އަމިއްލަ ދަނޑުގައި ބިލްބާއޯ އަތުން ލިވަޕޫލަށް އުނދަގޫ މޮޅެއް

ކުރިއަށް އޮތް ސީޒަނަށް ތައްޔާރުވުމުގެ ގޮތުން ރޭ އަމިއްލަ ދަނޑުގައި ލިވަޕޫލުން ސްޕެއިންގެ އެތްލެޓިކް ބިލްބާއޯ ދެކޮޅަށް ކުޅުނު އެކުވެރިކަމުގެ މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ލިވަޕޫލުން ކާމިޔާބުކޮށްފިއެވެ.

ލިވަޕޫލްގެ އަންފީލްޑުގައި ކުޅުނު މިމެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ލިވަޕޫލުންނެވެ. މިލަނޑު ފުރަތަމަ ހާފުގެ 14 ވަނަ މިނެޓުގައި ކާމިޔާބުކޮށްދިނީ އެޓީމުގެ މިސްރު ފޯވާޑް މުހައްމަދު ސަލާހް އެވެ.

ބިލްބާއޯ އިން މެޗުގެ ނަތީޖާ އެއްވަރުކުރި ލަނޑު ފުރަތަމަ ހާފުގެ 29 ވަނަ މިނެޓުގައި ކާމިޔާބުކޮށްދިނީ ޔޯހާން ސަންސެޓް އެވެ. އަދި މިލަނޑާއެކު ފުރަތަމަ ހާފުގެ ކުޅުންނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފު ފެށިގެން 10 ވަނަ މިނެޓުގައި ލިވަޕޫލްގެ ނެދަލޭންޑްސް ފޯވާޑް ކޯޑީ ގައްޕޯ ވަނީ އިތުރު ލަނޑެއް ކާމިޔާބުކޮށް މިމެޗުގައި ދެވަނަ ފަހަރަށް ލިވަޕޫލަށް ލީޑު ހޯދައިދީފައެވެ. ނަމަވެސް އޭގެ ނުވަ މިނެޓް ފަހުން ބިލްބާއޯ އިން ވަނީ ލަނޑެއް ކާމިޔާބުކޮށް ދެވަނަ ފަހަރަށް މެޗުގެ ނަތީޖާ އެއްވަރުކޮށްފައެވެ. އަދި މިލަނޑަކީ ލިވަޕޫލްގެ ފޯވާޑް ގައްޕޯ އަތުން ބައިކޮޅަށް ވަން ލަނޑެކެވެ.

މިމެޗުން ލިވަޕޫލް މޮޅުވި ލަނޑު ފަހުހާފު 70 ވަނަ މިނެޓުގައި ކާމިޔާބުކޮށްދިނީ ވެސް މިމެޗުގައި މޮޅު ކުޅުމެއް ދެއްކި ގައްޕޯއެވެ. އަދި މީގެ އިތުރުން މެޗުގެ ލީޑު ފުޅާކުރުމަށް ފަހުހާފުގެ 81 ވަނަ މިނެޓުގައި ލިވަޕޫލަށް ޕެނަލްޓީއެއް ލިބުނެވެ. ނަމަވެސް ސަލާހް ކުރިއަށް ފޮނުވާލި ޕެނަލްޓީ ވަނީ ކާމިޔާބުކުރެވޭގޮތް ނުވެފައެވެ. މިއާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން ލިވަޕޫލް ކުރީގައި އޮވެގެންނެވެ.