ރިކެލްމޭގެ ޓްރާންސްފާ ވައުދުތައް ކްލޮޕް އަދި ހާލަންޑްގެ ފަރާތުން ދޮގުކޮށްފި

ރެއާލް މެޑްރިޑްގެ ރިޔާސީ ކެނޑިޑޭޓް އެންރީކޭ ރިކެލްމޭ ހޮވިއްޖެނަމަ ލިވަޕޫލްގެ ކުރީގެ ކޯޗު ޔާގަން ކްލޮޕް އަދި މެންޗަސްޓަރ ސިޓީގެ ފޯވާޑް ހާލަންޑް ރެއަލް މެޑްރިޑަށް އަންނާނެކަމަށް އޭނާ ވައުދުވުމުން ކްލޮޕް އަދި ހާލަންޑްގެ ފަރާތުން އެ ވައުދުތައް ދޮގުކޮށްފިއެވެ.

އެގޮތުން، ރިކެލްމޭ މިހެން ބުނެފައިވަނީ އޭނާ މީޑިއާއަކަށް ދިން އިންޓަރވިއުއެއްގައި ވާހަކަދައްކަވަމުންނެވެ. އަދި އޭނާ ވަނީ ހާލަންޑްގެ ނަން ޖެހި ރެއަލް މެޑްރިޑްގެ ޖޯޒީއެއް ވެސް ދައްކާލާފައެވެ.

ރިކެލްމޭގެ މި ވާހަކަތަކާއި ގުޅިގެން ޔާގަން ކްލޮޕްގެ އޭޖެންޓް ވަނީ އެ ވާހަކަތައް ދޮގުކޮށްފައެވެ. އަދި ކްލޮޕްގެ އެޖެންޓް ބުނި ގޮތުގައި ކްލޮޕް އެއްވެސް ކްލަބެއް ކޯޗުކުރުމަށް ހިޔާލުކުރަމުން ނުދާ ކަމަށެވެ.

ކްލޮޕްގެ އިތުރުން، ރިކެލްމޭ ވަނީ އޭނާ ރެއާލް މެޑްރިޑްގެ ރައީސްކަމަށް ހޮވިއްޖެ ނަމަ، މެންޗެސްޓަރ ސިޓީއަށް ކުޅެމުންދާ ފޯވާޑް އާލިންގް ހާލަންޑް އެ ކްލަބަށް ގެނެސްދޭނެ ކަމުގެ ފުރިހަމަ ޔަގީންކަން ވެސް ދެއްވާފައެވެ.

ރިކެލްމޭގެ މި ވައުދުތަކާއި ގުޅިގެން، އާލިންގް ހާލަންޑްގެ އެޖެންޓާއި އޭނާގެ ބައްޕަ ވަނީ އެ ވާހަކަތައް ދޮގުކޮށްފައެވެ. ހާލަންޑްގެ ފަރާތުން ބުނެފައިވަނީ ރިކެލްމޭއާއެކު އެއްވެސް ކަހަލަ އެއްބަސްވުމެއް ނުވަތަ މަޝްވަރާއެއް ހިނގާފައި ނުވާނެ ކަމަށެވެ.

މީގެ އިތުރުން، ހާލަންޑްގެ މިހާރުގެ ކްލަބް ކަމަށްވާ މެންޗެސްޓަރ ސިޓީން ވަނީ އެންރީކޭ ރިކެލްމޭގެ މި އަމަލާ މެދު ނުރުހުން ފާޅުކޮށްފައެވެ. ސިޓީގެ ކުޅުންތެރިއަކާ ބެހޭގޮތުން ހަގީގަތާ ޚިލާފު ވާހަކަތައް ފަތުރަމުންދާތީ، އެ ކްލަބުން ވަނީ ރިކެލްމޭއާ ދެކޮޅަށް ގާނޫނީ ފިޔަވަޅު އަޅާނެ ކަމުގެ އިންޒާރު ވެސް ދީފައެވެ.