ޕެންޝަން ބޯޑަށް ޕްރައިވެޓް ސެކްޓަރ އިން މެމްބަރަކު ހޯދަން ކުރި އިއުލާނަށް ފިނި ތަރުހީބެއް

މޯލްޑިވްސް ޕެންޝަން އެޑްމިނިސްޓްރޭޝަން އޮފީހުގެ ބޯޑަށް ޕްރައިވެޓް ސެކްޓަރ އިން މެމްބަރަކު ހޯދަން އަނެއްކާވެސް އިއުލާނުކޮށްފައެވެ.

ޕެންޝަން އޮފީހުން ވަނި ފެބުރުއަރީމަހުގެ 10 ވަނަ ދުވަހު އެ އޮފީހުގެ ބޯޑުގައި ޕްރައިވެޓް ސެކްޓަރ ތަމްސީލުކުރާ 4 މެންބަރުންގެ ތެރެއިން 1 މަޤާމް ހުސްވެފައިވާތީ މަޤާމަށް ކުރިމަތިލުމުގެ ފުރުޞަތު ޢާއްމުކޮށް ހުޅުވާލާފައެވެ. ޕެންޝަން އޮފީހުން ބުނީ އެ އިއުލާނުގައިވާ ސުންގަނޑި އިއްޔެގެ ނިޔަލަށް ހަމަވިއިރު، އެކަށީގެންވާ ޢަދަދަކަށް އެޕްލިކޭޝަން ލިބިފައި ނުވާކަމަށެވެ.

އެހެންކަމުން ޕެންޝަން އޮފީހުން އަލުން ވަނީ އެ މަގާމަށް ކުރިމަތިލުމުގެ ފުރުސަތު އަންނަ މާޗްމަހުގެ 3 ވަނަ ދުވަހުގެ ނިޔަލަށް އަނެއްކާވެސް އިތުރުކޮށްފައެވެ.

ޕެންޝަން އޮފީހުގެ ބޯޑުގައި މިވަގުތު ތިއްބެވީ، 5 ބޯޑު މެމްބަރުން އެކަންޏެވެ. އޭގެ ތެރޭގައި ހިމެނެނީ ޕަބްލިކް ސެކްޓަރުގެ ފަރާތުން ތަމްސީލްކުރާ 3 މީހަކާއި ޕްރައިވެޓް ސެކްޓަރގެ ފަރާތުން 2 މީހެކެވެ. ޕެންޝަން އޮފީހުގެ ޗެއާޕާސަން ކަމާއި ސީއީއޯކަމުގެ މަގާމުވެސް މިވަގުތު އޮތީ ހުސްކޮށެވެ.

ޕެންޝަން އޮފީހުގެ ޗެއާޕާސަން ޑރ. އަހުމަދު އިނާޒް މިހިނގާ ފެބުރުއަރީމަހުގެ 1 ވަނަ ދުވަހު އިސްތިއުފާ ދެއްވިއިރު، ސީއީއޯގެ މަގާމުން ސުޖާތާ ހަލީމު އިސްތިއުފާ ދެއްވާފައިވަނީ މިމަހުގެ 4 ވަނަ ދުވަހުއެވެ.