ބާސެލޯނާ ބަލިކޮށް ވާދަވެރި އެތްލެޓިކޯ މެޑްރިޑް، ޗެމްޕިއަންސްލީގް ސެމީއަށް

ވާދަވެރި ބާސެލޯނާ ބަލިކުރުމަށްފަހު ޗެމްޕިއަންސްލީގް ސެމީފައިނަލުގެ ޖާގައެއް އެތްލެޓިކޯ މެޑްރިޑް ހޯދައިފިއެވެ.

މުބާރާތުގެ ސެމީގެ ޖާގަ އެތްލެޓިކޯއިން ކަށަވަރުކޮށްފައިވަނީ ރޭ ދެވަނަ ލެގްގައި ކުޅުނުމެޗް 2-1 ގެ ނަތީޖާއިން ބަލިވިނަމަވެސް، ފުރަތަމަ ލެގްގެ މެޗް 2-0 ގެ ނަތީޖާއިން އެތްލެޓިކޯ ކާމިޔާބުކޮށްފައިވުމުން ދެމެޗްގެ އެގްރިގޭޓް ނަތީޖާ 3-1 ގެ ނަތީޖާއިން ކުރި ހޯދައިގެންނެވެ.

އެތްލެޓިކޯގެ ދަނޑުގައި ރޭ ކުޅުނުމެޗްގައި ފުރަތަމަ ދެ ލަނޑު ޖަހައި ކުރި ހޯދީ ބާސެލޯނާއެވެ. ފުރަތަމަ ލަނޑު ކާމިޔާބުކޮށްދިނީ، މެޗް ފަށައިގެން ހަތަރުވަނަ މިނެޓް ތެރޭގައި ޔަމާލްއެވެ. ދެވަނަ ލަނޑު ކާމިޔާބުކޮށްދިނީ، ފެނާންޑޯ ޓޯރެޒް އެވެ. މިމެޗްގައި ޓޯރެޒް ވަނީ ދެވަނަ ހާފްގައި އިތުރު ލަނޑެއްވެސް ކާމިޔާބުކޮށްފައެވެ. ނަމަވެސް ވީއާރު ބެލުމަށްފަހު ރެފްރީ ވަނީ އެއީ އޯފްސައިޑް ލަނޑެއްގެ ގޮތުގައި ނިންމާފައެވެ.

އެތްލެޓިކޯއަށް ޗެމްޕިއަންސްލީގް ޖާގަ ކަށަވަރުކޮށްދިނީ 31 ވަނަ މިނެޓް ތެރޭގައި ލޫކްމޭން ކާމިޔާބުކޮށްދިން ލަނޑުންނެވެ.

މެޗަށްފަހު ނޫސްވެރިންނާ ވާހަކަދައްކަމުން އެތްލެޓިކޯ މެޑްރިޑްގެ ކޯޗް ޑިއޭގޯ ސިމިއޯނީ ވަނީ އެތްލެޓިކޯގެ ކުޅުންތެރިންނަށް ވަރަށްބޮޑަށް ތައުރީފްކޮށް ވާހަކަދައްކާފައެވެ. ޓީމްގެ މިހާރު އަމާޒަކީ ސެމީފައިނަލުގައިވެސް މިހާތަނަށް ދެއްކި ފަދަ ރީތިކުޅުމެއް ދައްކައި ފައިނަލަށް ދިއުންކަމަށް ސިިމިއޯނީ ބުންޏެވެ.

ޗެމްޕިއަންސްލީގް ސެމީފައިނަލުގައި އެތްލެޓިކޯ މެޑްރިޑް ބައްދަލުކުރަންޖެހޭ ޓީމެއް ޔަގީންވާނީ، މިރޭ އާސެނަލް އާއި ސްޕޯޓިން ބައްދަލުކުރާ މެޗަށްފަހުއެވެ. ފުރަތަމަ ލެގްގައި މި ދެޓީމް ކުޅުނުމެޗް 0-1 ގެ ނަތީޖާއަކުން ކާމިޔާބުކުރީ އާސެނަލްއެވެ.