ދެވަނަ ފަހަރަށް ސްޓީވީ އިނޮވޭޓިވް އެވޯޑް އުރީދޫއަށް

އެމެރިކާގެ ބިޒްނަސް އެވޯޑްސް އެސޯސިއޭޝަން އިން ވިޔަފާރި ކުންފުނިތަކުގެ އަގުވަޒަން ކުރުމުގެ ގޮތުން ދެމުން އަންނަ ސްޓީވީ އެވޯޑުން "އިނޮވޭޓިވް" ކުންފުނީގެ އެވޯޑް އުރީދޫ މޯލްޑިވްސްއަށް ލިބިއްޖެ އެވެ.

އުރީދޫ މޯލްޑިވްސްއަށް ލިބިފައިވަނީ އެންމެ އިނޮވޭޓިވް ކުންފުނީގެ ކެޓަގަރީއިން ބްރޮންޒް އެވޯޑެވެ. އުރީދޫއިން ވަނީ މިދިޔަ އަހަރުވެސް މި އެވޯޑް ހާސިލް ކޮޮއްފައެވެ.

އުރީދޫ މޯލްޑިވްސްގެ ސީއީއޯ ނަޖީބް ހާން ވަނީ ކުންފުނީގެ އައު އީޖާދުތަކުގެ އަގު ވަޒަންކޮށް އެކަމަށް އެވޯޑެއް ލިބުމަކީ ވަރަށް ބޮޑު ޝަރަފެއް ގޮތުގައި ސިފަ ކުރައްވާފައެވެ.

އީޖާދީ މަސައްކަތްތައް ކުރުމުގެ ފަހަތުގައި ވަނީވެސް ކަސްޓަމަރުންނަށް ފަސޭހަ މަގުތައް ފަހިކޮށްދިނުން ކަމަށް ނަޖީބް ވިދާޅުވިއެވެ.

ސްޓީވީ އެވޯޑްގެ ކޮންމެ ދާއިރާ އަކުންވެސް ތިން ދަރަޖަކަމަށްވާ ގޯލްޑް، ސިލްވަރ އަދި ބްރޮންޒް އެވޯޑް ލިބެއެވެ.

މިދިޔަ އަހަރު އުރީދޫއިން ވަނީ އިނޮވޭޓިވް ކުންފުނީގެ އިތުރުން އެކުންފުނިން ތައާރަފްކުރި "އެމް-ފައިސާ" އަށް މޮޅު އާ ޕްރޮޑަކްޓެއް ތައާރަފުކުރި ކުންފުނީގެ އެވޯޑްވެސް ލިބިފައެވެ.

އުރީދޫގެ އެމް-ފައިސާގެ ހިދުމަތުގެ އެހީގައި ސްމާޓްފޯން ބޭނުންކޮށްގެން ވިޔަފާރީގެ ޓްރާންސެކްޝަންސްތައް ކުރިއަށް ގެންދެވޭނެއެވެ.

މިއަހަރުގެ ސްޓީވީ އެވޯޑްސް ހަފްލާގައި އުރީދޫ ގްރޫޕަށް ޖުމްލަ ހަތަރު ގޯލްޑް އެވޯޑާއި ހަތް ސިލްވަރ އެވޯޑް އަދި ހަތަރު ބްރޮންޒް އެވޯޑް ވަނީ ލިބިފައެވެ.