ބެޓިސް އާ ދެކޮޅަށް ކުޅުނު މެޗުން އާސެނަލް ބަލިވެއްޖެ

ކުރިއަށްއޮތް ސީޒަނަށް ތައްޔާރުވުމުގެ ގޮތުން އިންގްލޭންޑްގެ އާސެނަލް އާއި ސްޕެއިންގެ ރެއާލް ބެޓިސް ބައްދަލުކުރިމެޗް ބެޓިސް ކާމިޔާބުކޮށްފިއެވެ.

ޑަބްލިންގައި ކުޅުނު މިމެޗް އާސެނަލްގެ މައްޗަށް ބެޓިސް ކުރި ހޯދީ 3-1 ގެ ނަތީޖާއިންނެވެ. މިމެޗްގައި އާސެނަލްގެ ފަރާތުން މާ އެދެވޭ ކުޅުމެއް ފެނިގެންގޮސްފައެއް ނުވެއެވެ.  މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް ބެޓިސްގެ ކުޅުންްތެރިންނެވެ.

މި މެޗުގައި ބެޓިސްއިން ލީޑް ނަގާފައިވަނީ އާސެނަލްގެ ގޯލްކީޕަރު ކެޕާ އަރިޒަބަލަގާއަށް ކޯނަރެއް ދިފާޢުނުކުރެވި ހެދުނު ގޯހެއްގެ ފައިދާ ނަގައި، ރޮޑްރީގޯ ރިކުއެލްމޭ ކާމިޔާބުކުރި ގޯލުންނެވެ. ރޮޑްރީގޯ ލަނޑު ޖެހިތާ މާ ގިނައިރުތަކެއް ނުވެ، ބެޓިސްގެ ނެލްސަން ޑިއޯސާ ވަނީ ދުރުން ފޮނުވާލި ބާރު ހަމަލާއަކުން އެ ޓީމުގެ ދެވަނަ ލަނޑު ޖަހައިދީފައެވެ.

މެޗްގައި އަސެނަލަށް ސުންކަނޑުވާލަދިނީ މިފަހުން އެ ޓީމާ އަލަށް ގުޅުނު ކްރިސްޓޯސް ސޮލިސް ނަގައިދިން ކޯނަރަކުން ޕިއޭރޯ ހިންކަޕީ އެވެ. މެޗްގައި ބެޓިސް އިން ޖެހި ތިންވަނަ ލަނޑަކީ ކައި ހާވާޓްޒްއަށް ހެދުނު ގޯހަކުން ޕަބްލޯ ފޯނާލްސް ޖެހި ލަނޑެކެވެ.

މެޗުގެ ދެވަނަ ހާފުގައި އާސެނަލްގެ ކޯޗު މިކޭލް އާޓެޓާ ވަނީ ޓީމަށް ބަދަލުތަކެއް ގެނެސް، ބްރެޒިލްގެ ދެ ތަރިން ކަމަށްވާ ގަބްރިއެލް މަގަލަޔޭސް އާއި ގަބްރިއެލް މާޓިނެލީ ކުޅެން އެރުވިއެވެ. ނަމަވެސް މެޗްގެ ނިމުނީ ބެޓިސް މޮޅުވެގެންނެވެ. މެޗުން އާސެނަލްގެ އެންމެ މުހިންމު ތަރިންކަމަށްވާ ޑެކްލަން ރައިސް އާއި މާޓިން އޮޑެގާޑް ފަދަ ކުޅުންތެރިން ފެނިގެން ގޮސްފައެއް ނުވެއެވެ.

ބެޓިސް އަތުން ބަލިވި މި މެޗަކީ މިފަހަރުގެ ޕްރީ-ސީޒަނުގައި އާސެނަލް  ބަލިވި ފުރަތަމަ މެޗެވެ. އާސެނަލުން ދަނީ ކުރިއަށްއޮތް ސީޒަނަށް ޓީމު ވަރުގަދަކުރުމަށްޓަކައި ޓްރާންސްފާ މާކެޓުގައި އާ ކުޅުންތެރިން ހޯދުމުގެ މަސައްކަތް ކުރަމުންނެވެ.