ދިވެހި އަންހެނެއްގެ ތިން ފިރިން: ނުރައްކާތެރި ކަމެއް
ކޯޓުތަކުން ހަދާފައިވާ އުސޫލާއި ހިލާފަށް ރާއްޖެއިން ބޭރުގައި ބައެއް ކައިވެނިތައް ކުރެވޭތީ ނުރައްކާތެރި ކަންތައްތަކެއް ފާހަގަ ކުރެވެމުންދާ ކަމަށް ފެމެލީ ކޯޓުން މިއަދު ބުނެފި އެވެ.
އެ ކޯޓުން މިކަމުގެ ކަންބޮޑުވުން ފާޅުކޮށްފައި ވަނީ ރައްޔިތުންގެ މަޖިލީހުގެ ގަވާއިދު ކޮމެޓީގައެވެ. އެ ކޮމެޓީގައި މިއަދު ވަނީ ކައިވެނި ރޫޅުމުން އެ ކައިވެންޏަށް ލިބިފައިވާ ދަރީންނަށް ހަރަދު ދިނުމުގެ މައްސަލައާ ގުޅޭގޮތުން ވާހަކަދައްކާފައެވެ.
ކޮމެޓީގައި ވާހަކަ ދައްކަވަމުން ފެމެލީ ކޯޓްގެ ލީގަލް އޮފިސަރު އަހްމަދު މައުސޫމް ވިދާޅުވީ ކޯޓުތަކުން ހަދާފައިވާ އުސޫލާއި ހިލާފަށް ރާއްޖެއިން ބޭރުގައި ބައެއް ކައިވެނިތައް ކުރެވެމުންދާ ކަމަށެވެ.
އެެކަމުގެ ސަބަބުން ވަރަށް ނުރައްކާތެރި ކަންތައްތަކެއް ފެންމަތިވަމުންދާ ކަމަށް ވިދާޅުވި އެވެ. އެފަދަ އެއް މައްސަލައަކަށް ފާހަގަ ކުރެއްވީ ދިވެހި އަންހެނެއްގެ ތިން ފިރީން ތިބި މައްސަލަ އެކެވެ. މައުސޫމް ވިދާޅުވީ އަންހެން މީހާގެ ފުރަތަމަ ކައިވެނި ރާއްޖެއިން ބޭރުގައި ކުރުމަށް ފަހު ރަޖިސްޓްރީ ކުރަން ހުށައެޅުމުން ބައެއް ކަންކަން ދިމާވެ ރަޖިސްޓްރީ ނުކުރެވުން އެކައިވެނި ދޫކޮށްލާ އަލުން އެހެން މީހަކާ ކައިވެނި ކުރި ކަމަށެވެ. އެ ކައިވެނި ވެސް ކުރީ ރާއްޖެއިން ބޭރުގަ އެވެ. އެ ކައިވެނި ރަޖިސްޓްރީ ކުރަން ހުށައެޅިއިރު ކުރީގެ ކައިވެނި ކުރަން ހުށައެޅި ލިޔުންތައް ވެސް ކޯޓްގައި ހުއްޓެވެ.
އަދި އެ ކައިވެނި ރަޖިސްޓްރީ ނުކުރެވި ވަނިކޮށް އެ ކައިވެނި ދޫކޮށް އަނެއް އިތުރު ކައިވެންޏެއް ކޮށްފައިވާ ކަމަށެވެ.
"މިއީ ހަގީގަތުގައި ވަރަށް ނުރައްކާތެރި ކަމެއް. މިއީ އަޅުގަނޑުމެންގެ ނަސަބުވެސް އޮޅިގެން ހިނގައިދާނެ ކަމެއް,"
މައުސޫމް ވިދާޅުވީ ރާއްޖެއިން ބޭރުގައި ކުރެވޭ ކައިވެނިތައް ރަޖިސްޓްރީ ކުރެވޭނެ އުސޫލުތަކެއް ހަމަޖައްސާފައި ހުންނަ ކަމަށެވެ. އެންމެ މުހިންމު އެއް ކަމަކަށް ފާހަގަ ކުރެއްވީ އެ ކައިވެނީގެ ކުރީން ފެމިލީ ކޯޓުން ހުއްދައެއް ހޯދުމެވެ. އެއީ ކައިވެނި ރަޖިސްޓްރީ ކުުރުމުގެ މަރުހަަލާ ފަސޭހަ ގޮތަކަށް ކުރިއަށް ގެންދިއުމުގެ ބޭނުމުގަ އެވެ.
ނަމަވެސް އެ އުސޫލަށް ބެލުމެއް ނެތި ކައިވެނި ކުރަމުންދާ ކަމަށް މައުސޫމް ވިދާޅުވި އެވެ.
މައުސޫމް އިތުރަށް ވިދާޅުވީ ރާއްޖެއިން ބޭރުގައި ކައިވެނި ކުރުމަކީ މައްސަލައެއް ނޫން ކަމަށާ ނަމަވެސް އެ ގޮތަށް ކައިވެނި ކުރާނަމަ އެ އުސޫލުގައި ހިފަހައްޓަން ޖެހޭނެ ކަމަށެވެ. މައުސޫމް ވިދާޅުވީ އަންހެނަކު ދެ ފިރީން ނުވަތަ ތިން ފިރީން ތިބުމުގެ ފާހަގަވީ އެންމެ މައްސަލައެއް ނޫން ކަމަށެވެ.
ހައިކޯޓްގައި މިހާރު ވެސް އެފަދަ މައްސަލައެއް ކުރިއަށްދާ ކަމަށް ވިދާޅުވި އެވެ. އަދި ވިދާޅުވީ މިއީ ވަރަށް ނުރައްކާތެރި ކަމެއް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
