އޮސަސޫ އަތުން ރެއާލް މެޑްރިޑް މޮޅުކޮށްދިނީ އެމްބާޕޭ

ސްޕެނިޝް ލަލީގާގައި އަންގާރަ ދުވަހުގެ ރޭ އޮސަސޫނާއި ދެކޮޅަށް އަމިއްލަ ދަނޑުގައި ކުޅުނު މެޗު 1-0 ގެ ނަތީޖާއަކުން ކާމިޔާބުކޮށް ރެއާލް މެޑްރިޑުން ލީގުގެ ފެށުން ރަނގަޅުކޮށްފިއެވެ.

މެޗުގެ ފުރަތަމަ ހާފުގައި ގިނަވަގުތު ބޯޅަ ހިފަހައްޓައިގެންކުޅެ ރެއާލް މެޑްރިޑުން މެޗު ޑޮމިނޭޓްކުރިއިރު، މިހާފުގައި އެޓީމުން ވަނީ އޮސަސޫނާގެ ގޯލަށް ގިނަ ހަމަލާތަކެއް ފޮނުވާލާފައެވެ. ނަމަވެސް ފުރަތަމަ ހާފުގެ ކުޅުން ނިމިގެދިޔައީ ދެޓުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފު ވެސް ވަރުގަދަކޮށް ފެށީ ރެއާލް މެޑްރިޑުންނެވެ. ނަތީޖާއެއްގެ ގޮތުން ހާފުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު ދެވަނަ ހާފު ފެށިގެން ހަވަނަ މިނެޓުގައި އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ މިދިޔަ ސީޒަނު ލަލީގާގައި އެންމެ ގިނަ ލަނޑުޖެހި ކުޅުންތެރިއާ ކިލިއަން އެމްބާޕޭ އެވެ.

މީގެ އިތުރުން ވެސް މިހާފުގައި ރެއާލް މެޑްރިޑުން ވަނީ ލަނޑުޖަހާނެ ރަނގަޅު ފުރުސަތުތަކެއް ތަނަވަސްކޮށްފައެވެ. އަދި މެޗުގެ އިތުރު ވަގުތުގެ ތެރޭގައި ކުޅުމުން ބޭރުގައި ރެއާލްގެ ގޮންޒާލޯ ގާސިއާއަށް ކުރި ފައުލަކާއި ގުޅިގެން މެޗުގެ ރެފްރީ ވަނީ އޮސަސޫނާގެ ޑިފެންޑަރު އެބެލް ބްރެޓަންސްއަށް ސީދާ ރަތްކާޑެއް ދައްކައި ދަނޑުން ފޮނުވާލާފައެެވެ.

ލީގުގައި ރެއާލް މެޑްރިޑަށް ކުރިއަށް ދެންއޮތީ މިމަހުގެ 25 ވަނަ ދުވަހުގެ ރޭ ރަށުން ބޭރުގައި މިސީޒަނުގައި އަލަށް ޕްރޮމޯޓްވި ރެއަލް އޮވިއެޑޯ އާއި ދެކޮޅަށް ކުޅޭ މެޗެވެ. އަދި އޮސަސޫނާ އިން މިމަހުގެ 24 ވަނަ ދުވަހުގެ ރޭ އަމިއްލަ ދަނޑުގައި ނިކުންނާނީ ވެލެންސިއާއި ދެކޮޅަށެވެ.