ހާލާންޑްގެ ލަނޑާއެކު ލައިޕްޒިގު އަތުން ސިޓީއަށް މުހިންމު މޮޅެއް

ޔުއެފާ ޗެމްޕިއަންސްލީގްައި ރޭ މެންޗެސްޓަރ ސިޓީ އާއި ލައިޕްޒިގް ބައްދަލުކުރި ފޯރިގަދަ މެޗް މެންޗެސްޓަރ ސިޓީ ކާމިޔާބުކޮށްފިއެވެ.

ލައިޕްޒިގްގެ އަމިއްލަ ދަނޑުގައި ކުޅުނު މިމެޗް ސިޓީ ކާމިޔާބުކުރީ 3-2 ގެ ނަތީޖާއިންނެވެ. ސިޓީން މި މެޗަށް ނިކުތްއިރު ޕްރިމިއާ ލީގްގައި އެޓީމް އެންމެފަހުން ބްރައިޓަން އަތުން ވަނީ ބަލިވެފައެވެ.

މެޗުގެ ފުރަތަމަ ހާފުގައި ލައިޕްޒިގުން މޮޅަށް ކުޅެމުން ދަނިކޮށް، ސިޓީއަށް ކުރިލިބުނީ އެ ޓީމުގެ ލުކޭބާ އަތުން ބައިކޮޅަށް ވަން ލަނޑަކުންނެވެ. ނަމަވެސް ދެވަނަ ހާފު ފެށިގެން ކުޑަވަގުތުކޮޅެއްގެ ތެރޭގައި ލައިޕްޒިގުގެ ރިޑްލް ބަކޫ ވަނީ ހިތްގައިމު ލަނޑެއް ޖަހައި ނަތީޖާ ހަމަހަމަކޮށްފައެވެ. ސިޓީން ދެވަނަ ފަހަރަށް ލީޑު ނެގީ އެންޒޯ ފެނާންޑޭޒް ބޮލުން ފޮނުވާލި ހަމަލާއަކުންނެވެ. އެހެންނަމަވެސް، އޭގެ ތިން މިނެޓު ފަހުން ލައިޕްޒިގުގެ ނޫސާ ވަނީ އަނެއްކާވެސް ނަތީޖާ އެއްވަރުކޮށްފައެވެ.

މެޗުން ސިޓީ މޮޅުވީ 78 ވަނަ މިނެޓުގައި އެލިއަޓް އެންޑަސަން ތަނަވަސްކޮށްދިން ފުރުސަތަކުން ހާލަންޑް ކާމިޔާބުކުރި ލަނޑުންނެވެ. މިއީ އޭނާގެ ކެރިއަރުގައި ލައިޕްޒިގާ ދެކޮޅަށް ޖެހި 13 ވަނަ ލަނޑެވެ. މެޗުގެ އެންމެފަހު ވަގުތުގައި ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބި ބޭކާރުވެފައިވެއެވެ.

މި މެޗުގައި ސިޓީގެ ކީޕަރު ޖިއާންލުއިޖީ ޑޮނަރުއްމާގެ ފަރާތުން ފެނުނު ބައެއް ގޯސްތަކުގެ ސަބަބުން ގިނަ ފާޑުކިޔުންތަކެއް ވަނީ އަމާޒުވެފައެވެ. ވަކިން ހާއްސަކޮށް ލައިޕްޒިގުން ޖެހި ފުރަތަމަ ލަނޑުގައި އޭނާގެ އިހުމާލު ބޮޑުކަން ފާހަގަކުރެވުނެވެ.

މެޗަށްފަހު ވާހަކަދައްކަމުން ހާލަންޑް ބުނީ، ލައިޕްޒިގަކީ އަބަދުވެސް އުނދަގޫ ޓީމެއް ކަމަށާއި، މި މޮޅާއެކު ޓީމުގެ އިތުބާރު ބޮޑުވެފައިވާ ކަމަށެވެ. ނަމަވެސް ޓީމުގެ ކުޅުން މިއަށްވުރެ ބޮޑަށް ރަނގަޅުކޮށް، ލިބޭ ފުރުސަތުތަކުގެ ބޭނުން ހިފަން ޖެހޭ ކަމަށް އޭނާ ފާހަގަކުރިއެވެ. މި މޮޅާއެކު ސިޓީ މިހާރު އޮތީ ލީގު ތާވަލުގެ ހަތްވަނައިގައެވެ.