ޕާކިސްތާނުގެ ޕިޝާވަރުގައި ޖާނުންފިދާވުމުގެ ބޮމުގެ ހަމަލާއެއް؛ 6 މީހުން މަރުވެ އެތައް ބަޔަކު ޒަޚަމްވެއްޖެ

ޕާކިސްތާނުގެ ޕިޝާވަރުގައި ދިން ޖާނުން ފިދާވުމުގެ ހަމަލެއްގައި ހަ މީހުން މަރުވެއްޖެއެވެ.

މި ހަމަލާދީފައިވަނީ، ޕާކިސްތާނުގެ ޕިޝާވަރުގައި ހުންނަ ޕެރަމިލިޓަރީ ފައުޖުގެ މައި މަރުކަޒަށް އަމާޒުކޮށެވެ. އެ ސަރަހައްދަކީ މީހުން ބައިބޯ ސަރަހައްދެއްކަން ފާހަގަކޮށްލަންޖެހެއެވެ.

މިއަދު ހެނދުނު ދެވުނު މި ޖާނުންފިދާވުމުގެ ހަމަލާގައިސަލާމަތީ ބާރުގެ ތިން މީހުން މަރުވެފައިވާއިރު، އިތުރު ބަޔަކު ވަނީ ޒަޚަމްވެފައެވެ.

މި ހަމަލާދިން ހަނގުރާމަވެރިންގެ ތެރެއިން އެކަކު ވަނީ އެ އިމާރާތުގެ ގޭޓު ކައިރީގައި ހުރެ އޭނާގެ ހަށިގަނޑުގައި ބަދެފައި ހުރި ގޮވާތަކެތި ގޮއްވާލާފައެވެ. އަނެއް ދެ މީހުން މަސައްކަތްކުރީ އިމާރާތުގެ އެތެރެއަށް ވަނުމަށެވެ. ނަމަވެސް އެފްސީގެ ސިފައިން ދިން ހަމަލާތަކުގައި އެ ދެ މީހުން މަރާލެވުނު ކަމަށް އެ ނޫހުން ބުނެއެވެ.

”ފުރަތަމަ އެ ތިން ހަނގުރާމަވެރިން މަސައްކަތްކުރީ މައި މަރުކަޒަށް ހަމަލާދޭން. އެގޮތުން އެކަކު ގޭޓު ކައިރިން އަމިއްލަ ގައިގައި ހުރި ބޮންތައް ގޮއްވާލީ، އަނެއް ދެ މީހުން އިމާރާތުގެ ތެރެއަށް ވަންނަން މަސައްކަތް ކުރި ނަމަވެސް އެފްސީގެ ސިފައިން އެމީހުން މަރާލީ."ޕިޝާވަރު ކެޕިޓަލް ސިޓީގެ ފުލުހުންގެ އޮފިސަރު މިއާން ސައީދު އަހުމަދު ދަ ޑޯން ނޫހަށް މައުލޫމާތުދެމުން ބުނެފައިވެއެވެ.

މި ހަމަލާގައި މަރުވި ތިން އޮފިސަރުން ތިބީ ގޭޓު ކައިރީގައެވެ.

މި ހަމަލާ ދިން އިރު، ގިނަ އަދަދެއްގެ ސަލާމަތީ ބާރުގެ މުވައްޒަފުން ހެނދުނުގެ ޕެރޭޑް ހަރަކާތްތަކަށް މަރުކަޒުގެ ހާމަ ބިމެއްގައި އެއްވެ ތިބި ކަމަށް ޕިޝާވަރު ފުލުހުންގެ ޗީފް ސައީދު އަހުމަދު އެސޯސިއޭޓެޑް ޕްރެސް (އޭޕީ) ނިއުސް އެޖެންސީއަށް މައުލޫމާތު ދީފައިވެއެވެ.