ފަހުވަގުތު ޖެހި ލަނޑުތަކާއެކު، ރެއާލް މެޑްރިޑުން ރޯމާ ބަލިކޮށްފި

ޔުއެފާ ޗެމްޕިއަންސްލީގްގައި ރޭ އެންމެފަހު ވަގުތު ޖެހި ލަނޑުތަކާއެކު ރޯމާ އަތުން ރެއާލް މެޑްރިޑް ހައިރާންކުރުވަނިވި މޮޅެއް ހޯދައިފިއެވެ.

އިޓަލީގެ އޮލިމްޕިކް ސްޓޭޑިއަމް ކުޅުނު މިމެޗް އެޓީމްގެ މައްޗަށް ރެއާލުން ކުރި ހޯދީ 3-4 ގެ ނަތީޖާއިންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި އެންމެ ފުރަތަމަ ލަނޑެއް ޖަހައި ކުރި ހޯދާފައިވަނީ ރޯމާ އެވެ. އެއީ ފުރަތަމަ ހާފްގެ 20 ވަނަ މިނެޓް ތެރޭގައި މާޓެން ޑި ރޫން އެވެ. ނަމަވެސް އޭގެ ހަތަރު މިނެޓު ފަހުން، ކިލިއަން އެމްބާޕޭ ވަނީ ލަނޑެއް ޖަހައި މެޗްގެ ނަތީޖާ ހަމަހަމކޮށްފައެވެ. މިއީ ޗެމްޕިއަންސް ލީގުގައި ކުޅުނު 100 ވަނަ މެޗެވެ.

މެޗްގެ ފުރަތަމަ ހާފް ނިމުނީ 1-1 ގެ ނަތީޖާއިން ދެޓީމް އެއްވަރުވެގެންނެވެ. ދެވަނަ ހާފް ފެށިތާ އިރުކޮޅެއްގެ ތެރޭގައި ރޯމާގެ ޑޮންޔެލް މާލެން ލަނޑެއް ޖަހައި ދެވަނަ ފަހަރަށް ވަނީ އެޓީމަށް ލީޑް ނަގައިދީފައެވެ. އަދި އޭގެ ފަސްމިނެތްފަހުން އިތުރު ލަނޑެއް ޖަހައި މާލެން ވަނީ މެޗްގެ ނަތީޖާ 3-1 ކަށް ބަދަލުކޮށްފައެވެ.

މެޗްގައި މޮރީނިއޯ ގެނައި ބަދަލުތަކާއެކު ދެން ފެނިގެންދިޔައީ މެޗްގެ އޮއިވަރު ބަދަލުވެގެން ދިޔަ ތަނެވެ. އެގޮތުން 83 ވަނަ މިނެޓުގައި ކާލޯސް އެސްޕީ ރެއާލްގެ ދެވަނަ ލަނޑު ޖަހައި އުއްމީދު އާކޮށްދިންއިރު، އޭގެ ދެ މިނެޓު ފަހުން ބަދަލު ކުޅުންތެރިޔާ އެންޑްރިކް ވަނީ ބޮލުން ލަނޑެއް ޖަހައި ނަތީޖާ ހަމަހަމަކޮށްފައެވެ.

މެޗުން ރެއާލް މެޑްރިޑް މޮޅުވި ލަނޑު ފެނިގެންދިޔައީ މެޗުގެ 90 ވަނަ މިނެޓުގައެވެ. މި ލަނޑު ޖަހައިދިނީ ބަދަލު ކުޅުންތެރިޔާ އާޑާ ގުލާ ނެގި ކޯނަރެއްގެ ފައިދާ ނަގައި، އެންޓޯނިއޯ ރޫޑިގާ އެވެ. މި މޮޅާއެކު ރެއާލް މެޑްރިޑުން ވަނީ ޗެމްޕިއަންސް ލީގުގައި ކުޅުނު ދެ މެޗުވެސް ކާމިޔާބުކޮށްފައެވެ.