ސިވިލް ސަރވިސް ޓްރެއިނިންގ އިންސްޓިޓިއުޓްއުން ބްލަޑް ކޭމްޕެއް ބާއްވަައިފި

ސިވިލް ސަރވިސް ޓްރެއިނިންގ އިންސްޓިޓިއުޓް (ސީއެސްޓީއައި) ގައި ބްލަޑް ކޭމްޕެއް ބާއްވައިފިއެވެ. ސީއެސްޓީއައިގެ ދަރިވަރުން އިސްނަގައިގެން ބޭއްވި މި ބްލަޑް ކޭމްޕްގައި 40 އަށްވުރެ ގިނަ ފަރާތްތަކުން ލޭ ހަދިޔާކޮށްފައިވެއެވެ. މިއަދު ހެނދުނު 10 އިން މެންދުރުފަހު 2 އަށް ކުރިޔަށްގެންދިޔަ ލޭ ހަދިޔާކުރުމުގެ މިހަރަކާތަކީ މޯލްޑިވްސް ބްލަޑް ސަރވިސަސްއާ ގުޅިގެން ތެލެސީމިއާ ކުދިންނަށް ބޭނުންވާ ލޭ ހޯދުމަށް އެހީތެރިވެދިނުމުގެ މަޤްޞަދުގައި ކުރިޔަށްގެންދިޔަ ހަރަކާތެކެވެ.

ލޭ ހަދިޔާކުރުމުގެ އިތުރުން މިއަދަކީ ބައިނަލް އަގްވާމީ ގޮތުން ފާހަގަކުރެވޭ ދުނިޔޭގެ ހަކުރުބަލީގެ ދުވަސްކަމަށްވުމާއެކު މި ދުވަހުގެ މުނާސަބަތު ފާހަގަކުރުމުގެ ގޮތުން ހަކުރުބައްޔަށް ޓެސްޓްކޮށްދިނުމާއި ހަކުރުބައްޔާބެހޭ މައުލޫމާތު ދިނުންވެސް ސީއެސްޓީއައިގައި ކުރިޔަށްދިޔައެވެ. ހަކުރުބައްޔަށް ޓެސްޓްކޮށްދިނުމާއި ހަކުރު ބައްޔާބެހޭ މައުލޫމާތު މި އިވެންޓްގައި ދެއްވީ ދަމަނަވެށީގެ ފަރާތުންނެވެ.

ލޭ ހަދިޔާކުރުމުގެ މި ހަރަކާތް ނިންމުމުގެ ގޮތުން މިއަދު މެންދުރުފަހު ސީއެސްޓީގައި ބޭއްވި ރަސްމިއްޔާތު ޝަރަފުވެރިކޮށްދެއްވީ 2018 ވަނަ އަހަރު ރާއްޖޭގެ ޤައުމީ އެތްލެޓިކްސް މުބާރާތުގެ އެންމެމޮޅު ދުވުންތެރިޔާ، އެމްއެންޑީއެފްގެ ކޯޕްރަލް ހުޞައިން ފަޒީލު ހާރޫންއެވެ. މި ރަސްމިއްޔާތުގައި ފަޒީލު ދެއްކެވި ވާހަކައިގައި ލޭހަދިޔާކުރުމުގެ މުހިންމުކަމުގެ މައްޗަށް އަލިއަޅުއްވާލައްވާ ވާހަކަދެއްކެވިއެވެ.

ސިވިލް ސަރވިސް ކޮމިޝަނުގެ ރައީސް ޑރ. ޢަލީ ޝަމީމު މި ރަސްމިއްޔާތުގައި ދެއްކެވި ވަހަކަފުޅުގައި، މަސައްކަތުގެ މާހައުލުގައިވެސް ކާމިޔާބާއެކު ކުރިޔަށް ދިއުމުގައި ދުޅަހެޔޮ ސިއްހަތެއްގައި ދެމިހުރުމުގެ މުހިންމުކަން ފާހަގަކުރެއްވިއެވެ. މީގެ އިތުރުން މޯލްޑިވިއަން ބްލަޑް ސަރވިސަސްގެ ފަރާތުން އެ މަރުކަޒުގެ އެސޯސިއޭޓް ސްޕެޝަލިސްޓް އިން ޕީޑިއަޓްރިކް ޑރ. މުޙައްމަދު އުމަރު ދެއްކެވި ވާހަކަފުޅުގައި، ލޭ ހަދިޔާކުރުމަށް ބާއްވާ މިފަދަ ކޭމްޕަތައް ފަދަ ހަރަކާތްތަކުގައި ގިނަ ޢަދަދެއްގެ މީހުން ލޭ ހަދިޔާކުރަމުންދިޔަ ނަމަވެސް އެ ސަރވިސަސްއަށް ބޭނުންވާ މިންވަރަށް ލޭ ދާއިމީގޮތެއްގައި ލިބެމުން ނުދާކަން ފާހަގަކުރެއްވިއެވެ.

މުޙައްމަދު އުމަރު ވިދާޅުވީ ލޭ ދޭ ފަރާތްތަކުން ކޮންމެ ތިންމަހުން ތިންމަހުން ގަވާއިދުން ލޭ ދެއްވަމުން ގެންދަވާނަމަ އެ ސަރވިސަސްއަށް ބޭނުންވާ މިންވަރަށް ލޭ ލިބުމުގައި ދަތިކަމެއް ކުރިމަތިނުވާނެ ކަމަށެވެ. އެހެންކަމުން ލޭ ދެއްވާ ފަރާތްތަކުން މިފަދަ ކޭމްޕަތައް ބާއްވަންދެން ލޭ ދެއްވަން މަޑުނުކުރައްވާ އެސަރވިސަސްއަށް ވަޑައިގެން ގަވާއިދުން ލޭ ދެއްވަމުން ގެންދެވުމަށް އެދިވަޑައިގެންނެވިއެވެ. އަދި އެ މަރުކަޒުގައި ހުކުރުދުވަސް ނޫން ކޮންމެދުވަހަކުވެސް ލޭ ނެގުމުގެ އިންތިޒާމު ހަމަޖެހިފައި އޮންނާނެކަމަށްވެސް މުހައްމަދު އުމަރު ވިދާޅުވިއެވެ.

ސީއެސްޓީއައިގެ ދަރިވަރުންގެ އިސްނެގުމާއެކު ކޮންމެ އަހަރަކު ކުރިޔަށްގެންދިއުމަށް ރޭވިފައިވާ މިހަރަކާތް ބޭއްވި މިއީ ދެވަނަ ފަހަރެވެ.