫޕް ސުޓޭޖްގައި ކުޅެވުނު މެޗުތަކުން ޓީމް ސަލަފުގެ ކޮޅަށް އެއްވެސް ގޯލެއް ވަދެފައި ނުވާކަން ފާހަގަ ކޮށްލެވެއެވެ.

2023 ވަނަ އަހަރު ބޭއްވި، “ފަތިސް ލީގު ފުޓްސަލް ކަޕް 2023” ގައި ބައިވެރިވެ، އެ މުބާރާތުގެ ޗެމްޕިއަންކަންވެސް ޓީމް ސަލަފުން ވަނީ ހޯދާފައެވެ.