ސަލްޒްބާގް އާއި ދެކޮޅަށް ރެއާލް ކުޅޭ މެޗުގައި ވެސް އެމްބާޕޭ ނުފެންނާނެ

މިހާރު އެމެރިކާގައި ކުރިއަށްދާ ކުލަބު ވޯލްޑްކަޕް ފުޓްބޯޅަ މުބާރާތުގެ ގުރޫޕް އެޗްގެ ފަހު މެޗުގައި އޮސްޓްރިއާގެ ސަލްޒްބާގް އާއި ދެކޮޅަށް ރެއާލް ކުޅޭ މެޗުގައި ވެސް އެޓީމު އިތުބާރު ފޯވާޑް ކިލިއަން އެމްބާޕޭއަށް ނުކުޅެވޭނެކަން ޔަގީން ވެއްޖެއެވެ.

މުބާރާތުގެ ގުރޫޕް ސްޓޭޖުގައި ރެއާލް ކުޅުނު ފުރަތަމަ މެޗުގައި އަލް ހިލާލް އާއި ވާދަކަށް 1-1 ގެ ނަތީޖާއަކުން އެއްވަރުވި މެޗުގެ އިތުރުން، ގުރޫޕް ސްޓޭޖުގެ ދެވަނަ މެޗުގައި ޕަޗޫކާ އަތުން 3-1 ގެ ނަތީޖާއަކުން މޮޅުވި މެޗުގައި ވެސް އެމްބާޕޭ ކުޅެފައެއްނުވެއެވެ.

މުބާރާތުގައި ވާދަކުރުމަށް ރެއާލް މެޑްރިޑް އެމެރިއާއަށް އައިފަހުން ހުންއައިސް ބަލިވެ އުޅޭތީ ހޮސްޕިޓަލުގައި އެޑްމިޓްކޮށްގެން ވެސް އެމްބާޕޭއަށް ވަނީ ފަރުވާދީފައެވެ. އަދި މިހާރު އެމްބާޕޭ ބަލިން ރަނގަޅުވެ ޓީމުގެ ފަރިތަކުރުންތަކުގައި ވަނީ ބައިވެރިވާން ފަށާފައެވެ.

މެޗުގެ ކުރިން ނޫސްވެރިންނާއި ވާހަކަދައްކަމުން ރެއާލްގެ ކޯޗު އަލޮންސޯ ބުނީ މިމެޗަށް ރެއާލް ނުކުންނަނީ ދެކަމެއް ހާސިލްކުރުމަށް ކަމަށެވެ. ފުރަތަމަ ކަމަކީ މެޗުން މޮޅުވުން އަދި ގުރޫޕްގެ އެއްވަނަ ޓީމުގެ ގޮތުގައި ދެވަނަ ބުރުގައި ކުޅެން ބޭނުންވަނީ...

އެމްބާޕޭގެ އިތުރުން ޕަޗޫކާއި ދެކޮޅަށް ކުޅުނު މެޗުގައި ރަތްކާޑު ދެއްކި ރެއާލްގެ ޑިފެންޑަރު ރައުލް އަސެންސިއޯއަށް ވެސް ސަލްޒްބާގް އާއި ދެކޮޅަށް ކުޅޭ މެޗުގައި ނުކުޅެވޭނެ އެވެ.

ގުރޫޕް ސްޓޭޖުގައި ކުޅުނު ދެމެޗުން ހޯދި ހަތަރު ޕޮއިންޓާއެކު ލަނޑުގެ ތަފާތުން ގުރޫޕްގެ އެއްވަނައިގައި ރެއާލް މިވަގުތު އޮތްއިރު، މިގުރޫޕް ދެވަނައިގައި ސަލްޒްބާގް އޮތީވެސް ހަތަރު ޕޮއިންޓާއެކުއެވެ.

މާދަމާ ހެނދުނު ރާއްޖެ ގަޑިން 6:00 ގައި ރެއާލް މެޑްރިޑާއި ސަލްޒްބާގް ވާދަކުރާ މެޗު ކުޅޭ އިރު މިގުރޫޕްގައި ހިމެނޭ އަލް ހިލާލް އާއި ޕަޗޫކާ ވެސް އެގަޑީގައި ވާދަކުރާނެއެވެ. އަދި އެމެޗުން މޮޅުވެ އަލް ހިލާލަށް ވެސް ދެވަނަ ބުރުން ޖާގަ ހޯދުމުގެ ފުރުސަތު އެބައޮތެވެ.