ރިޓަޔާ ކޮށްފައިވާ ސިއްޙީ ޚިދުމަތްތެރިންނަށް ކޮންޓްރެކްޓް އަށް މަސަކުރެވޭގޮތް ހަދަނީ!
ލިޔުންތެރިޔާ
ޚަދީޖާ އަރުފާ
އުމުުރުން 55 އަހަރުވެފައިވާ ނުވަތަ މަސައްކަތުން ރިޓަޔާ ކޮށްފައިވާ މީހުންގެ ތެރެއިން ސިއްހީ ގޮތުންނާއި ތައުލީމާއި ތަޖުރިބާ ގޮތުން ގާބިލް މީހުން ވަޒީފާގެ މާހައުލަށް ނެރުމަށް ކޮންޓްރެކްޓް އުސޫލުން މަސައްކަތް ކުރެވޭނެ އުސޫލެ އެކުލަވާލަން ސަރުކާރުން ނިންމައިފިއެވެ.
ސަރުކާރުން މި ނިންމުން ނިންމާފައި ވަނީ، މިދިޔަ އާދިއްތަ ދުވަހު ބޭއްވުނު ކެބިނެޓްގެ ބައްދަލުވުމުގެ ތެރެއިންނެވެ. އެ ބައްދަލުވުމަށް މި ކަން ހުށަހެޅުއްވީ ހެލްތު މިނިސްޓްރީންނެވެ.
މި ކަރުދާހުގައި ހުށަހެޅިފައިވާ ކަންކަމާއި އެކަމާއި ގުޅިގެން ކުރެވުނު މަޝްވަރާއާއި ނިންމުންތަކާއި ގުޅޭގޮތުން މައުލޫމާތު ދެއްވަމުން މިއަދު ބޭއްވި ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓެރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ، އަބްދުالله ނާޒިމް އިބްރާހީމް ވިދާޅުވީ، އެކިއެކި ސަބަބު ތަކަށްޓަކައި ޚިދުމަތުން ދުރުވެފައިވާ ނަރުހުންނާއި، އެހެނިހެން ޚާއްސަ ސިއްހީ ހިދުމަތްތެރިންގެ ތެރެއިން، އަނބުރާ ޚިދުމަތަށް ނުކުތުމަށް ބޭނުންވާ ފަރާތްތަކަށް މިހާރުން މިހާރަށްވެސް އެ ފުރުސަތު ފަހި ކޮށްދިނުމަށް، ޚާއްސަ ސްކީމެއްގެ ދަށުން، ސިއްހީ ދާއިރާއަށް ޚާއްސަ، އަވަސް ރެކްރޫޓްމަންޓް ޕްރޮސެސްއެއްގެ ތެރެއިން ފުރުސަތު ދިނުމަށް ނިންމާފައިވާ ކަމަށެވެ.
މީގެ އިތުރުން ސިއްޙީ ދާއިރާގައި މަސައްކަތްކުރާ މުވައްޒަފުންގެ ތެރެއިން 8 ގަޑިއިރަށްވުރެ މަދުން މަސައްކަތްކުރަން ބޭނުންވާ މުވައްޒަފުންނަށް، ފްލެކްސިބަލް ވޯކިން އާވާސް ތައާރަފުކޮށް، ވަގުތަށް ބަލާ ދޭނެ އުޖޫރައެއް ކަނޑައަޅާ ސިވިލްސަރވިސްގެ ޤަވާޢިދުގެތެރެއިން ޚާއްސަ އިންތިޒާމުތަކެއް ހަމަޖައްސަވަން ވެސް ވަނީ ނިންމާފައިވާ ކަމަށް ނާޒިމް ވިދާޅުވި އެވެ.
މިއާއެކު، އުމުުރުން 55 އަހަރުވެފައިވާ ނުވަތަ މަސައްކަތުން ރިޓަޔާ ކޮށްފައިވާ މީހުންގެ ތެރެއިން ސިއްހީ ގޮތުންނާއި ތައުލީމާއި ތަޖުރިބާ ގޮތުން ގާބިލް މީހަކަށް ވާނަމަ ކޮންޓްރެކްޓް އުސޫލުން މަސައްކަތް ކުރެވޭނެ އުސޫލެއް އެކުލަވާލަން ވެސް ނިންމާފައިވާ ކަމަށް ނާޘިމް ވަނީ ވިދާޅުވެފަ އެވެ.
ސިއްހީ ދާއިރާގެ އިތުރުން ތައުލީމީ ދާއިރާއާ އެ ނޫން މުހިންމު ބައެއް ދާއިރާތަކަށް ވެސް އެ ފުރުސަތު ފަހިކޮށްދޭން ސަރުކާރުން ވަނީ ނިންމާފައެވެ. އަދި "ހަފްތާ14" ނިމެންވާ އިރަށް އެކަމާއި ގުޅޭ އުސޫލު އެކުލަވާލާ ފުރުސަތު ފަހިކޮށް ދިނުމަށް ސަރުކާރުން ވަނީ އަމާޒު ހިފާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
