އެޗްޕީއޭއިން އިރުޝާދު ދެނީ ހެލްމެޓް އަޅަން އާދަކުރުމަށް

ސައިކަލް ދުއްވާއިރު ހެލްމެޓްއަޅަން އާދަކުރުމަށް ހެލްތު ޕްރޮޓެކްޝަން އޭޖެންސީ، އެޗްޕީއޭއިން އިލްތިމާސްކޮށްފިއެވެ.

ރާއްޖޭގައި އާއްމުގޮތެއްގައި ސައިކަލް ދުއްވާއިރު، ކަނޑައެޅޭ ވަކި ސަރަހައްދު ތަކެއް ފިޔަވައި އެހެން ތަންތަނުގައި ހެލްމެޓް އެޅުން އޮންނަނީ އިހްތިޔާރީ ކަމެއްގެ ގޮތުގައެވެ. އައްޑޫ ލިންކް ރޯޑްގެ ވަކި ސަރަހައްދެއްގައި ހެލްމެޓް އަލައިގެން ސައިކަލް ދުއްވުން ލާޒިމްކޮށްފައި އޮންނައިރު، ލާމު ލިންކް ރޯޑުގެ ކަނޑައެޅޭ ވަކި ސަރަހައްދުތަކެއްގައި ދުއްވެނީ ހެލްމެޓް އަޅައިގެންނެވެ. އަދި ސިނަމާލެ ބްރިޖާއި ހައިވޭގައި ސައިކަލް ދުއްވާއިރު ހެލްމެޓް އަޅަން ޖެހެއެވެ.

އެޗްޕީއޭއިން މިއަދު ކުރި ޕޯސްޓެއްގައި ވަނީ އާދަކޮށް ހެލްމެޓް އަލަންޖެހޭކަން ފާހަގަކޮށް އެކަމުގެ މުހިންމުކަން ބުނެދީފައެވެ. އެގޮތުން ހެލްމެޓް ބޭނުންކުރާއިރު ރައްކާތެރި ހެޔޮވަރު ހެލްމެޓް ބޭނުންކުރުމާއި ހެލްމެޓްގެ ކަމަރު ހެޔޮވަރުކޮށް ރަނގަޅަށް އެޅުމަށް ވަނީ ނަސޭހަތްތެރިވެފައެވެ.

އެޗްޕީއޭއިން ބުނީ ހެލްމެޓް ރަނގަޅުގޮތުގައި ބޭނުންކުރުމުން ސިކުނޑިއަށް ލިބިދާނެ ގެއްލުންތަކުގެ ނުރައްކާ 74 އިންސައްތައާ ހަމަޔަށް ކުޑަކޮށްދޭކަމަށެވެ.

ސިނަމާލެ ބްރިޖާއި ހައިވޭގެ އިތުރުން ހުޅުމާލެ ތެރޭގައިވެސް ނުރައްކާތެރި އެކްސިޑެންޓްތައް ހިނގާ މިންވަރު އަންނަނީ ވަރަށްބޮޑަށް އިތުރުވަމުންނެވެ. މިފަހުން ހުޅުމާލޭގައި ނުރައްކާތެރި އެތައް އެކްސިޑެންޓްތަކެއް ވަނީ ހިނގާފައެވެ. އެގޮތުން ހިނގި އެކްސިޑެންޓެއްގައި ސައިކަލް ފަހަތުގައި އިން ކުޑަ ކުއްޖެއްގެ ފުރާނަ ގެއްލިފައިވާއިރު، ހުޅުމާލެ ތެރެއިން ހިނގި އެކި އެކްސިޑެންޓްތަކުގައި މީހުންނަށް އެކި ވަރުގެ ގެއްލުންތައް ލިބުނުކަން ފާހަގަކޮށްލެވެއެވެ. އެގޮތުން ބައެއް މީހުންގެ ސިކުނޑިއަށް ލޭ އެޅި ނުރައްކާތެރި ހާލަތަކަށް ދިޔަކަމަށް ވަނީ މައުލޫމާތު ލިބިފައެވެ.