ޙައްޖާއި ޢުމްރާގެ ޚިދުމަތްތަކާ ގުޅޭ އެއްބަސްވުމުގައި ސޮއިކުރެއްވުމަށް ޑރ. ޝަހީމް ސަޢުދީއަށް

ހައްޖު އެންޑް ޢުމްރާ ކޮންފަރެންސް ގައި ބައިވެރިވުމަށާއި ރާއްޖޭގެ އިސްލާމިކް މިނިސްޓްރީއާއި ސަޢޫދީ ޢަރަބިއްޔާގެ މިނިސްޓްރީ އޮފް ޙައްޖު އެންޑް ޢުމްރާއާއި ދެމެދު (ހައްޖު އެންޑް އުމްރާ ސާވިސް އެގްރީމެންޓް) ގައި ސޮއިކުރުމަށް، އިސްލާމީ ކަންތައްތަކާ ބެހޭ ވުޒާރާގެ ވަޒީރު ޑރ މުހައްމަދު ޝަހީމް ޢަލީ ސަޢީދު ސައުދިއަރަބިޔާއަށް ފުރާވަޑައިގެންފި އެވެ.

ވަޒީރުގެ މި ދަތުރުފުޅަކީ ސަޢޫދީ ޢަރަބިއްޔާގެ މިނިސްޓްރީ އޮފް ޙައްޖު އެންޑް ޢުމްރާގެ މިނިސްޓަރު ޑރ. ތައުފީޤު ބިން ފައުޒާން އައްރަބީޢާގެ ދައުވަތަކަށް ކުރައްވާ ރަސްމީ ދަތުރުފުޅެއް ކަމަށް އިސްލާމިކް މިނިސްޓްރީން މައުލޫމާތު ދެއެވެ.

މިނިސްޓްރީން ބުނީ، މިދަތުރުގައި ޑރ. ޝަހީމް އިސްލާމީ ބައެއް މުއައްސަސާތަކަށް ޒިޔާރަތްކުރައްވާނެއެވެ. އަދި ކޮންފަރެންސްގެ ހަވާސާގައި އިސްލާމީ ބައެއް ޤައުމުތަކުގެ އިސްލާމީ މުއައްސަސާތަކުގެ ވެރިންނާ ބައްދަލުކުރައްވައި އިސްލާމިކް މިނިސްޓްރީގެ ދާއިރާގެ ކަންކަމުގައި އެފަރާތްތަކުގެ ފަންނީ އަދި މާލީ އެއްބާރުލުންހޯދުމާ މެދު މަޝްވަރާކުރައްވާނެ ކަމަށްވެސް ބުނެފައިވެއެވެ.

މީގެ އިތުރުން، ދިވެހި ޙައްޖުވެރިންނާއި ޢުމްރާ ވެރިންނަށް ލިބޭ ޚިދުމަތުގެ ފެންވަރު ރަނގަޅުކުރުމަށް މަސައްކަތްކުރުމަށް ރައީސުލްޖުމުހޫރިއްޔާ ޑރ މުޙައްމަދު މުއިއްޒު އިރުޝާދު ދެއްވާފައިވާތީވެ އެކަމާ ގުޅިގެން ކަމާބެހޭ އިދާރާތަކާ މަޝްވަރާކުރާނެކަންވެސް އެ މިނިސްޓްރީން ފާހަގަކޮށްފައިވެއެވެ.

"އޮގަނައިޒޭޝަން އޮފް އިސްލާމިކް ކޯޕަރޭޝަންއާއި އޭގެ ދަށުން ހިނގާ ބައެއްތަންތަން، އޭގެ ތެރޭގައި އިންޓަރނޭޝަންލް ފިޤްހު އެކަޑަމީއާއި ،އިސްލާމިކް ޑިވެލޮޕްމަންޓް ބޭންކާއި، އިސްލާމިކް ސޮލިޑަރިޓީން ފަންޑާއި މިފަދަ ބައެއް މުއައްސަސާތަކަ ބައްދަލުކުރާގޮތަސް ވަނީ ހަމަޖެހިފައި. އިސްލާމީ ޤައުމުތަކުން މި ކޮންފަރެންސްގައި ބައިވެރިވެވަޑައިގަތުމަށް އަންނަ އިސްވެރިންނާވެސް ބައްދަލުކާގޮތަށް ވަނީ ހަމަޖެހިފައި." ސަޢުދީ ދަތުރުފުޅާއި ގުޅިގެން މަޢުލޫމާތު ދެއްވަމުން ޝަހީމް ވިދާޅުވި އެވެ.

ހައްޖާއި ޢުމްރާގެ އެއްބަސް ވުމުގައި ސޮއި ކުރައްވަން މިނިސްޓަރު ސަޢުދީއަށް ވަޑައިގެންފައިވާއިރު، ރާއްޖެއިން ހައްޖަށް މީހުން ގެންދަން ދޭ ހައްޖު ކޯޓާ އިތުރު ކުރުމުގެ މަސައްކަތް މިހާރު ސަރުކާރުން ވަނީ ފަށާފައެވެ. އަދި އެކަން ވާނެ ކަމުގެ ފެހި ސިގްނަލް ލިބިފައިވާ ކަންވެސް ސަރުކާރުން ބުނެއެވެ.