ރާއްޖޭގެ ފުޓްބޯޅައިގެ މިހާރުގެ ހާލަތު ޕޮޑޮލްސްކީ އަށް ކިޔައިދެއްވައިފި

ދިވެހިރާއްޖޭގެ ފުޓްބޯޅައިގެ މިހާރުގެ ހާލަތު ސްޕޯޓްސް މިނިސްޓަރު އަބްދު،الله ރާފިއު، ޖަރުމަނަށް 2014 ގެ ވޯލްޑް ކަޕް ކާމިޔާބުކޮށް ދިނުމުގައި ހިއްސާވި ފޯވާޑް ލޫކަސް ޕޮޑޮލްސްކީ އާ، ބައްދަލުކުރައްވައި ކިޔައިދެއްވައިފިއެވެ.

މި ކަމާގުޅިގެން ސްޕޯޓްސް މިނިސްޓްރީން ކުރި ޓްވީޓެއްގައި ބުނީ މި ބައްދަލުވުމުގައި ރާއްޖޭގެ ފުޓްބޯޅައިގެ ކުރިމަގަށް ރާވާފައިވާ ކަންކަމާއި ބެހޭގޮތުންމަޝްވަރާ ކުރެވުނު ކަމަށެވެ. އަދި އެ މަސައްކަތްތަކުގައި ޕޮޑޮލްސްކީ ގެ އެއްބާރުލުން ދެވޭނެ ގޮތަކާ ބެހޭގޮތުންވެސް މި ބައްދަލުވުމުގައި މަޝްވަރާ ކުރެވުނު ކަމަށް އެ މިނިސްޓްރީން ބުންޏެވެ.

މި ބައްދަލުވުމުގައި ރާއްޖޭގެ ގައުމީ ޓީމުގެ ޖޯޒީއެއް ވެސް ޕޮޑެލްސްކީ އަށް ވަނީ ހަދިޔާ ކޮށްފައެވެ.

ރާއްޖޭގެ ފުޓްބޯޅައިގެ ހާލަތާ ބެހޭ ގޮތުން ޕޮޑެލްސްކީ އާއި އެކު މަޝްވަރާގެ ބައްދަލުވުން ބާއްވާފައިވާއިރު، މި ދުވަސްވަރަކީ  އެފްއޭއެމް އާއި ރާއްޖޭގެ ފުޓްބޯޅައިގެ ތެރޭގައި ބޮޑު މައްސަލަތަކެއް ކުރިމަތިވެފައިވާ ދުވަސްވަރެކެވެ.

މިގޮތުން އެފްއޭއެމަށް ބޭރުގެ ބައެއް އިދާރާތަކުން ލިބޭ ފައިސާ އަމިއްލަ އެކައުންޓްތަކަށް ޖަމާކޮށް ބޭނުންކޮށްފައިވާކަން އެނގޭ ސާފު ހެކި ބޭންކް ސްޓޭޓްމަންޓްތަކުން ފެންނަން ހުރި ކަމަށް ފުލުހުން ބުނެފައިވާއިރު ޕީޖީ އޮފީހުން ވެސް ވަނީ އެފްއޭއެމްގެ ރައީސް ބައްސާމް އަދީލް ޖަލީލާއި އެއިދާރާގެ އެހެން ވެރިންނަށްވެސް ދައުވާ ކުރެވޭ ވަރަށް ހެކި ލިބޭނެ ކަމަށް ވިދާޅުވެފައެވެ.

އެއިދާރާގެ އެގްޒެކެޓިވް ކޮމިޓީ ކޮމިޓީގެ ގާނޫނީ ސައްހަކަން ގެއްލިފައިވާ ކަމަށް ނިންމައި ސްޕޯޓްސް ކޮމިޝަނުން މިމަހުގެ 31 ގައި ބޭއްވުމަށް ހަމަޖެހިފައިވާ އެފްއޭއެމްގެ އިންތިހާބުގެ ކަންކަން ކުރިއަށް ނުގެންގޮސް ހުއްޓާލުމަށް ވަނީ އަންގާފައެވެ.