ވީއައިއޭ އައު ޓާމިނަލުން 2،000 އަށްވުރެ ގިނަ ދަތުރުވެރިންނަށް ހިދުމަތްދީފި

ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލުން މިހާތަނަށް 2,000 އަށްވުރެ ގިނަ ދަތުރުވެރިންނަށް ހިދުމަތް ދީފިއެވެ.

މިކަމާ ގުޅޭގޮތުން ވީއައިއޭ ހިންގާ އެމްއޭސީއެލުން ބުނެފައިވަނީ ޖުލައި 26 ވަނަ ދުވަހު އޮޕަރޭޝަންފެށި އައު ޓާމިނަލުން މިހާތަނަށް  މޯލްޑިވިއަންގެ ބޯޓުތަކަށް 14 ފަހަރު ހިދުމަތް ދީފައިވާކަމަށެވެ. މި މުއްދަތުގެ ތެރޭގައި ޖުމްލަ 2,410 ދަތުރުވެރިއަކަށް ވަނީ ހިދުމަތްދީފައެވެ. އޭގެ ތެރޭގައި ހިމެނެނީ ރާއްޖެއިން ފުރި 956 ފަސިންޖަރަކާއި ރާއްޖެ އައި 1,454 ފަސިންޖަރެކެވެ.

މިނިވަންދުވަހާ ދިމާކޮށް ޖުލައި 26 ވަނަ ދުވަހު ރަސްމީކޮށް ހުޅުވި ވީއައިއޭ އައު ޓާމިނަލްގެ ހިދުމަތް ފަށާފައިވަނީ، ޖުލައިމަހުގެ 27 ވަނަ ދުވަހެވެ. އެންމެފުރަތަމަ ހިދުމަތް ދީފައިވަނީ، އެދުވަހު އިންޑިއާގެ ކޮޗިން އިންޓަނޭޝަނަލް އެއާޕޯޓުން މާލެ އައި ގައުމީ އެއާލައިން, މޯލްޑިވިއަންގެ މަތިންދާބޯޓަށެވެ.

އެމްއޭސީއެލުން ބުނީ ވީއައިއޭގެ ޓާމިނަލް 1 އަށް ބައިނަލްއަގުވާމީ ދަތުރުތައް ބަދަލުކުރުމަށް ހަމަޖެހިފައިވަނީ އޮރާޓް ޕްރޮސެސްގެ ތެރެއިންނެވެ. އެކަން ކުރާނީ ބައިނަލްއަގުވާމީ ކޮންސަލްޓަންޓް ފާމެއް ކަމަށްވާ މޮޑާލިސްއާ ގުޅިގެންނެވެ.

އެ ޕްރޮސެސްގެ ތެރެއިން ފަހަރަކު އެއާލައިނަކަށްފަހު އެއާލައިނެއް ބަދަލުކުރަމުން ގޮސް, މި އަހަރުގެ ފަތުރުވެރިކަމުގެ މޫސުން ފެށުމުގެ ކުރިން ހުރިހާ އެއާލައިނެއްގެ ހިދުމަތް އާ ފަސިންޖަރު ޓާމިނަލަށް ބަދަލުކުރާނޭކަމަށް އެމްއޭސީއެލުން ބުނެއެވެ.