ދެމަފިރީން ދަރީންކުރިމަތީ ޒުވާބުކުރުމުން ދަރީންގެ މެދުގައި އަނިޔާވެރިވުމަށް މަގުފަހިވޭ: ޚުތުބާ

ދެމަފިރީން ދަރީންކުރިމަތީ ޒުވާބުކުރުމާއި، ޖަދަލުކުރުމުގެ ސަބަބުން ދަރީންނަށް ނަފްސާނީގޮތުން އަނިޔާލިބި، އެ ކުދީންގެ މެދުގައި އަނިޔާވެރިވުމަށް މަގުފަހިވާ ކަމަށް މިއަދުގެ ޚުތުބާގައި ބުނެފިއެވެ.

މިއަދުގެ ގެ ޚުތުބާގައި އަލި އަޅުވާލާފައިވަނީ ގެވެށި އަނިޔާގެ މައްޗަށެވެ.

ޚުތުބާގައި ބުނި ގޮތުގައި، އަންހެނުންނަށް އަނިޔާކުރުމަކީ ފައިދާއެއް ނެތް، ގެއްލުންހުރި ހަޑިހުތުރު ޢަމަލެކެވެ. އަދި އިސްލާމްދީނުގައި ފިރިމީހާ އޭނާގެ އަނބިމީހާއަށް ޖިސްމާނީ އަދި ޖިންސީ ގޮތުން އަނިޔާކުރުން ހުއްދަކުރާ ކަމެއް ނޫނެވެ. މާތްالله ވަނީ ފިރިހެނުންނަށް އެމީހުންގެ އަނބީންނާއެކު ރިވެތި ގޮތުގައި މުޢާމަލާތުކުރުމަށް އަމުރުކުރައްވާފައި ކަންވެސް ޚުތުބާގައި ފާހަގަކޮށްފައިވެއެވެ.

ޚުތުބާގައި އިތުރަށް ބުނެފައިވާ ގޮތުގައި، ގެވެށި އަނިޔާއަކީ ހހަމައެކަނި ފިރިހެނުންގެ ފަރާތުން އަންހެނުންނަށް ލިބޭ އަނިޔާއެއް ނޫނެވެ. އަންހެނުންގެ ފަރާތުން ފިރިހެނުންނަށް ލިބޭ އަނިޔާވެސް ގެވެށި އަނިޔާގެ ތެރޭގައި ހިމެނެއެވެ.

ދެމަފިރިން ދަރިންގެ ކުރިމަތީގައި ޒުވާބުކޮށް ޖަދަލުކުރުމުގެ ސަބަބުން ދަރިންނަށް ނަފްސާނީ ގޮތުން އަނިޔާ ލިބި، އެ ކުދިންގެ މެދުގައި އަނިޔާވެރިވުމަށް މަގުފަހިވެދާނެކަމަށް ބަޔާންކުރެއްވިއެވެ.

ހުކުރު ޚުތުބާ

މިއާއެކު ޚުތުބާގައި ބުނީ ގޮތުގައި، މިފަދަ ޢަމަލުތަކުގެ ސަބަބުން ދަރިންގެ ބަސްމަގު ހުތުރުވެ، މައިންބަފައިންގެ އަގުވެއްޓި، މައިންބަފައިންނަށް ނުކިޔަމަންތެރިވުމަށް މަގުފަހިވެދާނެއެވެ. އެހެންކަމުން، ދެމަފިރިން ވެސް މާތްالله ކަނޑައަޅުއްވާފައިވާ ޙުދޫދުގެ ތެރޭގައި ތިބުމުގެ މުހިންމުކަން ޚުތުބާގައި އިސްކަންދެއްވާފައިވެއެވެ.

ނިންމާލަމުން ޚުތުބާގައި ވިދާޅުވެފައިވަނީ، އަނބީން ފިރީންނަށް ކިޔަމަންތެރިވެ އަމާނާތްތެރިވާން ޖެހޭނެ ކަމާއި، ފިރީން ވެސް އަނބީންނަށް އޯގާތެރިވެ އެހީތެރިވާން ޖެހޭނެ ކަމަށެވެ. އަދި އެއްވެސް ޙާލެއްގައި، އެއްބަޔަކު އަނެއްބަޔަކަށް އަނިޔާވެރިވުމަކީ الله سبحانه وتعالى ޙަރާމްކުރައްވާފައިވާ ކަމެއްކަން ހަނދާންކޮށްދެއްވާފައިވެއެވެ.