އެންތުރޮޕިކް އިން އަލީބާބާގެ މައްޗަށް ސީރިއަސް ތުހުމަތުތަކެއް

އެމެރިކާގެ މަޝްހޫރު އާޓިފިޝަލް އިންޓެލިޖެންސް ކުންފުނި އެންތުރޮޕިކް އިން، ޗައިނާގެ ޓެކްނޮލޮޖީ އަދި އީ-ކޮމާސް ކުންފުނި އަލީބާބާގެ މައްޗަށް އެ ކުންފުނީގެ ކްލޯޑް އޭ.އައި މޮޑެލްގެ ބޭނުން ނަހަމަގޮތުގައި ހިފިކަމުގެ ބޮޑު ތުހުމަތެއް ކޮށްފިއެވެ.

އެންތުރޮޕިކް އިން އެމެރިކާގެ ސެނެޓަރުންނަށާއި ވައިޓް ހައުސްގެ އޮފިޝަލުންނަށް ފޮނުވި ސިޓީއެއްގައި ބުނެފައިވާ ގޮތުގައި، އަލީބާބާގެ ކިއުވެން އޭ.އައި ލެބާ ގުޅުންހުރި ފަރާތްތަކުން ވަނީ ގަވާއިދާ ހިލާފަށް 25،000 އަށްވުރެ ގިނަ ފޭކު އެކައުންޓު ހަދައިގެން ކްލޯޑް މޮޑެލްއަށް އެކްސެސް ހޯދާފައެވެ. އަދި މިއަހަރުގެ އޭޕްރީލް މަހުން ފެށިގެން ޖޫން މަހުގެ ކުރީކޮޅާ ހަމައަށް، މި އެކައުންޓުތައް މެދުވެރިކޮށް 28.8 މިލިއަނަށްވުރެ ގިނަ މުއާމަލާތް ކްލޯޑްއާއެކު ކޮށްފައިވާކަމަށް ކަމަށް އެންތުރޮޕިކް އިން ބުނެއެވެ. މިއީ މިހާތަނަށް ޗައިނާގެ ކުންފުންޏަކުން އެމެރިކާގެ އެންމެ ކުރިއަރާފައިވާ އޭއައި ޓެކްނޮލޮޖީ ކޮޕީ ކުރުމަށް ނުވަތަ ވަގަށް ނެގުމަށް ހިންގި އެންމެ ބޮޑު ހަރަކާތް ކަމަށް އެންތުރޮޕިކް އިން ސިފަކުރެއެވެ.

އެންތުރޮޕިކް އިން ބުނާ ގޮތުގައި އަލީބާބާ އިން މިކަން ކޮށްފައިވަނީ އެޑްވާސަރިއަލް ޑިސްޓިލޭޝަން ކިޔާ އުކުޅެއް ބޭނުންކޮށްގެންނެވެ. މިއީ މާ ބޮޑު ހަރަދެއް ނުކޮށް، ކުރިއަރާފައިވާ އޭއައި މޮޑެލްއަކަށް ގިނަ ސުވާލުތަކެއް ހުށަހަޅައި، އެއިން ލިބޭ ޖަވާބުތައް ބޭނުންކޮށްގެން އަމިއްލަ އޭއައި މޮޑެލްއެއް ތަމްރީނުކޮށް ފެންވަރު މަތިކުރުމެވެ. މި ހަމަލާގައި އަލީބާބާ އިން ހާއްސަކޮށް އަމާޒުކޮށްފައިވަނީ ކްލޯޑްގެ އެންމެ އަގުހުރި ހާއްސަ ސިފަތަކަށެވެ. އޭގެ ތެރޭގައި ސޮފްޓްވެއާ އިންޖިނިއަރިން ނުވަތަ ކޯޑު ކުރުމުގެ ގާބިލުކަމާއި، އަމިއްލައަށް ވިސްނައިގެން ކަންކަން ނިންމުމުގެ ބާރު އަދި ގިނަ ވަގުތު ނަގާ ބޮޑެތި މަސައްކަތްތައް ރޭވުމުގެ ހުނަރު ހިމެނެއެވެ.

މި މައްސަލަ ފެންމަތިވެފައި މިވަނީ އެމެރިކާ އާއި ޗައިނާއާ ދެމެދު އޭ.އައި ރޭހުގެ ވާދަވެރިކަން އިންތިހާއަށް ބޮޑުވެފައިވާ ދަނޑިވަޅެއްގައެވެ. އެމެރިކާގެ ސަރުކާރުން ދަނީ ޗައިނާގެ ކުންފުނިތަކަށް އެމެރިކާގެ އެންމެ ފަހުގެ އޭ.އައި ޓެކްނޮލޮޖީތަކާއި ޗިޕްތައް ލިބުން ދަތިކުރުމަށް ފިޔަވަޅުތައް އަޅަމުންނެވެ. އެންތުރޮޕިކް އިން ވެސް ވަނީ ދާދިފަހުން ޗައިނާގެ ކުންފުނިތަކަށް އެމީހުންގެ ހިދުމަތްތައް ބޭނުންކުރުން މަނާކޮށްފައެވެ.

މި ތުހުމަތުތަކާ ގުޅިގެން އަލީބާބާ ގްރޫޕުން މިހާތަނަށް ރަސްމީކޮށް އެއްވެސް އެއްޗެއް ބުނެފައެއް ނުވެއެވެ. ނަމަވެސް، މި ހަބަރާއެކު އެމެރިކާގެ ހިއްސާގެ ބާޒާރުގައި އަލީބާބާގެ ހިއްސާގެ އަގު ވަނީ 3 އިންސައްތައަށްވުރެ ދަށަށް ގޮސްފައެވެ.