ރަސްމާލެ މަޝްރޫއާމެދު ކަންބޮޑުވުންތަކެއް ހުރިކަމަށް ފެންނާތީ ސަލަފުން ދިރާސާއެއް
ސަރުކާރުން ރަަސްމާލޭގައި ހިންގުމަށް އިއުލާނުކޮށްފައިވާ “މޯލްޑިވްސް ވޯޓާ ފްރޮންޓު އެންޑް މެރީނާ” މަޝްރޫއުއާމެދު ކަންބޮޑުވުންތަކެއް ހުރިކަމަށް ފެންނާތީ ޖަމިއްޔަތުއްސަލަފުން އެކަމާއި ގުޅޭ ހާއްސަ ދިރާސާއެއް ކުރުމަށް ނިންމައިފި އެވެ.
އެކަން ހާމަކޮށް ޖަމިއްޔަތުއް ސަލަފުގެ ތަރުޖަމާން އައްޝައިޚް ހަސަން މޫސާ ފިކުރީ މިއަދު ވިދާޅުވީ އެ ޖަމިއްޔާ އިން ސަރުކާރުގެ ކަމާބެހޭ ފަރާތްތަކާ ބައްދަލުކޮށްގެންނާއި އެހެނިހެން ގޮތްގޮތުން މައުލޫމާތު ސާފުކުރާނެ ކަމަށެވެ. އަދި އެ މަޝްރޫއު ދިރާސާ ކުރަމުންދާ ވާހަކަ ރައްޔިތުންގެ ސަމާލު ކަމަށްޓަކައި ވަނީ ހާމަކޮށްފަ އެވެ.
މޯލްޑިވްސް ވޯޓާ ފްރޮންޓު އެންޑް މެރީނާ” މަޝްރޫއުއާމެދު ތަފާތު އެކި ގޮތްގޮތަށް ދަނީ ވާހަކަ ދެކެވެމުންނެވެ. އެ މަޝްރޫއުއަކީ ރާއްޖޭގެ ބިމުގެ ބޮޑު ބައެއް ބޭރުގެ ފަރާތަކަށް ވިއްކާލުން ކަމަށް ބައެއް މީހުން ދެކެ އެވެ. އެ މަޝްރޫއު ހިންގާ ކުންފުންޏާއެކު ވެފައިވާ އެއްބަސްވުމަކީ ރާއްޖެއަށް ގެއްލުން ބޮޑުކޮށް ވެފައިވާ އެއްބަސްވުމެއް ކަމަށާ ރަސްމާލެއިން އެ ކުންފުންޏަށް ދިފައިވާ ބިން ދެން ދުވަހަކުވެސް ދިވެހީންގެ މިލްކަކަށް ނުވާނެ ކަމަށް އިދިކޮޅު ސިޔާސީ ލީޑަރުން ވިދާޅުވެ އެވެ.
ނަމަވެސް ސަރުކާރުން އެކަން ދޮގުކުރެ އެވެ. ސަރުކާރުން ބުނީ ރަސްމާލެ ބިމުން އެންމެ އިންޗިއެއްވެސް ވިއްކާ ނުލާ ކަމަށެވެ. އަދި ކުއްޔަށް ދިނީ އާންމު އުސޫލުން ކަމަށާ އެކަމުގައި ރައްޔިތުންނަށް އޮތީ ފައިދާ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
