ހާއިނުންނަކީ ކޮންބައެއްކަން ނޭނގޭ، ނިންމާނީ ކޯޓުތަކުން: މާރިޔާ
ލިޔުންތެރިޔާ
ޝަފްރާޒް އަހްމަދު
ދިވެހިރާއްޖޭގައި ހާއިނުންނަކީ ތިބި ބައެއްކަން އެނގިވަޑައިނުގަންނަވާ ކަމަށާއި، ހާއިނުންނަކީ ކޮބައިކަން ނިންމާނީ ކޯޓުތަކުން ކަމަށް، އިންތިހާބީ ރައީސް އިބްރާހިމް މުހައްމަދު ސޯލިހުގެ ތަރުޖަމާނު، މާރިޔާ އަހުމަދު ދީދީ ވިދާޅުވެއްޖެއެވެ.
މާރިޔާ މިހެން ވިދާޅުވީ ސޯލްޓް ކެފޭގައި ކުރިއަށްދާ ސިލްސިލާ ނޫސްވެރިންގެ ބައްދަލުވުންތަކުގެ ތެރެއިން، މިއަދުގެ ބައްދަލުވުމުގައި ވާހަކަފުޅު ދައްކަވަމުންނެވެ. ނޮވެމްބަރ 3 ގެ ހަމަލާގައި ހިމެނޭ ސަގަރު ނާސިރު، ރައީސް ނަޝީދަށް މަރުހަބާ ކިޔަން ނުކުތް މައްސަލައިގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މާރިޔާ ވިދާޅުވީ، ރާއްޖޭގެ ކްރިމިނަލް ޖަސްޓިސް ސިސްޓަމް އަކީ މީހުން ރަނގަޅު ކުރުމުގެ ވިސްނުން ހުރި ނިޒާމެއް ކަމަށާއި، ކޯޓުތަކުން މީހުންގެ މައްޗަށް ހުކުމްކޮށް، އެ ހުކުމް ތަންފީޒުކުރުމުން އޭގެ ވާހަކަ ދެއްކުމުގެ ޖާގައެއް ނެތްކަމަށެވެ.
މީގެ އިތުރުން މާރިޔާ ވިދާޅުވީ ހާއިނުންނަކީ ކޮބައިކަން އެނގިވަޑައިނުގަންނަވާ ކަމަށާާއި، އެއީ ކޯޓުތަކުން ނިންމާ އެއްޗެއް ކަމަށެވެ. އަދި ހާއިނުންގެ ލިސްޓެއް ނުގެންގުޅޭ ކަމަށްވެސް އެކަމަނާ ވަނީ ވިދާޅުވެފައެވެ.
މާރިޔާ ވިދާޅުވީ ފެންނަމުންދަނީ އެންމެންވެސް ނަސްރުގެ ދުވަސް ފާހަގަކޮށް، މިނިވަންކަމުގެ އަގު ވަޒަންކޮށް އެ މިނިވަން ކަމާއިއެކު އާ އަޒުމެއްގައި ކުރިއަށްދާ މަންޒަރު ކަމަށެވެ.
މިއަދުގެ ނޫސްވެެރިންގެ ބައްދަލުވުމުގައި މާރިޔާ ވަނީ އިންތިޚާބީ ރައީސް އިބްރާހިމް މުހައްމަދު ސޯލިހުގެ ނަންފުޅުގައި ނަސްރުގެ ދުވަހުގެ ހެޔޮއެދުމާއި ތަހުނިޔާ އެންމެހާ ދިވެހިންނަށް ފޮނުއްވަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
