ސުލްޙައިގެ ބޯޑުން ޣައްޒާ އާރާސްތުކުރުމަށް 2.45 ބިލިއަން ޑޮލަރުގެ މަޝްރޫޢެއް އިޢުލާނުކުރަނީ

އިސްރާއީލުގެ އިސްތިއުމާރީ ހަމަލާތަކުގައި ބޮޑެތި ގެއްލުންތައް ލިބިފައިވާ ޣައްޒާ އަލުން ބިނާކުރުމަށް 2.45 ބިލިއަން ޑޮލަރުގެ ޕްލޭނެއް އެކުލަވާލައި ހާމަކުރުމަށް އެމެރިކާގެ ރައީސް ޑޮނަލްޑް ޓްރަމްޕް އުފެއްދި ސުލްޙައިގެ ބޯޑުން ނިންމައިފިއެވެ.

މީޑިއާގެ ރިޕޯޓްތައް ބުނާގޮތުގައި ހަ މަސް ދުވަހުގެ މުއްދަތަށް ރާވާފައިވާ މި ޕްލޭން ރަސްމީކޮށް ހުށަހެޅުމަށް ހަމަޖެހިފައި ވަނީ މިއަދު އެ ބޯޑުގެ މެންބަރުން ބޭއްވުމަށް ނިންމާފައިވާ ޖަލްސާގައެވެ. ޖުމްލަ 66 މަޝްރޫޢެއް ހިމެނޭ މި ހުށަހެޅުމުގައި ޣައްޒާގެ ރައްޔިތުންނަށް ވަގުތީ ބޯހިޔާވަހިކަން ހޯދައިދިނުމާއި ހަނގުރާމައިގެ ތެރޭގައި ޖަމާވެފައިވާ ކުނިބުނި ނެގުމާއި ހަލާކުވެފައިވާ ހަސްފަތާލުތަކާއި ޞިއްޙީ މަރުކަޒުތައް މަރާމާތުކުރުން ހިމެނެއެވެ.

އެ ޕްލޭނުގައި ޣައްޒާގެ އިޤްތިޞާދު ކޮޅަށް ޖެހުމަށާއި ބައިނަލްއަޤުވާމީ ޞުލްޙަ ބަލަހައްޓާ ފައުޖެއް ޤާއިމުކުރުމަށް ހިނގާނެ ޚަރަދުތައް ވެސް ހިމަނާފައިވެއެވެ.

ހަމައެހެންމެ ސަރަޙައްދީ ރޮނގު ހުރަސްކުރާ މައި މަގުތައް ހެދުމާއި ކެނޑިފައި އޮތް ފެނާއި ކަރަންޓުގެ ޚިދުމަތް އިޢާދަކުރުމާއި 25000 ސޯލާ ޕަވާ ކިޓު ބެހުމާއި އާރާސްތުކުރާ ސަރަޙައްދުތަކުގެ ބިމު އަޑީގައި ހުރި ޓަނަލްތައް ދާއިމީކޮށް ބެއްދުން ވެސް ރާވާފައިވެއެވެ. މި ޕްލޭނާ ގުޅޭ ރަސްމީ ބަހެއް ހޯދުމަށް މަސައްކަތްކުރި ނަމަވެސް ވައިޓް ހައުސް އާއި ޚާރިޖީ ވުޒާރާއިން ވަނީ މަޢުލޫމާތު ދިނުމަށް އިންކާރުކޮށްފައެވެ.

އިސްތިއުމާރީ އިސްރާއީލުގެ ހަމަލާތަކުން ޣައްޒާއަށް ލިބުނު މާއްދީ ގެއްލުން އެކަނި ވެސް 35.2 ބިލިއަން ޑޮލަރަށް އަރައެވެ.

ކުރިއަށް އޮތް ދިހަ އަހަރު ތެރޭ ޣައްޒާ އެއްކޮށް އާރާސްތުކޮށް ޢާންމު ޙާލަތަށް ގެނައުމަށް 71.4 ބިލިއަން ޑޮލަރަށް ވުރެ ބޮޑު ޚަރަދެއް ހިނގާނެ ކަމަށް އަންދާޒާ ކުރެވެއެވެ.

ޖުލައި މަހުގެ ފަހުކޮޅު ސުލްޙައިގެ އެއްބަސްވުމެއް ޓްރަމްޕް އިޢުލާނުކުރި ނަމަވެސް، އިސްރާއީލާއި ޙަމާސް ޖަމާޢަތާ ދެމެދު ޝަރުޠުތަކާ މެދު އެއްބަސްވުމަކަށް ނާދެވި އެ މަސައްކަތް ވަނީ ހުއްޓުމަކަށް އައިސްފައެވެ. އެހެން ނަމަވެސް ޓްރަމްޕްގެ ސަރުކާރުން ވަނީ ޣައްޒާގެ ޞުލްޙަ ބަލަހައްޓާ ފައުޖަށް 206 މިލިއަނަށް ވުރެ ގިނަ ޑޮލަރު ފޮނުވަމުންދާ ކަމަށް އެމެރިކާގެ ޤާނޫނުހަދާ މަޖިލީހަށް އަންގާފައެވެ.

މުޅި ޕްލޭނަށް ބޭނުންވާ 2.45 ބިލިއަން ޑޮލަރު ސުލްޙައިގެ ބޯޑަށާއި ފަލަޞްޠީނުގެ ސަރުކާރަށް އަދި އެއްކޮށް ލިބިފައި ނުވި ނަމަވެސް ސިޔާސީ ހުރަސްތައް ނައްތައިލެވިއްޖެ ނަމަ ބައިނަލްއަޤުވާމީ ފަރާތްތަކާއި އެހީދޭ ޤައުމުތަކުން އެ ފައިސާ ފޯރުކޮށްދޭނެ ކަމުގެ ޔަޤީންކަން އެބައޮތް ކަމަށް މީޑިއާގެ ރިޕޯޓްތައް ބުނެއެވެ.